ជនរងគ្រោះប្តូរឈ្មោះជាជនសង្ស័យ ព្រោះតែគំនុំ
ខេត្តកំពង់ស្ពឺ ៖ ព្រោះតែការគុំគួនដែលខ្លួនធ្លាប់រងនូវការគំរាមវាយធ្វើបាបពីសំណាក់ជនរងគ្រោះ ពេលនេះឃើញឱកាសល្អក៏កើតគំនិត
ខេត្តកំពង់ស្ពឺ ៖ ព្រោះតែការគុំគួនដែលខ្លួនធ្លាប់រងនូវការគំរាមវាយធ្វើបាបពីសំណាក់ជនរងគ្រោះ ពេលនេះឃើញឱកាសល្អក៏កើតគំនិតចង់ស្រាយកំហឹងដែលធ្លាប់មានពីមុនក៏យកដាវកាប់ទៅលើភាគីម្ខាងទៀតរយះហូរឈាមស្រោចខ្លួន ហើយគេចខ្លួនបាន១ថ្ងៃ ចុងក្រោយត្រូវសមត្ថកិច្ចឃាត់ខ្លួនបានតែម្តង។ ការឃាត់ខ្លួននេះធ្វើឡើងនៅរសៀលថ្ងៃទី១៧ កញ្ញា ២០១៧ នៅចំណុចព្រៃក្រោយភូមិតាមិញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។ ជនសង្ស័យឈ្មោះ ម៉ាន ម៉ន ភេទប្រុស អាយុ២៤ឆ្នាំ រស់នៅភូមិឃុំកើតហេតុខាងលើ។
លោកវរសេនីយ៍ទោ ប៊ុត ប៊ុនធឿន អធិការនគរបាលស្រុកឱរ៉ាល់បានឲ្យដឹងថា កាលពីវេលាម៉ោង២១ និង៣៥នាទី ថ្ងៃទី១៦ កញ្ញា ២០១៧ នៅចំណុចវត្តសង្កែសាទប ភូមិតាមិញ ឃុំសង្កែសាទប ស្រុកឱរ៉ាល់ មានរៀបចំពិធីតាមបែបប្រពៃណីភ្ជុំបិណ្ឌ ពេលនោះជនរងគ្រោះក៏ទៅចូលរួមដូចអ្នកផ្សេងទៀតដែរ ពេលកំពុងតែដើរលេងស្រាប់តែត្រូវជនសង្ស័យរួមនឹងបក្ខពួកលបកាប់ប្រហារដោយដាវចំគុម្ពត្រចៀកស្តាំបណ្តាលឲ្យរងរបួសជាទម្ងន់។ ក្រោយកើតហេតុសមត្ថកិច្ចបានបញ្ជូនជនរងគ្រោះមានឈ្មោះ រ៉ុម ត្រេន ភេទប្រុស ទៅពេទ្យខេត្តកំពង់ស្ពឺភ្លាមៗតែម្តង ដើម្បីឲ្យគ្រួពេទ្យជួយសង្គ្រោះ។
ចំណែកជនសង្ស័យក្រោយពេលបង្កបានរត់គេចខ្លួនបាត់។ ជនរងគ្រោះបានប្រាប់ថា មុនពេលកើតហេតុរូបគេ និងមិត្តភក្តិបានបាំគ្នាទៅលេងនៅវត្តតាសាល ពេលកំពុងដើរលេងសុខៗស្រាប់តែត្រូវគេលបមកកាប់ពីក្រោយបណ្តាលឲ្យដួលសន្លប់ឈាមហូរជោគខ្លួនហើយត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យសុខណាកំពង់ស្ពឺតែម្តង។ ជនរងគ្រោះបន្តថា រវាងរូបគេនឹងជនដៃដល់មិនដែលស្ទាក់ និងមានជម្លោះនឹងគ្នាពីមុនមកទេ។ គេស្នើឲ្យសមត្ថកិច្ចចាត់ការជនដៃដល់ដែលលបកាប់ប្រហារមកលើគេនេះទៅតាមផ្លូវច្បាប់។
រហូតដល់ព្រឹកថ្ងៃទី១៧ កញ្ញា ២០១៧ សមត្ថកិច្ចរបស់លោកស្វែងរក និងប្រទះឃើញជននេះកំពុងលាក់ខ្លួននៅក្នុងព្រៃដោយមានដាវសាំម៉ូរៃមួយផង។ នៅចំពោះមុខសមត្ថកិច្ចជនសង្ស័យបានឆ្លើយសារភាពថាមូលហេតុដែលខ្លួនសម្រេចចិត្តកាប់ប្រហារទៅលើជនរងគ្រោះនេះគឺដោយសារពីមុនខ្លួនក៏ធ្វើការនៅក្រុមហ៊ុនភ្នំពេញស៊ូហ្គើដែរ។ ពេលនៅធ្វើការទីនោះខ្លួនតែងតែរងនូវការវាយធ្វើបាបពីសំណាក់ជនដែលគេកាប់នេះជារឿយៗ រហូតដល់ទ្រាំពុំបានក៏សម្រេចចិត្តឈប់ធ្វើការត្រលប់មកនៅផ្ទះវិញ។
មុនពេលកើតហេតុពេលដែលខ្លួនកំពុងដើរលេងនៅវត្តសង្កែសាទប ស្រាប់តែឃើញជនរងគ្រោះកំពុងដើរជាមួយមនុស្សម្នាក់ផ្សេងទៀតក៏សម្រេចចិត្តយកដាវដែលដាក់តាមខ្លួនទៅលបកាប់ពីក្រោយតែម្តង។ ការកាប់នេះព្រោះគេចង់សងសឹកគំនុំចាស់ដែលលាក់ទុកក្នុងខ្លួនជាយូរមកហើយ។ ជនសង្ស័យបន្តថា ក្រោយកាប់ហើយរូបគេបានរត់ទៅពួននៅព្រៃក្រោយភូមិដើម្បីរកឱកាសរត់ចេញទៅក្រៅទៀតតែពេលកំពុងពួនក៏ត្រូវសមត្ថកិច្ចចាប់ខ្លួនបានតែម្តង។ លោកអធិការបានប្រាប់ថា ក្រោយឃាត់ខ្លួនកម្លាំងរបស់លោកកំពុងកសាងសំណុំរឿងដើម្បីបញ្ជូនបន្តទៅកាន់ស្នងការដ្ឋាននគរបាលខេត្តឲ្យជំនាញចាត់ការតាមនីតិវិធី៕
ចែករំលែកព័តមាននេះ