បើកសវនាការសំណុំរឿងក្រុមចោរកាំភ្លើងAK៩នាក់ប្លន់ថៅកែរោងម៉ាស៊ីនកិនស្រូវ
រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃ១២ ខែកញ្ញា បានលើកយកសំណុំរឿងក្រុមចោរកាំភ្លើងAK៩នាក់
រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃ១២ ខែកញ្ញា បានលើកយកសំណុំរឿងក្រុមចោរកាំភ្លើងAK៩នាក់ ប្លន់ថៅកែរោងម៉ាស៊ីនកិនស្រូវ នៅសង្កាត់ស្នោ ខណ្ឌពោធិ៍សែនជ័យ បាញ់ជនរងគ្រោះម្នាក់បណ្តាលឲ្យស្លាប់ មកបើកសវនាការផ្តន្ទាទោស ក្រោយពីឃុំខ្លួនជនត្រូវចោទអស់រយៈពេលច្រើនខែ ។
ជនជាប់ចោទទី១-ឈ្មោះ អ៊ី សោភ័ណ្ឌ ភេទប្រុស អាយុ៣២ឆ្នាំ, ទី២-ឈ្មោះ សាត ធីម ភេទប្រុស អាយុ៣៨ឆ្នាំ, ទី៣-ឈ្មោះ ស្វាយ តាក់ អាយុ៣៨ឆ្នាំ, ទី៤-ឈ្មោះ ស៊ុន ប៊ុនធឿន ភេទប្រុស អាយុ៣៥ឆ្នាំ, ទី៥-ឈ្មោះ សួង ធី ហៅឪ ភេទប្រុស អាយុ៣៥ឆ្នាំ, ទី៦-ឈ្មោះ អឿន សុផា ហៅផា ភេទប្រុស អាយុ៣៣ឆ្នាំ, ទី៧-ឈ្មោះ ហម ហាន ភេទប្រុស អាយុ៤៥ឆ្នាំ, ទី៨-ឈ្មោះ មាស ធីម ភេទប្រុស អាយុ៣៦ឆ្នាំ និងទី៩-ឈ្មោះ ភ័ណ ធំ ភេទប្រុស អាយុ៤៥ឆ្នាំ(មេក្លោងនឹងកំពុងរត់គេខ្លួន) ។
ជនជាប់ចោទត្រូវបានចោទប្រកាន់ពីបទ«ប៉ុនប៉ងលួច» យោងតាមមាត្រា២៧ មាត្រា៣៥៣ មាត្រា៣៥៧ និងបទ «លួចមានស្ថានទម្ងន់ទោសដោយមរណៈភាពនៃជនរងគ្រោះ» យោងតាមមាត្រា៣៦០ នៃក្រមព្រហ្មទណ្ឌ ។ សវនាការត្រូវបានប្រធានក្រុមប្រឹក្សាលើកពេលបន្តទៅថ្ងៃក្រោយទៀតដោយមិនកំណត់មិនទាន់សួរសាក្សីចប់សព្វគ្រប់នៅឡើយទេ ។
សូមរំលឹកថា ចោរប្លន់មួយក្រុមខាងលើប្រដាប់ដោយកាំភ្លើង AK បានចូលទៅធ្វើសកម្មភាពប្លន់ផ្ទះប្រជាពលរដ្ឋមួយកន្លែងដែលជាថៅកែរោងម៉ាស៊ីនកិនស្រូវដោយបានចាប់ជនរងគ្រោះចង និងយកស្កុតបិទមាត់ជាប់មិនឲ្យស្រែក ព្រមទាំងបានបាញ់ប្រហារទៅលើបុរសម្នាក់ដែលត្រូវជាបងប្អូនជីដូនមួយពេលរត់មកជួយក្រោយឭសំឡេងស្រែករបស់ជនរងគ្រោះហើយបណ្តាលឲ្យស្លាប់ម្នាក់ ។ ករណីប្លន់ប្រដាប់អាវុធនេះ បានបង្កឲ្យមានការភ្ញាក់ផ្អើលយ៉ាងខ្លាំង នៅយប់ថ្ងៃទី២៦ ខែធ្នូ ឆ្នាំ២០១៦ ស្ថិតនៅក្នុងភូមិ ព្រៃក្រាយ សង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ ហើយបុរសម្នាក់ដែលក្រុមចោរបាញ់ឲ្យរបួសធ្ងន់នោះ នៅព្រឹកថ្ងៃទី៣០ ខែធ្នូ ឆ្នាំ២០១៦ បានបាត់បង់ជីវិតដោយបន្សល់ទុកប្រពន្ធ និងកូនប្រុសស្រី៣នាក់ ។ ក្រុមចោរប្លន់ទាំងនេះត្រូវបានងនគរបាលនាយកដ្ឋានព្រហ្មទណ្ឌ នាយកដ្ឋានកណ្តាលសន្តិសុខ កម្លាំងមនគរបាលជំនាញរាជធានីភ្នំពេញ កម្លាំងនគរបាលស្រុកអង្គស្នួល ខេត្តកណ្តាល និងកម្លាំងនគរបាលខេត្តកំពង់ស្ពឺក្រោមការសម្របសម្រួលពីលោក លី សុផាណា ព្រះរាជអាជ្ញារងអមសាលាដំបូងរាជធានីភ្នំពេញបានចាប់ខ្លួនជាបន្តបន្ទាប់បានចំនួន៨នាក់ និងរត់រួចម្នាក់ឈ្មោះ ភ័ណ ធំ ជាមេខ្លោងម្នាក់ក្នុងការរៀបចំផែនការប្លន់ម្ដងៗ ៕
ចែករំលែកព័តមាននេះ