សាលាខេត្តកំពង់ឆ្នាំង ចេញសេចក្តីប្រកាសព័ត៌មានបញ្ជាក់
ខេត្តកំពង់ឆ្នាំង ៖ បន្ទាប់ពីមានការចុះផ្សាយជាបន្តបន្ទាប់ក្នុងសារព័ត៌មាន បណ្តាញសង្គម បានផ្សាយអំពីពាក្យបណ្តឹងគ្រួសារសព
ខេត្តកំពង់ឆ្នាំង ៖ បន្ទាប់ពីមានការចុះផ្សាយជាបន្តបន្ទាប់ក្នុងសារព័ត៌មាន បណ្តាញសង្គម បានផ្សាយអំពីពាក្យបណ្តឹងគ្រួសារសពរងគ្រោះដោយសារស្នាដៃមន្ត្រីសុរិយោដីស្រុកម្នាក់ បានយកគ្រឿងចក្រទៅឈូសផ្នូរសពប្តី និងជាឪពុក ជាចៅ រួចមក អ្នកនាំពាក្យសាលាខេត្តកំពង់ឆ្នាំង បានចេញលិខិតជូនដំណឹងមួយច្បាប់បញ្ជាក់ថា លោក សួង សែ ប្រធានការិយាល័យ រៀបចំដែននគរូបនីយកម្មសំណង់ និង សុរិយោដី ស្រុករលាប្អៀរ ពិតជាបានជួលគ្រឿងចក្រទៅឈូសឆាយផ្នូរសព អតីតមន្ត្រីមន្ទីរពិតមែន។ រដ្ឋបាលសាលាខេត្តសូមធ្វើការ ខមាលទោស ចំពោះដួងវិញ្ញាណក្ខន្ធសព លោក នុត សុខុម មន្ទីរឧស្សហម្ម និងសិប្បកម្មខេត្តផងដែរ។ ក្នុងលិខិតរបស់រដ្ឋបាលសាលាខេត្ត ចុះថ្ងៃទី១១ ខែកញ្ញា ឆ្នាំ២០១៧ បានបញ្ជាក់ថា ក្រោយពីទទួលពាក្យបណ្តឹង របស់គ្រួសារសពរងគ្រោះ ក៏បានចាត់តាំងសមត្ថកិច្ចចម្រុះ រួមមានប្រធានមន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ច មន្ទីរមុខងារសាធារណៈ មន្ទីររៀបចំដែន ដីនគរូបនីយកម្មសំណង់ និងសុរិយោដី នាយកទីចាត់ការធនធានមនុស្ស នាយកទីចាត់ការអន្តរវិស័យ និងមន្ត្រីពាក់ព័ន្ធមួយចំនួនទៀត ដើម្បីចុះត្រួតពិនិត្យ និងស្រាវជ្រាវគ្រប់មុខសញ្ញា និងភាគីពាក់ព័ន្ធ។
ជាលទ្ធផលបានបង្ហាញថា ឈ្មោះ សួង សែ ពិតជាបានជួលគ្រឿងចក្រទៅឈូសកម្ទេចផ្នូរបញ្ចុះធាតុសព លោក នុត សុខុម អនុប្រធានមន្ទីរឧស្សហម្ម និងសិប្បកម្មខេត្ត ដោយចេតនា ព្រោះពុំមានសុំការអនុញ្ញាតត្រឹមត្រូវជាមុនពីប្រធានសមាគមន៍ចិន ដែលជាអ្នកគ្រប់គ្រងទីនោះឡើយ។ ក្រុមសមត្ថកិច្ចចម្រុះ បានពិនិត្យឃើញសកម្មភាពនេះ ប្រព្រឹត្តខុសទៅនឹងខ្លឹមសារច្បាប់មួយចំនួនដូចជា ក្រមព្រហ្មទណ្ឌ ត្រង់ជំពូកទី៥ ផ្នែកទី១ មាត្រា២៦១ដល់មាត្រា២៦៤ ,ច្បាប់ភូមិបាលឆ្នាំ២០០១ ជំពូកទី១៩ មាត្រា២៤៧ ដល់មាត្រា២៥០ និងច្បាប់ស្ត្រីពីលក្ខន្តិកៈរបស់មន្ត្រីរាជការស៊ីវិល ជំពូក៥ មាត្រា៣៥ចំណុច២។ រដ្ឋបាលសាលាខេត្ត សូមធ្វើការខមាលទោស ចំពោះដួងវិញ្ញាណក្ខន្ធសពលោក នុត សុខុម មន្ទីរឧស្សហម្ម និងសិប្បកម្មខេត្ត ដែលបានទទួលរងការប្រមាថ មើលងាយដ៏ធ្ងន់ធ្ងរនេះ និងសូមអភ័យទោសចំពោះគ្រួសារញាតិមិត្តនៃសព ដែលរដ្ឋបាលសាលាខេត្ត ក៏ដូចជាកម្លាំងសមត្ថកិច្ច មានការខ្វះខាតពុំមានទទួលព័ត៌មាន ដើម្បីចាត់វិធានការជួយការពារ ទប់ស្កាត់ឲ្យទាន់ពេលវេលា។
ជាមួយគ្នានេះដែរ អ្នកស្រី អឿ គឹមឡាយ ដែលជាភរិយាសព លោក នុត សុខុម បានសូមថ្លែអំណរគុណ ចំពោះការយកចិត្តទុកដាក់របស់ឯកឧត្តមអភិបាលខេត្ត ដែលបានជួយរកយុត្តិធម៌ ដោយឲ្យមន្ត្រីក្រោមឱវាទ ចុះស្រាវជ្រាវ ក្នុងករណីឈូសឆាយផ្នូរសពប្តីគាត់នេះ និងសូមសំណូមពរជាថ្មី ដល់ឯកឧត្តមអភិបាលខេត្ត សូមជួយជម្រុញឲ្យអ្នកឈូសឆាយផ្នូរសពប្តីគាត់ ដោះស្រាយសំណងឲ្យបានសមរម្យ និងចាត់វិធានការតាមផ្លូវច្បាប់ចំពោះបុគ្គលខាងលើនេះផង។ សូមបញ្ជាក់ដែរថា កន្លងទៅលោក សួង សែ ដែលរងការចោទប្រកាន់នេះធ្លាប់បានប្រាប់អ្នកសារព័ត៌មានថា ករណីឈូសឆាយផ្នូរសពខាងលើនេះ ជាកំហុសអចេតនាទេ ព្រោះលោកមិនដឹង៕
ចែករំលែកព័តមាននេះ