ដំណោះស្រាយថ្មីរបស់ អ.ស.ប ប្រឆាំងកូរ៉េខាងជើង
តំណាងអចិន្ត្រៃយ៍រប្រចាំ អ.ស.ប លោកវ៉ាស៊ីលី នេបេនហ្ស៊ីយ៉ា វាយតម្លៃកាលពីថ្ងៃទី៥ កញ្ញា ថា
តំណាងអចិន្ត្រៃយ៍រប្រចាំ អ.ស.ប លោកវ៉ាស៊ីលី នេបេនហ្ស៊ីយ៉ា វាយតម្លៃកាលពីថ្ងៃទី៥ កញ្ញា ថា
ប្រទេសរុស្ស៊ី-ប្រទេសកូរ៉េខាងជើង ៖ តំណាងអចិន្ត្រៃយ៍របស់រុស្ស៊ីប្រចាំ អ.ស.ប លោកវ៉ាស៊ីលី នេបេនហ្ស៊ីយ៉ា វាយតម្លៃកាលពីថ្ងៃទី៥ កញ្ញា ថា ទិសដៅនៃការអនុម័តនាថ្ងៃទី១១ កញ្ញា របស់ក្រុមប្រឹក្សាសន្តិសុខ អ.ស.ប គម្រោងដំណោះស្រាយមួយស្តីពីកូរ៉េខាងជើងរបស់អាេមរិកជាការប្រញាប់ប្រញាល់ពេក ។
នៅទីស្នាក់ការ អ.ស.ប ឯកអគ្គរដ្ឋទូតរុស្ស៊ីរូបនេះថ្លែងទៅកាន់សារព័ត៌មានថា ខ្ញុំយល់ថា យើងពុំគួរធ្វើដោយប្រញាប់ប្រញាល់ពេកទេ ។
ចំណែកតំណាងអាមេរិកប្រចាំ អ.ស.ប លោកស្រី NIKKI HALEY និយាយថា ចង់ឱ្យក្រុមប្រឹក្សាសន្តិសុខធ្វើការអនុម័តនាថ្ងៃទី១១ កញ្ញា គម្រោងដំណោះស្រាយអាមេរិកដែលពង្រឹងទណ្ឌកម្មប្រឆាំងកូរ៉េខាងជើងក្រោយការសាកល្បងនុយក្លេអ៊ែរលើកទី៦របស់ប្រទេសនេះដែលខ្លាំងបំផុតមួយ ។ លោកស្រីទាមទារឱ្យមានវិធានការខ្លាំងបំផុតតាមដែលអាចធ្វើទៅបានប្រឆាំងក្រុងព្យុងយ៉ាង ។
ប្រមុខការទូតរុស្ស៊ី លោកស័រហ្គេយឡាវរ៉ូវ ថ្លែងថា ក្រុងមូស្គូ ត្រៀមសិក្សាគម្រោងដំណោះស្រាយអាមេរិកក្នុងលក្ខខណ្ឌដែលវាពុំធ្វើឱ្យធ្ងន់ធ្ងរថែមដល់ភាពតានតឹង ហើយចង់ផ្តោតលើដំណោះស្រាយការទូតមួយវិញ ។
ចំណែកប្រធានាធិបតីរុស្ស៊ី លោកវ្ល៉ាឌីមៀ ពូទីន កាលពីថ្ងៃទី៥ កញ្ញា យល់ថា ការដាក់ទណ្ឌកម្មបន្ថែមទៀតប្រឆាំងកូរ៉េខាងជើងនឹងពុំមានឥទ្ធិពលលើឥរិយាបថរបស់របបក្រុងព្យុងយ៉ាងឡើយ ហើយលោកស្នើឱ្យមានការចរចាចាំបាច់មួយ ។ លោកពូទីន យល់ថា បណ្តាទណ្ឌកម្មបន្ថែមនឹងពុំអាចផ្លាស់ប្តូរ ឥរិយាបថរបស់ថ្នាក់ដឹកនាំកូរ៉េខាងបជើងឡើយ ក៏ប៉ុន្តែផ្ទុយទៅវិញគ្រាន់តែនាំឱ្យមានសោកនាដកម្មមនុស្សធម៌ប៉ុណ្ណោះ ។
លោកពូទីន ក្រោយកិច្ចប្រជុំកំពូលរបស់ក្រុមប្រទេស BRICS នៅទីក្រុង XIAMEN ភាគអាគ្នេយ៍ចិន ក៏ព្រមានផងដែរប្រឆាំងនឹងវោហាសាស្ត្រយោធាដែលគ្មានន័យនៃវិបត្តិជុំវិញកម្មវិធីនុយក្លេអ៊ែរ និងបាលីស្ទិករបស់ក្រុងព្យុងយ៉ាង ។
លោកពូទីន បន្តថា គ្មានផ្លូវណាក្រៅពីផ្លូវសន្តិវិធីឡើយ ។ លោកថា អនុម័តទណ្ឌកម្មថ្មីៗជាផ្លូវគ្មានច្រកចេញ ។
ពួកអ្នកវិភាគជាច្រើននិយាយថា ដោយបង្កើនកម្មវិធីនុយក្លេអ៊ែរ និងបាលីស្ទិក មេដឹកនាំកូរ៉េខាងជើង លោកគីម ជុងអ៊ុន គិតទៅដល់វាសនាដែលលោកបានឃើញរបស់បណ្តារបបដែលយល់ព្រមបោះបង់ចោលកម្មវិធីគ្រឿងសព្វាវុធនុយក្លេអ៊ែររបស់ពួកគេដូចជារបបអីុរ៉ាក់របស់លោកសាដាម ហ៊ូសេន ឬរបបលីប៊ីរបស់លោកមូអាម៉ា កាដាហ្វី ជាដើម ។ ដូច្នេះលោកគីម ជុងអ៊ុន ត្រូវស្វែងរកការធានាជីវិតរស់រានដោយខំផលិតអាវុធនុយក្លេអ៊ែ រួចរហូតដល់អះអាងថា បែបនេះជាភាពត្រឹមត្រូវ និងជាការធានាដល់ការរស់រាននៃរបបរបស់លោក ៕
ចែករំលែកព័តមាននេះ