យីចេះទៅរួច… ប្តី-ប្រពន្ធនេះឈ្លោះតែគ្នាឯង… តែចង់សម្លា.ប់ម្តាយទៅវិញ
រាជធានីភ្នំពេញ ៖ បុរសម្នាក់ព្រោះតែខឹងម្តាយក្មេកដែលសង្ស័យថា
រាជធានីភ្នំពេញ ៖ បុរសម្នាក់ព្រោះតែខឹងម្តាយក្មេកដែលសង្ស័យថា ជាដើមចមនៃការបំបែកបំបាក់ខ្លួនជាមួយប្រពន្ធនោះ បានសម្រេចទិញកាំភ្លើងខ្លីពីប្រទេសថៃ មកប៉ុនប៉ងបាញ់សម្លាប់ម្តាយក្មេក ប៉ុន្តែមិនសម្រេច បានបង្កការភ្ញាក់ផ្អើល កាលពីវេលាម៉ោង១២ថ្ងៃត្រង់ថ្ងៃទី១២ កញ្ញា ស្ថិតនៅចំណុចផ្ទះជួលក្នុងភូមិត្នោតជ្រំ៣ សង្កាត់បឹងទំពុន២ ខណ្ឌមានជ័យ ។
ជនសង្ស័យខាងលើឈ្មោះអ៊ុត បុរី អាយុ២៦ឆ្នាំ ជាកម្មកររោងចក្រ ស្នាក់នៅក្រុងតាខ្មៅ ខេត្តកណ្តាល មានស្រុកកំណើតនៅភូមិទួលសាលា ឃុំជ្រុងពពេល ស្រុករំដួល ខេត្ដស្វាយរៀង ។ ដោយឡែក ស្ត្រីជាប្រពន្ធឈ្មោះស៊ឹម ចាន់លីដា អាយុ២៤ឆ្នាំ ជាកម្មកររោងចក្រ ស្នាក់នៅភូមិត្នោតជ្រុំ៣ សង្កាត់បឹងទំពុន ខណ្ឌមានជ័យ មានស្រុកកំណើតនៅភូមិដើមមាន សង្កាត់ដើមមាន ក្រុងតាខ្មៅ ខេត្ដកណ្ដាល ។
មន្ត្រីសមត្ថកិច្ចឱ្យដឹងថា ជនសង្ស័យនិងស្ត្រីជាប្រពន្ធស្នាក់នៅជាមួយគ្នាក្នុងបន្ទប់ផ្ទះជួលនៅក្រុងតាខ្មៅ ហើយអ្នកទាំង២ឧស្សាហ៍ឈ្លោះប្រកែកគ្នា ច្រើនលើកច្រើនសារផងដែរ ។ ប៉ុន្តែក្រោយកើតមានជម្លោះជារឿយកន្លងមក ស្ត្រីជាប្រពន្ធបានចាកចេញពីប្តីមករស់នៅជាមួយម្តាយបង្កើតនៅសង្កាត់បឹងទំពុន២ ខណ្ឌមានជ័យ ។ ។
តាមចម្លើយសារភាពរបស់ជនសង្ស័យថា ប្រពន្ធតែងចាកចេញពីខ្លួនទៅនៅជាមួយម្តាយក្មេកបែបនេះ២ទៅ៣លើកហើយ បន្ទាប់ពីឈ្លោះប្រកែកគ្នាម្តងៗ ដោយជឿតាមពាក្យសម្តីរបស់ម្តាយ ។ ជនសង្ស័យបន្តថា មុន១ខែ ក្រោយកើតមានចិត្តខឹងរហូតប៉ុនប៉ងបាញ់សម្លាប់ម្តាយក្មេកបែបនេះ គឺប្រពន្ធរបស់ខ្លួនបានចាកចេញពីខ្លួនម្តងទៀត ទៅរស់នៅជាមួយម្តាយអស់រយៈពេល១ខែ ក្រោយកើតជម្លោះជាថ្មី ហើយនាងក៏ពុំព្រមត្រឡប់មករួមរស់ជាមួយបុរសជាប្តីវិញឡើយ។
បន្ទាប់ពីប្រពន្ធមិនព្រមត្រឡប់មករួមរស់ជាមួយវិញហើយនោះ ជនសង្ស័យជាប្តីបានគិតថា ម្តាយក្មេកគឺជាដើមចមតែមួយ នៃការបំបែកបំបាក់ខ្លួននិងប្រពន្ធ ទើបរូបគេសម្រេចចិត្តទៅប្រទេសថៃ ទិញកាំភ្លើងខ្លីមួយដើម ម៉ាកប៉េអាម៉ាប់ ប៉ុនប៉ងទៅបាញ់សម្លាប់ម្តាយក្មេកដល់ផ្ទះ ។ កំឡុងពេលទៅដល់ផ្ទះម្តាយក្មេក ជនសង្ស័យបានបបួលស្ត្រីជាប្រពន្ធឱ្យត្រឡប់ទៅផ្ទះវិញជាមួយខ្លួន ប៉ុន្តែត្រូវស្ត្រីជាប្រពន្ធបដិសេធ ជាហេតុនាំអោយជនសង្ស័យទាញកាំភ្លើងចេញពីចង្កេះ ប៉ុនប៉ងបាញ់សម្លាប់ស្ត្រីជាម្តាយក្មេក ប៉ុន្តែសំណាងល្អពេលនោះ កាំភ្លើងរបស់ជនសង្ស័យបាញ់មិនចេញគ្រាប់ នាំឱ្យស្ត្រីជាប្រពន្ធស្ទុះទៅប្រតាយប្រតប់ជាមួយជនសង្ស័យ ដើម្បីដណ្តើមកាំភ្លើង ។ ស្របពេលជាមួយគ្នានោះដែរ កម្លាំងសមត្ថកិច្ចដែលកំពុងល្បាតក្នុងមូលដ្ឋានបានប្រទះឃើញ ក៏ចូលទៅចាប់ឃាត់ជនសង្ស័យ និងអាវុធខ្លីបានភ្លាមៗតែម្តង បញ្ចូនមកកាន់ប៉ុស្តិ៍រដ្ឋបាលនគរបាលបឹងទំពុន ដើម្បីបន្តនីតិវិធី ។
សូមបញ្ជាក់ថា កាំភ្លើងរបស់ជនសង្ស័យម៉ាកប៉េអាម៉ាប់ មានគ្រាប់ចំនួន៨ ហើយកាំភ្លើងនេះរូបគេ ទើបតែទិញមកពីប្រទេសថៃបាន៦ថ្ងៃ ។ បច្ចុប្បន្ន និងវត្ថុតាងត្រូវឃុំខ្លួនបណ្តោះអាសន្ន នៅប៉ុស្តិ៍រដ្ឋបាលនគរបាលបឹងទំពុន រងចាំកសាងសំណុំរឿងបញ្ចូនទៅតុលាការ ។
ចែករំលែកព័តមាននេះ