រាជធានីភ្នំពេញ ៖ យុវជន២នាក់ពេលចេញពីធ្វើការជិះម៉ូតូឌុបមិត្តភ័ក្ដិជូនទៅផ្ទះវិញ ក៏ស្រាប់តែត្រូវបានជនសង្ស័យមិនស្គាល់មុខ ដែលមានគ្នាជាច្រើននាក់ បានធ្វើសកម្មភាពជិះម៉ូតូដេញធាក់ផ្ដួល ហើយក៏ទាញកាំបិ.តគំរា.ម រួចលើកយកម៉ូតូរបស់ជនរងគ្រោះជិះរត់គេចខ្លួនបានសម្រេច បង្កឲ្យមានការភ្ញាក់ផ្អើលកាលពីវេលាម៉ោង១និង៤៥នាទីរំលងអធ្រាត្រឈានចូលថ្ងៃទី១៥ ខែមីនា ឆ្នាំ២០២៣ នៅតាមបណ្ដោយផ្លូវតាកន ស្ថិតក្នុងភូមិព្រៃព្រីងជើង សង្កាត់ចោមចៅទី៣ ខណ្ឌពោធិ៍សែនជ័យ។
ម៉ូតូរបស់ជនរងគ្រោះខាងលើម៉ាកហុងដាឌ្រីម ស៊េរី២០២១ ពណ៌ខ្មៅ ពាក់ស្លាកលេខ ភ្នំពេញ1IN-3514 ជិះមានគ្នាចំនួន២នាក់ ហើយជនរងគ្រោះសុំមិនបញ្ចេញឈ្មោះនោះទេ។
តាមប្រភពព័ត៌មានបញ្ជាក់ពីជនរងគ្រោះ បានអោយដឹងថា នៅមុនពេលកើតហេតុ ខ្លួន និងមិត្តភក្តិរបស់គាត់ បានចេញពីធ្វើការ (ការងារខាងដឹកជញ្ជូន) ដោយសុំមិនបញ្ចេញឈ្មោះរបស់ក្រុមហ៊ុន ហើយបានឌុបមិត្តភ័ក្ដិចេញពីបុរីឈូកវ៉ា២ ស្ថិតនៅសង្កាត់សំរោងក្រោម ជូនទៅផ្ទះនៅឯសង្កាត់ចោមចៅទី៣។ ខណៈពេលជិះម៉ូតូមកដល់ចំណុចផ្លូវបំបែកជាបួន ហៅផ្លូវតាកន ក្នុងទិសដៅពីលិចទៅកើត ហើយនៅចំណុចនោះគឺងងឹត ស្រាប់តែមានជនសង្ស័យជាច្រើននាក់ជិះម៉ូតូជាច្រើនគ្រឿងចេញពីផ្លូវងងឹតនោះ មកតាមពីក្រោយ ហើយក៏ធ្វើសកម្មភាពធាក់ម៉ូតូរបស់ជនរងគ្រោះ បណ្ដាលឲ្យដួលរលាត់ដៃ និងជើងតែម្តង ។
ប្រភពដដែលបន្តថា បន្ទាប់មក ខាងបក្សពួកជនសង្ស័យបានយកដុំថ្មគប់ពួកគាត់ ខ្លះទៀតយកកាំបិ.តគំរា.មប្រុងកា.ប់ធ្វើឲ្យជនរងគ្រោះ និងមិត្តភក្តិភ័យ ក៏នាំគ្នារត់គេចចោលម៉ូតូ ទើបបានឱកាសជនសង្ស័យលើកយកម៉ូតូជិះ រួចនាំគ្នារត់គេចខ្លួនបាត់ស្រមោលចេញពីកន្លែងកើតហេតុតែម្តង ទើបបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋបានទាក់ទងរាយការណ៍ប្ដឹងទៅសមត្ថកិច្ចមូលដ្ឋានភ្លាមៗ។
ក្រោយពេលកើតហេតុ ជនរងគ្រោះរត់ទៅដាក់ពាក្យបណ្ដឹងនៅប៉ុស្តិ៍រដ្ឋបាលសង្កាត់ចោមចៅទី៣ ដើម្បីអោយសមត្ថកិច្ចជួយអន្តរាគមន៍។ នៅពេលទទួលពាក្យបណ្ដឹងពីជនរងគ្រោះរួចរាល់ហើយ សមត្ថកិច្ចនឹងធ្វើការស្រាវជ្រាវរកមុខសញ្ញាជនសង្ស័យទាំងអស់នោះ យកមកផ្ដន្ទាទោសតាមផ្លូវច្បាប់នៅថ្ងៃក្រោយបន្តទៀត៕
ចែករំលែកព័តមាននេះ