ជិះម៉ូតូទៅផ្ទះពេលភ្ជុំ ត្រូវទឹកហូរបាត់កួចទាំងមនុស្ស និងម៉ូតូ
ខេត្តត្បូងឃ្មុំ ៖ បុរសម្នាក់ជាចុងភៅលក់សាច់អាំងនៅហាង«ចំប៉ីស» មានទីតាំងនៅជិតគល់ស្ពានគីហ្ស៊ុណា ក្នុងសង្កាត់វាលវង់
ខេត្តត្បូងឃ្មុំ ៖ បុរសម្នាក់ជាចុងភៅលក់សាច់អាំងនៅហាង«ចំប៉ីស» មានទីតាំងនៅជិតគល់ស្ពានគីហ្ស៊ុណា ក្នុងសង្កាត់វាលវង់ ក្រុងកំពង់ចាម បានបាត់បង់ជីវិតដោយសារតែជិះម៉ូតូ១គ្រឿងម៉ាកឌ្រីមសេ១២៥
ស៊េរី២០១៤ ពាក់ស្លាកលេខ កំពង់ចាម 1N-2212 ដោយជិះធ្លាក់ចូលទឹកទន្លេត្រង់ព្រែកតាខ្វាន់ នៅភូមិទួលគរ ឃុំទន្លេបិទ ស្រុកត្បូងឃ្មុំ។ ហេតុការណ៍នោះបានកើតឡើងនៅវេលាម៉ោង២រំលងអាធ្រាត្រ ឈានចូលព្រឹកថ្ងៃទី២០ កញ្ញា ២០១៧ ដោយបាត់ទាំងមនុស្ស និងម៉ូតូតែម្តង។
លោកវរសេនីយ៍ត្រី សេង ម៉ិ អធិការរងនគរបាលស្រុកត្បូងឃ្មុំ ប្រាប់ឲ្យដឹងថា ក្រោយពីបានបំពេញការងារនៅហាងខាងលើចប់នោះចុងភៅឈ្មោះ ប៉ូច ប៉ាវ ភេទប្រុស អាយុ២៤ឆ្នាំ រស់នៅភូមិកំពង់ស្តីលើ ឃុំកំពង់រាប ស្រុកកោះសូទិន ខេត្តកំពង់ចាម និងឈ្មោះ ធូ ចាន់ឌី ភេទប្រុស អាយុ២៨ឆ្នាំ នៅភូមិចុងព្រែក ឃុំមហាលាភ ស្រុកកោះសូទិន នាំគ្នាផឹកស្រាបៀរ ក្រោយពីចប់ការលក់ដូរនៅវេលាម៉ោង១២យប់នោះ នៅក្នុងទឹកដីក្រុងកំពង់ចាម។
លោកវរសេនីយ៍ត្រី សេង ម៉ិ អធិការរងនគរបាលស្រុកត្បូងឃ្មុំ ប្រាប់បន្តថា បន្ទាប់មកអ្នកទី១បានជិះម៉ូតូឌុបអ្នកទី២ ឆ្លងកាត់តាមស្ពានគីហ្ស៊ុណា ដើម្បីទៅផ្ទះម្តាយនៅស្រុកកំណើតខាងកោះសូទិនក្នុងគោលបំណងចូលរួមភ្ជុំបិណ្ឌនឹងគេ។ ស្របពេលដែលមកដល់ត្រង់ព្រែកតាខ្វាន់ ឃុំទន្លេបិទនោះក៏បានឲ្យអ្នកនៅពីក្រោយចុះដើរ ចំណែកឈ្មោះ ប៉ាវ ជិះតែម្នាក់ឯងកាត់តាមទំនប់បង្ហៀរបេតុងដែលមានទឹកទន្លេកំពុងតែហូរកាត់នោះ ក៏បានប៉ើងម៉ូតូ និងមនុស្សលិចចូលទៅក្នុងទឹកបាត់ ហើយអ្នកនៅពីក្រោយក៏បានឆោឡោរត់ទៅប្រាប់អ្នកស្រុកក្បែរនោះ និងសមត្ថកិច្ចប៉ុស្តិ៍រដ្ឋបាលឃុំទន្លេបិទ ដើម្បីឲ្យជួយមកតាមរកមនុស្សដែលបាត់ទាំងយប់ តែរកមិនឃើញនោះទេ។
លុះព្រឹកឡើងថ្ងៃទី២០ កញ្ញា ក្រុមសាច់ញាតិបានជួលខ្មែរឥស្លាមតាមរកសព ដំបូងបានរកឃើញម៉ូតូ នៅក្បែរកន្លែងដែលទឹកហូរលិចនោះ សកម្មភាពចេះតែតាមរកបន្តទៀត តែមិនឃើញអ្នកបើកម៉ូតូនោះទេ។ លោកវរសេនីយ៍ត្រី សេង ម៉ិ អធិការរងនគរបាលស្រុកត្បូងឃ្មុំ បញ្ជាក់ថា រហូតមកដល់វេលាម៉ោង៦ និង១៥នាទីព្រឹក ថ្ងៃទី២១ កញ្ញា ទើបខ្មែរឥស្លាមបានរកសពឃើញចម្ងាយពីកន្លែងកើតហេតុប្រមាណ២០០ម៉ែត្រ។ ហើយសមត្ថកិច្ចបានប្រគល់សពឲ្យទៅសាច់ញាតិ ដើម្បីចាត់ចែងយកទៅធ្វើបុណ្យតាមប្រពៃណីផងដែរ។ នេះជាលើកទី១ហើយដែលមានអ្នកជិះម៉ូតូឆ្លងកាត់ទំនប់បង្ហៀរទឹកព្រែកតាខ្វាន់ត្រូវបានទឹកទន្លេហូរប៉ើងមនុស្សស្លាប់បែបនេះ៕
ចែករំលែកព័តមាននេះ