បាក់ហោជាងផ្ទះល្វែងសង្កត់ក្មេងស្រីម្នាក់ស្លា.ប់ និងម្នាក់ទៀតរងរបួសធ្ងន់
រាជធានីភ្នំពេញ ៖ ពិតជារឿងចៃដន្យខ្លាំងណាស់ដែលហោជាងផ្ទះល្វែងមួយកន្លែង ពេលណាៗមិនព្រមបាក់ធ្លាក់មកសោះ
រាជធានីភ្នំពេញ ៖ ពិតជារឿងចៃដន្យខ្លាំងណាស់ដែលហោជាងផ្ទះល្វែងមួយកន្លែង ពេលណាៗមិនព្រមបាក់ធ្លាក់មកសោះ ស្រាប់តែខណៈមានក្មេងស្រី២នាក់កំពុងឈរនៅខាងក្រោមនោះមើលអ្នកភូមិចាប់ត្រីនិងក្ដាមខ្យងដោយមិនដឹងខ្លួនសោះ ពេលមេឃកំពុងធ្លាក់ភ្លៀងលាយឡំជាមួយខ្យល់ផងនោះ ស្រាប់តែផ្ទាំងហោជាងនោះបានបាក់ធ្លាក់តាំងពីជាន់ទី៣ ចុះមកសង្កត់ក្មេងស្រីទាំង២នាក់ បណ្ដាលឲ្យស្លាប់ម្នាក់ភ្លាមៗនៅនឹងកន្លែង និងម្នាក់ទៀតបានរងរបួសយ៉ាងធ្ងន់ធ្ងរ ហើយត្រូវបានក្រុមគ្រួសារនាំទៅសង្គ្រោះបន្ទាន់នៅមន្ទីរពេទ្យកាល់ម៉ែត។ ហេតុការណ៍នេះបានបង្កឲ្យមានការភ្ញាក់ផ្អើលឡើង កាលពីវេលាម៉ោង៤ល្ងាច ថ្ងៃទី២១ ខែកញ្ញា ឆ្នាំ២០១៧ នៅចំណុចផ្ទះល្វែងខាងលើនោះដែលមានទីតាំងស្ថិតនៅតាមបណ្ដោយផ្លូវបេតុង ភូមិចំការឪឡឹក សង្កាត់កាកាប២ ខណ្ឌពោធិសែនជ័យ រាជធានីភ្នំពេញ។
ក្មេងស្រីដែលរងគ្រោះដល់ស្លាប់ក្រោមផ្ទាំងវ៉េរ៉ង់ដានោះត្រូវបានគេស្គាល់ឈ្មោះថា កែវ វណ្ណាដានេ អាយុ១៤ឆ្នាំ។ ដោយឡែកក្មេងស្រីម្នាក់ទៀតដែលរបួសធ្ងន់ធ្ងរបំផុតនោះឈ្មោះ កូវ គីមស្រ៊ុន អាយុ១៤ឆ្នាំដូចគ្នា ហើយពួកនាងទាំង២នាក់នេះ មានទីលំនៅជិតកន្លែងកើតហេតុនោះដែរ និងត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត ហើយមិនទាន់ដឹងថានាងមានសភាពបែបណានៅឡើយទេ។ តាមប្រភពព័ត៌មានបានឲ្យដឹងថា នៅមុនពេលកើតហេតុខាងលើ មេឃបានធ្លាក់ភ្លៀងលាយឡំជាមួយខ្យល់ផងហើយក្មេងស្រីរងគ្រោះទាំងពីរនាក់បាននាំគ្នាងូតទឹកភ្លៀង ព្រមទាំងរត់លេងកាត់ភ្លៀងជាមួយនឹងក្មេងៗដទៃទៀតនៅក្នុងភូមិជាមួយគ្នាដែរ។ បន្ទាប់មកពួកនាងទាំងពីរនាក់ បានទៅឈរនៅមុខផ្ទះល្វែងមួយនោះ មើលអ្នកភូមិដើរចាប់ត្រី និងរកក្ដាមខ្យង នៅតាមផ្លូវដែលមានទឹកលិច។
លុះមួយសន្ទុះក្រោយមកក៏ស្រាប់តែហោជាងផ្ទះល្វែងខាងលើ ដែលសាងសង់មិនទាន់រួចហើយត្រូវគេទុកចោលនោះ បានបាក់ធ្លាក់ចុះមកសង្កត់ពួកនាង បណ្ដាលឲ្យស្លាប់ម្នាក់ភ្លាមៗនៅនឹងកន្លែង ចំណែកម្នាក់ទៀតបានរងរបួសធ្ងន់ធ្ងរ និងត្រូវបានបញ្ជូនទៅកាន់មន្ទីរពេទ្យកាល់ម៉ែតដើម្បីសង្គ្រោះបន្ទាន់។ ក្រោយពេលកើតហេតុបង្កឲ្យមានការភ្ញាក់ផ្អើលយ៉ាងខ្លាំង ហើយកម្លាំងនគរបាលប៉ុស្ដិ៍កាកាប២ និងនគរបាលព្រហ្មទណ្ឌខណ្ឌពោធិ៍សែនជ័យ បានចុះទៅកាន់ទីនោះធ្វើការពិនិត្យជាក់ស្ដែង ឃើញថាជនរងគ្រោះពិតជាបានស្លាប់ ដោយសារតែបាក់ធ្លាក់ហោជាងសង្កត់មែន គ្មានពាក់ព័ន្ធទៅនឹងអំពើឃាតកម្មណាមួយឡើយ ហើយសមត្ថកិច្ចបានប្រគល់សាកសពជូនក្រុមគ្រសារដើម្បីធ្វើបុណ្យតាមប្រពៃណី៕
ចែករំលែកព័តមាននេះ