ក្រុមហ៊ុនដឹកជញ្ជូនអ្នកដំណើរចំនួន០៦ បានប្តេជ្ញាសន្យាថា…
រាជធានីភ្នំពេញ ៖ បន្ទាប់ពីមានការអំពាវនាវរបស់រាជរដ្ឋាភិបាលដល់ក្រុមហ៊ុនដឹកអ្នកដំណើរទាំងអស់នៅថ្ងៃបុណ្យភ្ជុំបិណ្ឌខាងមុខនេះ មានក្រុមហ៊ុនចំនួន៦បានសន្យា
រាជធានីភ្នំពេញ ៖ បន្ទាប់ពីមានការអំពាវនាវរបស់រាជរដ្ឋាភិបាលដល់ក្រុមហ៊ុនដឹកអ្នកដំណើរទាំងអស់នៅថ្ងៃបុណ្យភ្ជុំបិណ្ឌខាងមុខនេះ មានក្រុមហ៊ុនចំនួន៦បានសន្យាមិនដំឡើងថ្លៃឈ្នួលក្នុងរដូវបុណ្យភ្ជុំបិណ្ឌនោះទេ។
ការសន្យានេះធ្វើឡើងក្នុងកិច្ចប្រជុំមួយកាលពីថ្ងៃទី១៤ ខែ កញ្ញា ឆ្នាំ២០១៦ ក្រោមលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញដឹកនាំកិច្ចប្រជុំបូកសរុបលទ្ធផលការងារត្រួតពិនិត្យការអនុវត្តច្បាប់ ស្តីពីចរាចរណ៍ផ្លូវគោកប្រចាំខែ ដោយមានការចូលរួមពីមន្ត្រីជាន់ខ្ពស់ក្រសួងសាធារណការ និងដឹកជញ្ជូន សមាជិកគណៈ កម្មាធិការសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនរាជធានីខេត្ត សមាគមដឹកជញ្ជូន ផ្លូវគោកកម្ពុជា (CAMTA) សមាគមរថយន្តក្រុងកម្ពុជា (CAMBA) និងក្រុមហ៊ុនដឹកជញ្ជូនផ្សេងទៀតមកពីវិស័យឯកជន។ នេះបើតាមបណ្តាញសង្គមហ្វេសប៊ុករបស់ក្រសួងសាធារណការ និងដឹកជញ្ជូន។
ទេសរដ្ឋមន្ត្រីបានអំពាវនាវដល់ក្រុមហ៊ុនដឹកជញ្ជូនអ្នកដំណើរទាំងអស់ សូមកុំដំឡើងថ្លៃឈ្នួលដឹកជញ្ជូនអ្នកដំណើរក្នុងឱកាសបុណ្យភ្ជុំបិណ្ឌនាពេលខាងមុខ ដើម្បីបង្កលក្ខណៈងាយស្រួលដល់ប្រជាពលរដ្ឋដែលធ្វើដំណើរទៅលេងស្រុកកំណើត និងគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយគ្រោះថ្នាក់ចរាចរណ៍នានាជូនប្រជាពលរដ្ឋ។
ក្នុងកិច្ចប្រជុំនោះដែរ លោកទេសរដ្ឋមន្ត្រីបានណែនាំឱ្យមន្ទីរសាធារណការ និងដឹកជញ្ជូនរាជធានី-ខេត្តចំនួនបី ដែលមិនទាន់មានសកម្មភាពកាត់ទ្រុងឡានឱ្យអនុវត្តវិធានការណ៍តាមផ្លូវច្បាប់ចំពោះយានយន្តដែលដឹកជញ្ជូនលើសទម្ងន់កម្រិតកំណត់ និងរថយន្តកែច្នៃខុសលក្ខណៈបច្ចកទេស ដើម្បីថែទាំផ្លូវថ្នល់ឱ្យមានគុណភាពប្រើប្រាស់បានយូរអង្វែង។
ជាការឆ្លើយតប ក្រុមហ៊ុនដឹកជញ្ជូនអ្នកដំណើរចំនួនប្រាំមួយបានប្តេជ្ញាមិនដំឡើង ថ្លៃឈ្នួលធ្វើដំណើរសម្រាប់ប្រជាពលរដ្ឋដែលធ្វើដំណើររនាឱកាសពិធីបុណ្យភ្ជុំបិណ្ឌនាពេលខាងមុខ ដើម្បីសម្រាលបន្ទុកចំណាយរបស់បងប្អូនប្រជាពលរដ្ឋក្នុងឱកាសពិធីបុណ្យភ្ជុំបិណ្ឌប្រពៃណីខ្មែរ ដែលក្រុមហ៊ុនទាំងនោះរួមមាន៖ ក្រុមហ៊ុនពន្លឺអង្គរ ក្រុមហ៊ុនវីរៈប៊ុនថាំ ក្រុមហ៊ុន Giant Ibis Transport ក្រុមហ៊ុន Ding Xing ក្រុមហ៊ុន ឡារីតា Express និង ក្រុមហ៊ុន មិហុង ផងដែរ។
សូមជម្រាបថា ជាលទ្ធផលនៃកិច្ចប្រជុំបានបង្ហាញឲ្យឃើញថា គ្រោះថ្នាក់ចរាចរណ៍ខែសីហា ឆ្នាំ២០១៧ មានចំនួន ២៨៥លើក បណ្តាលឲ្យស្លាប់ចំនួន ១៣៨នាក់ និងរបួសចំនួន៤០៩នាក់ ភាគច្រើននៅខេត្តកណ្តាល មានអ្នកស្លាប់១៧នាក់ ខេត្តកំពង់ធំ ១៥នាក់ និងខេត្តសៀមរាប១៣នាក់ ។ ចំនួនជនរងគ្រោះជាមធ្យមក្នុងមួយថ្ងៃ ស្លាប់ចំនួន៤.៤៥នាក់ និងរបួសចំនួន១៣.១នាក់៕
ចែករំលែកព័តមាននេះ