នាងអត់ចម្លើយចំពោះសំណួរនេះ… «ប្អូនជីដូនមួយរបស់ឯងប្រឡងជាប់ហើយ តើកូនឯងជាប់ដែរឬអត់?»
ខេត្តកណ្តាល ៖ ដោយលទ្ធផលនៃការប្រឡងបាក់ឌុបធ្លាក់ ធ្វើឱ្យបេក្ខជនម្នាក់បាក់ទឹកចិត្តនិងតូចចិត្តយ៉ាងខ្លាំង
ខេត្តកណ្តាល ៖ ដោយលទ្ធផលនៃការប្រឡងបាក់ឌុបធ្លាក់ ធ្វើឱ្យបេក្ខជនម្នាក់បាក់ទឹកចិត្តនិងតូចចិត្តយ៉ាងខ្លាំង
ខេត្តកណ្តាល ៖ ដោយលទ្ធផលនៃការប្រឡងបាក់ឌុបធ្លាក់ ធ្វើឱ្យបេក្ខជនម្នាក់បាក់ទឹកចិត្តនិងតូចចិត្តយ៉ាងខ្លាំង ព្រមទាំងមានការខ្មាសអៀនមិត្តភក្ដិ ជាពិសេសប្អូនជីដូនមួយរបស់ខ្លួនដែលប្រឡងតំណាលគ្នាដែរ ទទួលលទ្ធផលជាប់ ធ្វើឱ្យយុវតីម្នាក់គិតខ្លីលែងចង់រស់តទៅទៀត ។
អ្វីដែលនាងពិបាកឆ្លើយនោះគឺ ពេលម្ដាយបានសួរថា «ប្អូនជីដូនមួយរបស់ឯងប្រឡងជាប់ហើយ តើកូនឯងជាប់ដែរឬអត់?» តាមការសន្និដ្ឋានទំនងជានាងគិតថា នាងធ្វើឱ្យក្រុមគ្រួសារខកចិត្ត ទើបសម្រេចចិត្តធ្វើអត្តឃាតដោយចងកតែម្ដង ។ តាមពិតទៅជម្រើសនេះ មិនគប្បីជាគំរូទេ មិនមែនធ្លាក់តែឯងឯណា យើងអាចតស៊ូរៀន១ឆ្នាំទៀត ក៏មិនយឺតពេលដែរ ។ ហេតុការណ៍នេះ បានបង្កឱ្យមានការភ្ញាក់ផ្អើលឡើងកាលពីវេលាម៉ោង៦និង១៥នាទីល្ងាចថ្ងៃទី១០ ខែកញ្ញា នៅក្នុងភូមិត្រពាំងទួល ឃុំសំរោងលើ ស្រុកអង្គស្នួល ។
យុវតីដែលចងកសម្លាប់ខ្លួនឈ្មោះ អោក សុភាព អាយុ១៩ឆ្នាំ ឪពុកឈ្មោះ សយ អោក អាយុ៥២ឆ្នាំមុខរបរជាជាងប៉ះកង់ និងម្ដាយឈ្មោះ ឈុំ ឡឺង អាយុ៤៥ឆ្នាំ ជាកសិករ មានទីលំនៅក្នុងភូមិឃុំខាងលើ។ នាងបានធ្វើអត្តឃាត ដោយយកខ្សែនីឡុងចងកជាប់នឹងដែកចម្រឹងបង្អួចក្នុងបន្ទប់លើផ្ទះ ។
ម្តាយយុវតីរូបនេះបានប្រាប់នគរបាលថា នៅព្រឹកថ្ងៃទី១០ កញ្ញា គាត់បានទៅដាក់បិណ្ឌនៅវត្តមួយឯខេត្តតាកែវ ហើយមិនបានដឹងថា លទ្ធផលប្រឡងបាក់ឌុបរបស់កូនស្រីជាប់ឬក៏ធ្លាក់ឡើយ ព្រោះនាងមិនបានទូរស័ព្ទប្រាប់គាត់ទេ ។ រហូតដល់វេលាម៉ោង៤និង១០នាទីរសៀលថ្ងៃដដែល ក្រោយពេលត្រឡប់មកពីខេត្តតាកែវដល់ផ្ទះវិញ គាត់បានសួរទៅកូនស្រី ព្រោះអន្ទះសាចង់ដឹងលទ្ធផល ។ ពេលនោះនាងបានឆ្លើយទាំងទឹកមុខស្រងូតស្រងាត់តបមកគាត់វិញថា «មិនដឹងទេម៉ែ» ។
ស្ត្រីជាម្តាយរៀបរាប់ទៀតថា បន្ទាប់មកនាងបានហុចកាបូបដាក់លុយមួយឱ្យមកគាត់ទុកដាក់ រួចហើយឡើងទៅសម្ងំនៅលើផ្ទះដោយស្ងៀមស្ងាត់ លុះមួយសន្ទុះក្រោយមកទើបនាងប្រាប់គាត់ទៀតថា«ម៉ែខ្ញុំប្រឡងធ្លាក់ហើយ»។ ការនិយាយរបស់នាងគឺទាំងអួលដើមក ។ ចំណែករូបគាត់ជាម្ដាយទោះបីកូនស្រែកប្រាប់ថាប្រឡងធ្លាក់ក្ដី ក៏គាត់មិនបានស្ដីបន្ទោសមួយម៉ាត់ឡើយ ព្រោះតែកន្លងមកកូនខំប្រឹងរៀនដែរ ហើយបើប្រឡងធ្លាក់ទៀតក៏មិនដឹងថាបន្ទោសបានប្រយោជន៍អ្វីនោះទេ ។
ប្រភពដដែលបន្តថា គាត់មិននឹកស្មានថាកូនស្រីតូចចិត្តរហូតសម្លាប់ខ្លួនបែបនេះទេ ព្រោះគាត់គ្រាន់តែស្មានថានាងពិបាកចិត្តហើយទៅសម្ងំ និងចង់នៅស្ងៀមស្ងាត់តែម្នាក់ឯងប៉ុណ្ណោះ ។ប៉ុន្តែដោយបាត់កូនយូរពេកមិនឃើញចេញពីបន្ទប់ចុះមកក្រោម ធ្វើឱ្យមានការសង្ស័យ ទើបរូបគាត់និងក្រុមគ្រួសារនាំគ្នាឡើងទៅមើល ស្រាប់តែឃើញកូនស្រីចងកនឹងខ្សែនីឡុងភ្ជាប់នឹងចម្រឹងបង្អួចស្លាប់បាត់ទៅហើយ ។
ភ្លាមៗនោះក៏មានការភ្ញាក់ផ្អើលឆោឡោឡើង និងប្ដឹងទៅអាជ្ញាធរភូមិ ឃុំ ព្រមទាំងរាយការណ៍ទៅនគរបាលស្រុកអង្គស្នួលឱ្យចុះទៅពិនិត្យ ព្រោះនេះគឺជារឿងមួយគួរឱ្យមានការសោកស្ដាយបំផុត ដែលគាត់មិននឹកស្មានដល់ថាកូនស្រីហ៊ានធ្វើដល់ថ្នាក់នេះ ។មន្ត្រីនគរបាលបានឱ្យដឹងថា ក្រោយពីទទួលបានព័ត៌មាននោះ ក៏បានចុះទៅកាន់ទីនោះភ្លាមដែរ ដើម្បីពិនិត្យធ្វើកោសល្យវិច័យលើសព ។
ជាលទ្ធផលបង្ហាញថា យុវតីរូបនេះពិតជាចងកសម្លាប់ខ្លួនមែន មិនមានជាប់ពាក់ព័ន្ធនឹងអំពើឃាតកម្មណាមួយនោះឡើយ ។ ជាមួយគ្នានេះ បើតាមការរៀបរាប់របស់ស្ត្រីជាម្ដាយ គឺនាងចងកសម្លាប់ខ្លួនក៏ព្រោះតែតូចចិត្តនឹងលទ្ធផលប្រឡងបាក់ឌុបធ្លាក់ ដែលធ្វើឱ្យនាងមានការខ្មាសអៀនចំពោះប្អូនជីដូនមួយ ដែលប្រឡងជាមួយគ្នាជាប់ ជាពិសេសនាងគិតថា ធ្វើឱ្យក្រុមគ្រួសារខកចិត្តផងដែរ ។
នេះគឺជាមេរៀនមួយសម្រាប់ប្អូនៗ ក្មួយៗសិស្សានុសិស្សទាំងអស់ ត្រូវខិតខំប្រឹងប្រែងរៀនសូត្រ ដើម្បីពេលប្រឡងបានជាប់ ហើយទោះបីជាមិនជាប់ ក៏មិនត្រូវអស់សង្ឃឹមដល់ថ្នាក់ធ្វើរឿងបែបនេះឡើយ គឺត្រូវតែខំប្រឹងបន្តទៀតដើម្បីក្ដីសង្ឃឹមផ្ទាល់ខ្លួន និងក្រុមគ្រួសារទាំងមូលផងដែរ ។
ចែករំលែកព័តមាននេះ