ផ្ទះមួយខ្នងត្រូវបានអគ្គិភ័យលេបត្របាក់ទាំងយប់
ខេត្តបន្ទាយមានជ័យ ៖ ផ្ទុះស្សេខ្សែភ្លើង បណ្តាលឆាបឆេះផ្ទះ១ខ្នង ឈើលើថ្មក្រោម អស់ទាំងស្រុងនៅវេលា
ខេត្តបន្ទាយមានជ័យ ៖ ផ្ទុះស្សេខ្សែភ្លើង បណ្តាលឆាបឆេះផ្ទះ១ខ្នង ឈើលើថ្មក្រោម អស់ទាំងស្រុងនៅវេលាម៉ោង៧នឹង៤០នាទីយប់ ថ្ងៃទី០៥ ខែកញ្ញា ឆ្នាំ២០១៧ ស្ថិតនៅសង្កាត់អូរអំបិល ក្រុងសិរីសោភ័ណ ។
ម្ចាស់ផ្ទះដែលត្រូវអគ្គិភ័យឆាបឆេះមានឈ្មោះ ឆុង ណាន់ ភេទប្រុស អាយុ៥២ឆ្នាំ (មុខងារសន្តិសុខផ្សារហ៊ុយឡេង) ប្រពន្ធឈ្មោះ ប៉ាន់ ស្រីម៉ៅ អាយុ៥១ឆ្នាំ (មុខរបរលក់បង្អែម) ដែលរស់នៅភូមិកើតហេតុខាងលើ ។
តាមសម្តីម្ចាស់ផ្ទះបានប្រាប់ថា ៖ នៅពេលដែលអគ្គិភ័យឆាបឆេះគឺគាត់នៅផ្ទះផ្នែកខាងក្រោយ ហើយស្នូរផ្ទុះជាន់ខាងលើ ឆាបឆេះភ្លាមៗ អ្នកជិតខាងជួយពន្លត់ដែរ តែជួយមិនបាន បណ្តាលឆាបឆេះរហូតអស់ស្ទើរទាំងស្រង់ ទើបរថយន្តពន្លត់អគ្គិភ័យមកដល់ ហើយជួយធ្វើអន្តរាគមន៍ជួយពន្លត់ តែមិនរាលដាលដល់អ្នកជិតខាង ។ ម្ចាស់ផ្ទះបញ្ជាក់ថា ៖ មូលហេតុដែលអគ្គិភ័យឆាបឆេះផ្ទះអស់ទាំងស្រុង គឺបណ្តាលមកពីផ្ទុះស្សេខ្សែភ្លើងនៅផ្នែកជាន់ខាងលើ ហើយបង្កឆាបឆេះឡើងអស់ទាំងស្រុងដែលផ្ទះមានបណ្តោយប្រវែងប្រមាណជាង៩ម៉ែត្រនិងទទឹងប្រមាណជាង៨ម៉ែត្រ ហើយខូចខាតទ្រព្យសម្បត្តិទាំងអស់ ។
មន្ត្រីនគរបាលពន្លត់អគ្គិភ័យស្នងការដ្ឋាននគរបាលខេត្តបន្ទាយមានជ័យបានប្រាប់ថា ៖ នៅពេលអគ្គិភ័យឆាបឆេះផ្ទះប្រជាពលរដ្ឋ បានទទួលព័ត៌មាន ហើយកម្លាំងជំនាញចេញរថយន្តពន្លត់អគ្គិភ័យចំនួន២គ្រឿងចេញអន្តរាគមន៍បាញ់ពន្លត់ តែជួយសង្គ្រោះបានផ្ទះអ្នកជិតខាងមិនបណ្តាលរាលដាល តែផ្ទះដែលបង្កឡើងឆេះអស់ស្ទើរទាំងស្រុង ព្រោះមកមិនទាន់ពេល ដោយអគ្គិភ័យបង្កឡើងរយះពេលខ្លី បណ្តាលឱ្យឆាបឆេះអស់។
មន្ត្រីនគរបាលជំនាញបានបញ្ជាក់ថា ៖ ក្រោយពេលឆាបឆេះស្រាវជ្រាវដឹងថា គឺបណ្តាលមកពីផ្ទុះស្សេខ្សែរភ្លើងផ្ទះជាន់ទី២ ហើយឆាបឆេះអស់ទ្រព្យសម្បត្តិស្ទើរទាំងស្រុង និងរថយន្តពន្លត់អគ្គិភ័យប្រើប្រាស់ទឹកអស់ចំនួន៣រថយន្ត ទប់ស្កាត់អគ្គិភ័យមិនបណ្តាលឱ្យរាលដាលបន្តទៀត ៕
ចែករំលែកព័តមាននេះ