ឯកអគ្គរដ្ឋទូតអាមេរិកប្រចាំកម្ពុជា ៖ ខ្ញុំគ្មានការភ្ញាក់ផ្អើល…រឿងចាប់ខ្លួនលោក កឹម សុខា
រាជធានីភ្នំពេញ ៖ ឯកអគ្គរដ្ឋទូតអាមេរិកប្រចាំកម្ពុជា William (Bill) A. Heidt បានចេញសេចក្តីថ្លែងការណ៍មួយ
រាជធានីភ្នំពេញ ៖ ឯកអគ្គរដ្ឋទូតអាមេរិកប្រចាំកម្ពុជា William (Bill) A. Heidt បានចេញសេចក្តីថ្លែងការណ៍មួយ នៅថ្ងៃទី១២ ខែកញ្ញា ឆ្នាំ២០១៧ ថាលោកគ្មានការភ្ញាក់ផ្អើលនោះទេ ពាក់ព័ន្ធនឹងការទទួលបានព័ត៌មាននៃការចាប់ខ្លួនលោក កឹម សុខា ប្រធានគណបក្សសង្គ្រោះជាតិ ពីបទ “ក្បត់ជាតិ” ទាក់ទងនឹងអ្វីដែលលោកបាននិយាយ កាលពី៤ឆ្នាំមុន ។
លោក Heidt ដែលបានធ្វើសន្និសីទនៅស្ថាតទូតអាមេរិកបានថ្លែងថា ៖ “និយាយដោយត្រង់ទៅ ខ្ញុំគ្មានការភ្ញាក់ផ្អើលទាំងស្រុងនោះទេ នៅពេលខ្ញុំទទួលដំណឹងអកុសលនេះ ។ តែខ្ញុំមានការភ្ញាក់ផ្អើលចំពោះការចោទប្រកាន់ទៅលើសហរដ្ឋអាមេរិក ទាក់ទងនឹងការចាប់ខ្លួនលោក កឹម សុខា ដែលគ្មានភស្តុតាងច្បាស់លាស់ ឬគួរឲ្យទុកចិត្តបន្តិចណាសោះ” ។
លោកបានបន្តថា ៖ “វាគឺជាការចោទប្រកាន់មិនធម្មតា” ។ លោកបានបន្តថា ការងារទូតជាធម្មតាត្រូវបានធ្វើដោយប្រើភាសាដែលមានការប្រយ័ត្ន និងប្រកបដោយការគោរព… ។ ប្រទេសជាមិត្តនឹងគ្នាតែងតែរកមើលវិធីបំបាត់ការខ្វែងគំនិតគ្នា ។
សេចក្តីថ្លែងការណ៍របស់លោកឯកអគ្គរដ្ឋទូតអាមេរិក ធ្វើឡើងបន្ទាប់ពីទំនាក់ទំនងរបស់ប្រទេសទាំងពីរហាក់ស្ថិតក្នុងស្ថានភាពមិនសូវល្អ ក្រោយពីថ្នាក់ដឹកនាំរាជរដ្ឋាភិបាលបានរិះគន់ស្ថានទូតខ្លះតាំងខ្លួនជាម៉ែឪលើប្រទេសកម្ពុជា ជាមួយនឹងកាយវិការច្រងេងច្រងាង និងចោទស្ថានទូតនោះថា ជាមេខ្លោងរបស់ពួកប្រឆាំងនៅកម្ពុជាទៀតផង ៕
ចែករំលែកព័តមាននេះ