ភ្ជុំបិណ្ឌឆ្នាំនេះ ភ្ញៀវទេសចរទៅលេងខេត្តសៀមរាបច្រើនជាងគេ
រាជធានីភ្នំពេញ ៖ ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌ ខេត្តគោលដៅទេសចរណ៍សំខាន់ៗមួយចំនួននៅកម្ពុជា មាន
រាជធានីភ្នំពេញ ៖ ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌ ខេត្តគោលដៅទេសចរណ៍សំខាន់ៗមួយចំនួននៅកម្ពុជា មាន
រាជធានីភ្នំពេញ ៖ ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌ ខេត្តគោលដៅទេសចរណ៍សំខាន់ៗមួយចំនួននៅកម្ពុជា មានភ្ញៀវទៅទស្សនាច្រើនជាងឆ្នាំមុន ក្នុងនោះខេត្តសៀមរាបបានទទួលស្វាគមន៍ភ្ញៀវទេសចរជាតិ និងអន្តរជាតិច្រើនជាងគេ តាមពីក្រោយដោយខេត្តព្រះសីហនុ ។
យោងតាមតួលេខក្រសួងទេសចរណ៍បញ្ជាក់ថា ក្នុងឱកាសបុណ្យភ្ជុំបិណ្ឌឆ្នាំនេះ តំបន់គោលដៅទេសចរណ៍នានាក្នុងប្រទេសកម្ពុជាទទួលបានភ្ញៀវទេសចរជាតិ និងអន្តរជាតិសរុបចំនួន១លាន៥ម៉ឺននាក់ មានកំណើនប្រមាណជិត១៦% បើធៀបនឹងឆ្នាំ២០១៦ មានប្រមាណ១លាន១ម៉ឺននាក់ ។
តួលេខដដែលបញ្ជាក់ទៀតថា សៀមរាប គឺជាខេត្តទេសចរណ៍ទទួលបានភ្ញៀវច្រើនជាងគេ ដែលមានភ្ញៀវជាតិ និងអន្តរជាតិសរុបជាង១៤ម៉ឺន៣ពាន់នាក់ ខណៈខេត្តព្រះសីហនុ ទទួលបានភ្ញៀវទេសចរសរុបប្រមាណ៩ម៉ឺន២ពាន់នាក់ ។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ ឱ្យដឹងថា កំណើនភ្ញៀវទេសចរទៅទស្សនា និងសម្រាកកម្សាន្តនៅខេត្តព្រះសីហនុ បានកើនឡើងជាបន្តបន្ទាប់ពីមួយឆ្នាំទៅមួយឆ្នាំ ជាពិសេស នៅពេលមានបុណ្យទានម្ដងៗដូចជា ព្រឹត្តិការណ៍ចូលឆ្នាំសកល ចូលឆ្នាំខ្មែរ និងបុណ្យភ្ជុំបិណ្ឌជាដើម ។
លោកបន្តថា នៅពេលភ្ញៀវសម្រុកទៅកម្សាន្តនៅខេត្តព្រះសីហនុម្ដងៗ តែងតែខ្វះខាតបន្ទប់សណ្ឋាគារ និងផ្ទះសំណាក់សម្រាប់ភ្ញៀវ ។ កត្តាទាំងនេះ មន្ទីរទេសចរណ៍ និងថ្នាក់ដឹកនាំខេត្តបានអំពាវនាវដល់ម្ចាស់ផ្ទះណាដែលនៅសល់បន្ទប់ ហើយមានបំណងចង់រកប្រាក់ចំណូលបន្ថែមទៀតអាចប្រាប់មកមន្ទីរទេសចរណ៍ ដើម្បីឱ្យមន្ទីរប្រកាសដល់ភ្ញៀវដែលគ្មានកន្លែងស្នាក់នៅ អាចស្នាក់បណ្ដោះអាសន្នបាន ។
លោកថា ៖« រឿងខ្វះបន្ទប់ស្នាក់នៅសម្រាប់ភ្ញៀវមកលេងនៅខេត្តព្រះសីហនុ មិនមែនទើបតែកើតឡើងនៅពេលថ្មីៗដូចការចុះផ្សាយពីសារព័ត៌មានមួយចំនួនថា ចិនបានជួលផ្ទះសំណាក់ និងសណ្ឋាគារបើកកាស៊ីណូទេ គឺបញ្ហានេះបានកើតឡើងយូរមកហើយ ហើយការវិនិយោគទៅលើសណ្ឋាគារ និងផ្ទះសំណាក់ក៏មានជាហូរហែដែរ តែមិនអាចឆ្លើយតបទៅនឹងតម្រូវការភ្ញៀវមកទស្សនាកម្សាន្តគ្រប់គ្រាន់ » ។
លោកបន្ថែមថា បច្ចុប្បន្ន បន្ទប់ផ្ទះសំណាក់ និងសណ្ឋាគារនៅខេត្តព្រះសីហនុ សរុបមានចំនួនជាង១ម៉ឺនបន្ទប់ ប៉ុន្តែភ្ញៀវទៅទស្សនារាប់ម៉ឺននាក់ ។ ដូចនេះ នៅថ្ងៃអនាគត មន្ទីរទេសចរណ៍ ព្រមទាំងថ្នាក់ដឹកនាំខេត្តទាំងមូលនឹងសាងសង់បន្ទប់ស្នាក់នៅបណ្ដោះអាសន្ន ដោយស្វែងរកដីទំនេរសង់ជារោងហើយបាំងជាបន្ទប់ៗ រួចតបណ្ដាញទឹកភ្លើងសម្រាប់ទទួលភ្ញៀវមកលេងនៅរដូវបុណ្យទានម្ដងៗដូចជា បុណ្យចូលឆ្នាំសកល ចូលឆ្នាំខ្មែរ និងភ្ជុំបិណ្ឌជាដើម ដើម្បីដោះស្រាយបញ្ហាខ្វះបន្ទប់មួយគ្រាៗ រួចហើយរុះរើទុកវិញ និងចាំសង់ពេលមានបុណ្យទានម្ដងទៀត ។
ប្រធានមន្ទីរទេសចរណ៍ខេត្តមាត់សមុទ្រមួយនេះបានបញ្ជាក់ថា ៖« ឆ្នាំនេះ ក្រុមការងារសុវត្ថិភាព និងសណ្ដាប់ធ្នាប់បានដាក់តម្រៀបគ្នានៅតាមតំបន់គោលដៅនានាដើម្បីការពារសុវត្ថិភាព និងសណ្ដាប់ធ្នាប់ដល់ភ្ញៀវទេសចរដែលកម្សាន្តនៅខេត្តព្រះសីហនុ ។ ឆ្នាំនេះ មិនមានបាតុភូតណាមួយកើតឡើងគួរឲ្យកត់សម្គាល់ទេ » ។
គួរបញ្ជាក់ថា ខេត្តផ្សេងៗទៀតជាគោលដៅទេសចរណ៍ដូចជា ខេត្តបាត់ដំបង កំពត បន្ទាយមានជ័យ កំពង់ធំ រតនគិរី និងក្រចេះ ក៏ទទួលបានកំណើនភ្ញៀវទេសចរទៅទស្សនាកម្សាន្តក្នុងឱកាសបុណ្យភ្ជុំបិណ្ឌច្រើនដែរ ដោយសារតែតំបន់ទាំងនោះមានហេដ្ឋារចនាសម្ព័ន្ធផ្លូវស្អាតល្អ ភ្ជាប់ពីផ្លូវជាតិទៅដល់រមណីយដ្ឋានទេសចរណ៍តែម្ដង ទើបភ្ញៀវទេសចរសម្រុកទៅលេងនៅទីនោះ ខណៈតំបន់រមណីយដ្ឋានផ្សេងទៀត ដែលកាលពីមុនមានកំណើនភ្ញៀវច្រើននោះបានធ្លាក់ចុះ ពីព្រោះពួកគេស្វែងរកតំបន់ថ្មីៗសម្រាប់កម្សាន្ត ៕
ចែករំលែកព័តមាននេះ