ប្រទេសចិននៅតែគាំទ្រ រាជរដ្ឋាភិបាលកម្ពុជាពេញទំហឹង
រាជធានីភ្នំពេញ ៖ លោក លី យុនសាន សមាជិកគណអចិន្ត្រៃយ៍ការិយាល័យនយោបាយនៃគណៈកម្មាធិការមជ្ឈឹមបក្សកុម្មុយនីសចិនបានបញ្ជាក់ថា
រាជធានីភ្នំពេញ ៖ លោក លី យុនសាន សមាជិកគណអចិន្ត្រៃយ៍ការិយាល័យនយោបាយនៃគណៈកម្មាធិការមជ្ឈឹមបក្សកុម្មុយនីសចិនបានបញ្ជាក់ថា “ ប្រទេសចិននៅតែគាំទ្រពេញទំហឹងដែលរាជរដ្ឋាភិបាលកម្ពុជា និងគណបក្សប្រជាជនកម្ពុជា ដើម្បីបន្តការអភិវឌ្ឍន៍ជាតិ និងជំរុញជីវភាពរបស់ប្រជាជនកម្ពុជាឲ្យកាន់តែប្រសើរឡើង។ លោក អ៊ាង សុផល្លែត ជំនួយការសមេ្តចអគ្គមហាសេនាបតីតេជោ ហ៊ុន សែន បានប្រាប់ឲ្យដឹងក្រោយជំនួបថា លោក លី យុនសាន សមាជិកគណៈអចិន្ត្រៃយ៍ការិយាល័យនយោបាយនៃគណកម្មាធិការមជ្ឈឹមបក្សកុម្មុយនីសចិនបានមានប្រសាសន៍បែបនេះ នាព្រឹកថ្ងៃទី២០ ខែកញ្ញា ឆ្នាំ២០១៧នៅវិមានសន្តិភាព ក្នុងឱកាសដែលលោកចូលជួបសម្ដែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន ក្នុងឱកាសដែលលោកមកបំពេញទស្សនកិច្ចផ្លូវការនៅកម្ពុជា។
ជាក់ស្តែងការធ្វើទស្សនកិច្ចរបស់លោកជាលើកទី៣ នៅក្នុងព្រះរាជាណាចក្រកម្ពុជានៅពេលនេះ គឺជាការឆ្លុះបញ្ចាំងដល់មជ្ឈដ្ឋានអន្តរជាតិឃើញថា ប្រទេសកម្ពុជាជាមិត្តល្អ និងជាសមាជិកមហាគ្រួសាររបស់ប្រទេសចិន។ បើទោះបីជាស្ថិតក្នុងភាពមមាញឹកដោយសារប្រទេសចិនរៀបចំមហាសន្និបាតលើកទី១៩ នាថ្ងៃទី៨ ខែតុលា ខាងមុខនេះយ៉ាងណា ក៏គណៈប្រតិភូចិន នៅតែឆ្លៀតពេលបំពេញទស្សនកិច្ចនៅប្រទេសកម្ពុជា ព្រោះដំណើរទស្សនកិច្ចនាពេលនេះនឹងជួយជំរុញការអនុវត្តការងារនានាដែលថ្នាក់ដឹកនាំនៃប្រទេសទាំងពីរបានឯកភាពគ្នានាពេលកន្លងមក ក្នុងនោះមានដូចជាការនាំអង្ករទៅប្រទេសចិននាឆ្នាំ២០១៨ ការកសាងផ្លូវល្បឿនលឿនពីរាជធានីភ្នំពេញទៅកាន់ក្រុងព្រះសីហនុ និងគម្រោងកសាងអាកាសយានដ្ឋានក្នុងខេត្តសៀមរាបតែម្តង។ នៅក្នុងជំនួបនេះដែរសម្តេចតេជោ បានថ្លែងអំណរគុណដល់មិត្តចិនដែលបន្តគាំទ្រដល់កម្ពុជា និងបន្តផ្តល់ជំនួយសម្រាប់ការអភិវឌ្ឍន៍នៅកម្ពុជា។
ជាការឆ្លើយតបចំពោះការអញ្ជើញរបស់រដ្ឋាភិបាលចិន តាមរយៈលោក លី យុនសាន សម្តេចតេជោក៏បានជម្រាបជូនថា សម្តេចនឹងធ្វើដំណើរទស្សនកិច្ចទៅកាន់ប្រទេសចិននាពេលខាងមុខនេះ ដើម្បីចូលរួមក្នុងវេទិកាកិច្ចសន្ទនាបណ្តាគណបក្សនយោបាយនៅប្រទេសចិនផងដែរ។ បន្ទាប់ពីបញ្ចប់ជំនួបទ្វេភាគី សម្តេចអគ្គមហាសេនាបតីតេជោ ហ៊ុន សែន និងលោក លី យុនសាន ក៏បានអញ្ជើញធ្វើជាសាក្សីនៃការចុះហត្ថលេខាលើអនុស្សរណៈនៃការយោគយល់រវាងភាគីកម្ពុជានិងភាគីចិនមាន៦ចំណុចរួមមាន៖
ទី១- អនុស្សរណៈនៃការយោគយល់ស្តីពីការផ្លាស់ប្តូរទស្សនកិច្ចសិក្សានៃសហប្រតិបត្តិការរវាងគណបក្សកុម្មុយនីសចិន និងគណបក្សប្រជាជនកម្ពុជាដែលចុះហត្ថលេខារវាងលោក យស់ សុង និងលោក សុង ថរ រដ្ឋមន្ត្រីទំនាក់ទំនងអន្តរជាតិចិន។ ទី២- អនុស្សរណៈនៃការយោគយល់ស្តីពីការជំរុញទំនាក់ទំនង និងសហប្រតិបត្តិការរវាងអង្គការមិនមែនរដ្ឋាភិបាលនៃសាធារណរដ្ឋប្រជាមានិតចិន និងព្រះរាជាណាចក្រកម្ពុជារវាងអង្គការមិនមែនរដ្ឋាភិបាលចិន ដើម្បីទំនាក់ទំនងអន្តរជាតិនិងវេទិកាសម្ពន្ធសង្គមស៊ីវិលរបស់កម្ពុជាចុះហត្ថលេខាដោយលោក កឹម រត្នវិសិដ្ឋ ប្រធានក្រុមប្រឹក្សាភិបាលសង្គមស៊ីវិលជាមួយលោក លិវ កាយ៉ាង អគ្គលេខាធិការរងអង្គការមិនមែនរដ្ឋាភិបាលចិនទំនាក់ទំនងអន្តរជាតិ។ ទី៣-អនុស្សរណៈនៃការយោគយល់ស្តីពីការអនុវត្តគម្រោងលើកកម្ពស់ជីវភាពសម្រាប់ឆ្នាំ២០១៧-២០១៩ រវាងក្រសួងសុខាភិបាលនៃព្រះរាជាណាចក្រកម្ពុជា និងមូលនិធិចិនដើម្បីសន្តិភាព និងការអភិវឌ្ឍដែលចុះហត្ថលេខារវាងលោក ម៉ម ប៊ុនហេង រដ្ឋមន្ត្រីក្រសួងសុខាភិបាលជាមួយលោក លិវ កាយ៉ាង។
ទី៤-អនុស្សរណៈនៃការយោគយល់ស្តីពីការអនុវត្តគម្រោងលើកកម្ពស់ជីវភាពសម្រាប់ឆ្នាំ២០១៧-២០១៩ រវាងក្រសួងអប់រំយុវជន និងកីឡាកម្ពុជា ជាមួយមូលនិធិចិនដើម្បីសន្តិភាពនិងការអភិវឌ្ឍដែលចុះហត្ថលេខាដោយលោក ហង់ ជួនណារ៉ុន ជាមួយលោកលិវ កាយ៉ាន។ ទី៥-អនុស្សរណៈនៃការយោគយល់គ្នាស្តីពីកិច្ចសហការថតភាពយន្តឯកសាររវាងស្ថានីយទូរទស្សន៍មជ្ឈឹមចិន និងស្ថានីយទូរទស្សន៍ជាតិកម្ពុជាដែលចុះហត្ថលេខាដោយលោក ឃឹម វុទ្ធី ជាមួយលោក យូថុង និពន្ធនាយករងនៃទូរទស្សន៍មជ្ឈឹមចិន។ ទី៦-អនុស្សរណៈនៃការយោគយល់គ្នាស្តីពីសហប្រតិបត្តិការសិក្សាលើគម្រោងសាងសង់បណ្តាញទូរទស្សន៍ឌីជីថលទូទាំងប្រទេសកម្ពុជា រវាងក្រសួងព័ត៌មានកម្ពុជា និងទួរទស្សន៍យូណាន នៃសាធារណរដ្ឋប្រជាមានិតចិនដែលចុះហត្ថលេខាដោយលោក ហុក សុវណ្ណ ជាមួយលោក លីន ស៊ីយីង តំណាងទូរទស្សន៍យូណាន៕
ចែករំលែកព័តមាននេះ