តម្រូវការសាច់ជ្រូកកើនឡើងក្នុងរដូវភ្ជុំបិណ្ឌ តែតម្លៃជ្រូករស់…
រាជធានីភ្នំពេញ ៖ តម្រូវការសាច់ជ្រូកនៅកម្ពុជាពេលបច្ចុប្បន្ននេះមានកំណើនឡើងខ្ពស់ ខណៈ
រាជធានីភ្នំពេញ ៖ តម្រូវការសាច់ជ្រូកនៅកម្ពុជាពេលបច្ចុប្បន្ននេះមានកំណើនឡើងខ្ពស់ ខណៈរដូវកាលបុណ្យប្រពៃណីចូលមកដល់ ដែលពលរដ្ឋត្រូវការសាច់ជ្រូកច្រើន។ បើទោះបីជាតម្រូវការសាច់កើនឡើងក្ដី ប៉ុន្ដែបើពិនិត្យមើលពីតម្លៃជ្រូករស់ក្នុងស្រុក គឺមិនឡើងថ្លៃទេ ។
លោក ជេត ភីរម្យ អនុប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា ជាការពិតហើយ បច្ចុប្បន្ននេះតម្រូវការសាច់កើនឡើងមែន ព្រោះប្រជាពលរដ្ឋទូទាំងប្រទេសត្រូវការម្ហូបអាហារដើម្បីចូលរួមកាន់បិណ្ឌក្នុងរដូវកាលបុណ្យភ្ជុំ ។
លោកថា ៖« ដូចយើងធ្លាប់បានដឹងហើយនៅរដូវកាលបុណ្យភ្ជុំ តម្រូវការសាច់ជ្រូកកើនជាងរដូវកាលផ្សេងទៀត ហើយជាពិសេស នៅបុណ្យភ្ជុំផ្ទាល់តែម្តង ដែលពលរដ្ឋម្នាក់ៗត្រូវការសាច់ជ្រូកវេចអន្សម ធ្វើម្ហូបអាហារទៅវត្តទៅវ៉ា និងជួបជុំបងប្អូន អីចឹង សាច់ជ្រូកកើនឡើងខ្ពស់នៅពេលនោះហើយ » ។
លោកបន្តថា ទន្ទឹមនឹងតម្រូវការសាច់ជ្រូកកើនឡើងនៅកម្ពុជា ប៉ុន្ដែតម្លៃជ្រូករស់ក្នុងស្រុក មិនត្រឹមតែមិនកើនឡើងប៉ុណ្ណោះទេ ហើយវាបានធ្លាក់ចុះបន្តិចថែមទៀតនៅពេលបច្ចុប្បន្ននេះ។ យ៉ាងណាក៏ដោយ បើប្រៀបធៀបនឹងកាលពីប៉ុន្មានខែមុន តម្លៃជ្រូករស់របស់ខ្មែរបច្ចុប្បន្ននៅអាចទទួលយកបាន តែមិនទាន់អាចរកប្រាក់ចំណេញសម្រាប់អ្នកចិញ្ចឹមទេ។ វាគ្រាន់តែទប់ទល់នឹងការចំណាយថ្លៃដើមប៉ុណ្ណោះ។
អនុប្រធានរូបនេះបានឱ្យដឹងថា ការដែលជ្រូករស់ក្នុងស្រុក មិនអាចឡើងថ្លៃបាន ក៏ព្រោះតែបច្ចុប្បន្ន ការនាំចូលជ្រូករស់ពីប្រទេសជិតខាងនៅបន្តមានច្រើនជាងតម្រូវការក្នុងស្រុក ជាពិសេស ជ្រូកមកពីប្រទេសវៀតណាម ហើយជ្រូករបស់គេមានតម្លៃថោកជាងជ្រូកក្នុងស្រុក។ ដូចនេះ ជ្រូករស់របស់កសិករខ្មែរមិនអាចឡើងថ្លៃបានទេ ។
លោកថា ៖« កុងស៊ីកាប់ជ្រូកក្នុងស្រុក គេបានទទួលជ្រូកពីប្រទេសវៀតណាម ដែលឈ្មួញដឹកយកមកឲ្យដោយតម្លៃទាប។ អីចឹង យើងត្រូវតែទម្លាក់តម្លៃជ្រូកក្នុង ស្រុកឲ្យប្រហាក់ប្រហែលនឹងគេដែរ ទើបអាចលក់ចេញបាន បើមិនអីចឹងទេ ជ្រូកកសិករយើងនឹងនៅសល់ក្នុងកសិដ្ឋាន ។ ម្យ៉ាងទៀត ជ្រូកដែលគ្រប់អាយុហើយមិនព្រមចាប់នោះ នឹងធ្វើឲ្យម្ចាស់កសិដ្ឋានខាតបង់កាន់តែច្រើន » ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានលើកឡើងដែរថា ប្រជាពលរដ្ឋមិនបាច់ភ័យព្រួយរឿងតម្លៃជ្រូកនៅក្នុងរដូវកាលបុណ្យភ្ជុំទេ ព្រោះជ្រូកនឹងមិនឡើងថ្លៃទេ ថ្វីដ្បិតតម្រូវការកើនឡើងក្តី ។
លោកថា ៖« តម្រូវការសាច់ជ្រូកកើនឡើង នៅក្នុងស្រុកយើង តែការនាំចូលជ្រូករស់ពីប្រទេសជិតខាង ក៏កើនឡើងខ្លាំងដែរ ។ ដូចនេះ យើងមិនអាចធ្វើឲ្យជ្រូករស់របស់ប្រជាកសិករ និងម្ចាស់កសិដ្ឋាននៅក្នុងស្រុកឡើងថ្លៃបានទេ » ។
លោកបន្តថា នៅថ្ងៃធម្មតា តម្រូវការជ្រូកនៅក្នុងប្រទេសកម្ពុជា មានចន្លោះពី៦ទៅ៧ពាន់ក្បាលក្នុង១ថ្ងៃ ប៉ុន្តែនៅរដូវបុណ្យភ្ជុំ វាអាចកើនឡើងបន្ថែមទៀតប្រមាណ៣០០ទៅ៣៥០ក្បាល ។ ដូចនេះ តម្រូវការនៅពេលនេះ វានឹងកើនដល់ជាង១ម៉ឺនក្បាលក្នុង១ថ្ងៃ បូករួមទាំងជ្រូកក្នុងស្រុក ។ យ៉ាងណាក៏ដោយ គ្រាន់តែជ្រូករស់នាំចូលពីប្រទេសជិតខាង ជាពិសេស ពីវៀតណាម បើតាមតួលេខមានរហូតដល់៣ពាន់ក្បាលឯណោះក្នុង១ថ្ងៃ ។
បើតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានកំណត់ឱ្យមានការនាំចូលជ្រូកត្រឹមតែ១.២៥០ក្បាលប៉ុណ្ណោះក្នុង១ថ្ងៃ ដើម្បីឱ្យជ្រូករស់ក្នុងប្រទេសកម្ពុជាមានតម្លៃឡើងវិញ។ ប៉ុន្តែការកំណត់នេះហាក់គ្មានប្រសិទ្ធភាពទេ ព្រោះបើតាមការបញ្ជាក់របស់ប្រធានសមាគមឃើញថា ក្នុង១ថ្ងៃយើងបាននាំចូល៣ពាន់ក្បាលទៅហើយ ។ ដូចនេះ តម្លៃជ្រូករស់ក្នុងស្រុកពិតជាពិបាកឡើងថ្លៃ ៕
ចែករំលែកព័តមាននេះ