ប្រជានេសាទក្នុងសហគមន៍ត្រពាំងសង្កែព្រួយបារម្ភបាត់ព្រៃកោងកាង
ខេត្តកំពត ៖ បន្ទាប់ពីមានគម្រោងសាងសង់កំពង់ផែទេសចរណ៍មក ប្រជានេសាទរស់នៅក្នុងសហគមន៍ត្រពាំងសង្កែកំពុងព្រួយបារម្ភយ៉ាងខ្លាំង ដោយសារ
ខេត្តកំពត ៖ បន្ទាប់ពីមានគម្រោងសាងសង់កំពង់ផែទេសចរណ៍មក ប្រជានេសាទរស់នៅក្នុងសហគមន៍ត្រពាំងសង្កែកំពុងព្រួយបារម្ភយ៉ាងខ្លាំង ដោយសារពួកគេទទួលដំណឹងថា នឹងមានការលុបព្រៃកោងកាងនៅតំបន់ឆ្នេរនេះ ហើយប្រសិនបើលុបមែននឹងជួបបញ្ហា ព្រោះពួកគេសុទ្ធតែពឹងអាស្រ័យលើផលនេសាទសមុទ្រនៅតំបន់ព្រៃកោងកាងនោះ ។
ប្រធានសហគមន៍នេសាទត្រពាំងសង្កែ លោក សឹម រហ៊ីម បានលើកឡើងថា ប្រជានេសាទនៅទីនេះសុទ្ធតែក្រីក្រ រៀនមិនបានខ្ពស់ និងមានមុខរបរជាអ្នកនេសាទ ។ ប្រសិនបើមានការអភិវឌ្ឍ ច្បាស់ណាស់ការចំណាកស្រុកនឹងកើនឡើង ជាពិសេស ប៉ះពាល់ដល់កុមារនឹងបោះបង់សាលាជាមិនខាន ។
លោកថា ៖« ជាក់ស្ដែង នៅពេលមិនទាន់បង្កើតសហគមន៍ គឺមានការចំណាកស្រុកច្រើន និងបោះបង់ការរៀនសូត្រផងដែរ ។ ការចំណាកស្រុករបស់ពួកគាត់ គឺទៅនេសាទនៅថៃ ម៉ាឡេស៊ី និងឥណ្ឌូណេស៊ីជាដើម ។ យើងដឹងហើយថា អ្នកនេសាទទៅណាក៏នេសាទដែរ អីចឹង បើយើងទុកតំបន់នេសាទរបស់យើងឲ្យពួកគាត់ គឺល្អជាង កុំឲ្យគាត់ចំណាកស្រុក » ។
យ៉ាងណាក៏ដោយ ប្រធានសហគមន៍រូបនេះបានឲ្យដឹងទៀតថា ៖« បើសិនជារាជរដ្ឋាភិបាលមានគម្រោងប្រគល់ព្រៃកោងកាងឲ្យក្រុមហ៊ុនមែននោះ ព្រៃហ្នឹងវាទៅបាត់ហើយ ប៉ុន្តែដោយសារមានការគូសផែនទីបន្លំភ្នែករាជរដ្ឋាភិបាលថា «អភិវឌ្ឍន៍» ។ ខ្ញុំគិតថា រាជរដ្ឋាភិបាលមិនទាន់មានគម្រោងទេ ហើយក៏មិនទាន់អនុញ្ញាតដែរ តែនេះអាចជាលេសដែលឈ្មួញខិលខូចថា រាជរដ្ឋាភិបាលបានអនុញ្ញាត » ។
លោកបន្តថា៖« យើងមិនអាចដឹងទេថា ក្រុមហ៊ុនណានោះ ប៉ុន្តែជាក់ស្ដែងរាល់ថ្ងៃនេះ គឺមានការលុបព្រៃកោងកាង បោះបង្គោលដីសមុទ្រ លុបដែននេសាទ ហើយនៅពេលយើងសួររកឯកសារពាក់ព័ន្ធនានា គឺគ្មានទេ ។ អីចឹង អាចជាការបន្លំរបស់អ្នកណាម្នាក់ប្រុងយកដីនេះលក់ឲ្យក្រុមហ៊ុនហើយ » ។
បើតាមលោក មូវ ឈាង មេឃុំត្រពាំងសង្កែ បានឲ្យដឹងថា រឿងថារាជរដ្ឋាភិបាលលុបសហគមន៍ ឬមានក្រុមហ៊ុនណាមកទិញដីសហគមន៍នោះ គឺលោកមិនដែលទទួលដំណឹងនេះឡើយ ព្រោះរាល់ការប្រជុំម្ដងៗ គឺខាងប្រធានសហគមន៍មិនលើកឡើងពីបញ្ហានេះសោះ ។
ប្រជាពលរដ្ឋរស់នៅទីនេះ៦០%ជាបងប្អូនមូស្លីម និង៤០%ជាជនជាតិខ្មែរ ។ មូស្លីមនៅទីនេះ គឺពឹងផ្នែកទៅលើការនេសាទ ។ អ្វីជាផលប៉ះពាល់បំផុតសម្រាប់ពួកគាត់ គឺខ្លាចការចំណាកស្រុក ហើយនៅពេលចំណាកស្រុក នឹងហានិភ័យអ្វីខ្លះកើតឡើង ?
លោក ព្រឿង រចនា អ្នកសម្រសម្រួលមកពីអង្គការសកម្មភាពយុវជនកម្ពុជា (Cambodian Youth Action) បានឲ្យដឹងថា ៖« អ្នកនេសាទនៅទីនេះ គឺពឹងផ្អែកទៅលើការនេសាទ បើសិនជាគាត់បាត់បង់ការនេសាទ ប្រៀបបីដូចជាគាត់បាត់បង់ឆ្នាំងបាយអីចឹងដែរ » ។
ការប្រែក្រែសហគមន៍នេសាទ មកជាតំបន់សហគមន៍ទេសចរណ៍ធម្មជាតិ វាជាការល្អ ព្រោះភ្ញៀវទេសចរអាចមកទស្សនា ឬកម្សាន្ត ហើយចូលរួមចំណែកស្ដារឡើងវិញនូវព្រៃកោងកាង ព្រោះព្រៃកោងកាងសំខាន់ណាស់ មិនត្រឹមតែមនុស្សលោកទេ សូម្បីតែធម្មជាតិក៏ត្រូវការដែរ ។
លោកបន្តទៀតថា ៖« បើសិនជាមានគម្រោងអភិវឌ្ឍន៍អ្វីផ្សេងៗនៅទីនេះ យើងគួរតែសិក្សាអំពីផលប៉ះពាល់ជាក់ស្ដែងដល់ប្រជាពលរដ្ឋនៅតំបន់នេះឲ្យច្រើន ព្រោះប្រជាពលរដ្ឋនៅទីនេះអាចថា ចំណេះដឹងមានកម្រិតនៅឡើយ ។ ថ្មីៗនេះ យើងឃើញមានគម្រោងអភិវឌ្ឍន៍មួយចំនួនកំពុងតែគំរាមកំហែងច្រើនដល់សហគមន៍នៅក្បែរនេះ គឺកំពង់ផែទេសចរណ៍អន្តរជាតិដែលចុះពីកោះត្រល់មក អីចឹងគេត្រូវការពង្រីកដែនដីធ្វើជាសំណង់ផ្សេងៗ ។ ខ្ញុំទទួលស្គាល់ថា ពិតជាមានចំណូលថ្មី តម្រូវការការងារនឹងមានច្រើន តែសួរថា ប្រជាពលរដ្ឋរស់នៅក្នុងតំបន់នឹងទទួលបានការងារប៉ុន្មានភាគរយ ? នេះជារឿងមួយដែលយើងត្រូវសិក្សាបន្ថែម » ។
ទោះបីជាមានការអភិវឌ្ឍព្រៃកោងកាងពីសហគមន៍ត្រពាំងសង្កែយ៉ាងណាក៏ដោយ ក៏នៅមានតំបន់មួយចំនួនដែលស្ថិតក្រោមការគ្រប់គ្រងរបស់សហគមន៍ គឺមានការកាប់ និងលុបព្រៃកោងកាងជាហូរហែពីសំណាក់ក្រុមហ៊ុនមួយចំនួន ដែលធ្វើឲ្យអ្នកនេសាទព្រួយបារម្ភចំពោះការនេសាទរបស់ពួកគាត់ ដោយសារតែបាត់បង់ជម្រកត្រី ។
លោក មូ សើ អ្នកនេសាទនៅតំបន់ត្រពាំងសង្កែ បានឲ្យដឹងថា ការនេសាទរបស់ប្រជាសហគមន៍នេះ គឺពឹងអាស្រ័យលើព្រៃកោងកាង តែឥឡូវ ព្រៃនៅត្រពាំងសង្កែមានទំហំប្រហែល៥០ហិកតា លាតសន្ធឹងពីសហគមន៍ត្រពាំងសង្កែទៅកែបថ្មី និងត្រពាំងរពៅ វាអស់ទៅហើយ ។
យ៉ាងណាក៏ដោយ ប្រជានេសាទនៅសហគមន៍នេះបានសំណូមពរដល់ក្រុមហ៊ុនទាំងអស់ដែលមានគម្រោងអភិវឌ្ឍន៍នៅតំបន់នេះ មុននឹងសាងសង់អ្វីមួយ សូមសិក្សាពីផលប៉ះពាល់ឲ្យបានច្បាស់លាស់ ហើយគម្រោងទាំងនោះនឹងផ្ដល់ផលប្រយោជន៍អ្វីខ្លះដល់ប្រជាពលរដ្ឋរស់នៅតំបន់នោះ ។
ទាក់ទងនឹងការសាងសង់កំពង់ផែទេសចរណ៍នេះ លោក ចាន់ ជេស្ដា អភិបាលខេត្តកំពត ធ្លាប់បញ្ជាក់ថា ផែទេសចរណ៍នេះនឹងផ្ដល់ផលប្រយោជន៍ជាច្រើនមកប្រទេសជាតិទាំងមូល ហើយវានឹងផ្ដល់ការងារកាន់តែច្រើនលើវិស័យទេសចរណ៍ដល់ប្រជាពលរដ្ឋកម្ពុជា ។
លោកក៏បានបន្ថែមថា តាមរយៈកំពង់ផែនេះ ក៏ជាផ្នែកមួយដែលនឹងស្រូបយកភ្ញៀវទេសចរអឺរ៉ុបកាន់តែច្រើនផងដែរ ព្រោះកំពង់ផែនេះផ្ដល់សេវាកម្មទេសចរណ៍ជាកញ្ចប់ ដែលនាំភ្ញៀវទេសចរពីខេត្តកំពត ទៅកោះត្រល់ ប្រទេសវៀតណាម និងដែនសមុទ្រប្រទេសថៃ ។
គួររំឭកថា កំពង់ផែទេសចរណ៍ថ្មីមួយដែលមានតម្លៃ១០លានដុល្លារក្រោមជំនួយរបស់ធនាគារអភិវឌ្ឍន៍អាស៊ី ហៅកាត់ថា (ADB) គ្រោងនឹងចាប់ផ្តើមសាងសង់នៅចុងឆ្នាំនេះ និងបញ្ចប់នៅចុងឆ្នាំ២០១៩ខាងមុខ ។
បើតាមលោករដ្ឋមន្ត្រី ថោង ខុន ថ្លែងថា កំពង់ផែនេះនឹងជួយរួមចំណែកទាក់ទាញភ្ញៀវទេសចរពីតាមបណ្តាប្រទេសក្នុងតំបន់ ពិសេស ប្រទេសវៀតណាម និងថៃ តាមរយៈភ្ជាប់ការធ្វើដំណើរតាមផ្លូវទឹកតាមកប៉ាល់លឿន ឬកប៉ាល់ទេសចរណ៍ខ្នាតធំ ។
លោករដ្ឋមន្ត្រីទេសចរណ៍បានបន្តថា ទំហំវិសាលភាពនៃកំពង់ផែនេះ នឹងមានលទ្ធភាពអាចឲ្យភ្ញៀវទេសចរឆ្លងកាត់បានចំនួន១,៥លាននាក់ក្នុង១ឆ្នាំ ។ ក្នុងគម្រោងសាងសង់នេះ នឹងផ្ដល់ផលប្រយោជន៍ជាច្រើនដល់តំបន់ទេសចរណ៍ផ្សេងទៀតផងដែរ ក្នុងនោះ វាអាចបង្កភាពងាយស្រួលដល់ភ្ញៀវទេសចរ ដែលមានបំណងចង់បន្តដំណើរពីតំបន់មួយទៅតំបន់មួយទៀតដូចជា ពីខេត្តកំពត ទៅភ្នំបូកគោ ខេត្តព្រះសីហនុ និងខេត្តសៀមរាបជាដើម ៕
ចែករំលែកព័តមាននេះ