CNRP ចង់ឲ្យមានវត្តមានលោក កឹម សុខា ក្នុងសវនាការសាលាឧទ្ធរណ៍នៅពេលខាងមុខនេះ
រាជធានីភ្នំពេញ៖ គណបក្សសង្គ្រោះជាតិបាននិងកំពុងទាមទារឲ្យមានវត្តមានលោក កឹម សុខា ប្រធានបក្សប្រឆាំងនៅក្នុងសវនាការនៅថ្ងៃទី
រាជធានីភ្នំពេញ៖ គណបក្សសង្គ្រោះជាតិបាននិងកំពុងទាមទារឲ្យមានវត្តមានលោក កឹម សុខា ប្រធានបក្សប្រឆាំងនៅក្នុងសវនាការនៅថ្ងៃទី២៦ ខែកញ្ញា ខាងមុខនេះ។ ការលើកឡើងនេះ បន្ទាប់ពីខាងពន្ធនាគារអះអាងថា ការបញ្ជូនមេបក្សប្រឆាំងរូបនេះពីពន្ធនាគារត្រពាំងផ្លុង គឺពិបាកក្នុងការថែរក្សាសន្តិសុខ ពេលបញ្ជូនជនសង្ស័យមកចូលរួមសវនាការខាងមុខនេះ ។
យោងតាមសេចក្តីថ្លែងការណ៍របស់ CNRP បានបង្ហាញជំហរចង់ឲ្យមានវត្តមានលោក កឹម សុខា ដែលត្រូវបានតុលាការសម្រេចឃុំខ្លួនបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ ។ សាលាឧទ្ធរណ៍នឹងបើកសវនានៅថ្ងៃទី២៦ ខែកញ្ញា ឆ្នាំ២០១៧ ដើម្បីដេញដោលលើបណ្តឹងរបស់ក្រុមមេធាវីការពារក្តីរបស់លោក កឹម សុខា ប្រឆាំងនឹងដីកាសម្រេចឃុំខ្លួនបណ្តោះអាសន្នរបស់ចៅក្រមស៊ើបសួរនៃសាលាដំបូងរាជធានីភ្នំពេញ។
សេចក្តីថ្លែងការណ៍ចុះថ្ងៃទី២៣ កញ្ញា បានបន្តថា យោងតាមលិខិតរបស់អគ្គនាយកដ្ឋានពន្ធនាគារលេខ៨៣៣ ល.ស ចុះថ្ងៃទី១៨ ខែកញ្ញា ឆ្នាំ២០១៧ ផ្ញើជូនអគ្គ ព្រះរាជអាជ្ញាសាលាឧទ្ធរណ៍ ដោយបានលើកហេតុផលអំពីការព្រួយបារម្ភចំពោះសន្តិសុខ សុវត្តិភាពក្នុងពេលដឹកជញ្ជូន និងក្នុងពេលមានវត្តមាននៅក្នុងសាលាឧទ្ធរណ៍ ដែលហេតុផលនេះត្រូវបានយកជាលេសក្នុងការធ្វើសវនាកាដោយគ្មានវត្តមានលោក កឹម សុខា ។ ប៉ុន្តែតាមការបញ្ជាក់របស់ក្រុមមេធាវីការពារក្តី បានឲ្យដឹងថា លោក កឹម សុខា មានបំណងយ៉ាងមុតមាំចូលរួមនៅក្នុងសវនាការខាងលើស្របតាមនីតិវិធីដែលបានកំណត់ ។
បើយោងតាមលោក ទូច ថារិទ្ធិ អ្នកនាំពាក្យសាលាឧទ្ធរណ៍អះអាងថា តាមស្មារតីសាលាឧទ្ធរណ៍ គឺចង់ឱ្យមានវត្តមានជនត្រូវចោទ កឹម សុខា ចូលរួមសវនាការខាងមុខនេះដែរ ប៉ុន្តែលោកបញ្ជាក់ថា ប្រសិនបើគ្មានវត្តមានជនត្រូវចោទនៅថ្ងៃនោះ ក៏មិនប៉ះពាល់នីតិវិធីដែរ ព្រោះជាសវនាការមុន អង្គសេចក្តីពាក់ព័ន្ធនឹងការស្នើសុំនៅក្រៅឃុំតែប៉ុណ្ណោះ ៕
ចែករំលែកព័តមាននេះ