ខេត្តព្រៃវែង ៖ ក្រោយពីហេតុការណ៍អគ្គីភ័យបានឆាបឆេះលំនៅឋានប្រជាពលរដ្ឋដែលរស់នៅក្នុងភូមិស្ទឹងស្លូត ឃុំអ្នកលឿង ស្រុកពាមរក៍ អស់ចំនួន៤ខ្នង កាលពីវេលាម៉ោង៧និង៣០នាទីព្រឹកថ្ងៃទី២១ មេសា ឆ្នាំ២០១១កន្លងមកនោះ នៅរសៀលថ្ងៃដដែលព្រះចៅអធិការវត្តស្ទឹងស្លូត ព្រះនាមសាន រួស បានជួយឧបត្ថម្ភជាអង្ករ ចាន ឆ្នាំង ស្លាបព្រា និងថវិកាមួយចំនួនទៀត ក្នុងនាមមនុស្សធម៌ ។
ជនរងគ្រោះក្នុងនោះគ្រួសារលោកស្បោង រ៉ន និងប្រពន្ធឈ្មោះទូច វ៉ាង ដែលជាគ្រួសារក្រីក្រជាងគេទទួលបានថវិកា២៤៧.០០០រៀល អង្ករ៥០គីឡូក្រាម ចានកន្លះឡូ ឆ្នាំងបាយ២ ស្លាបព្រា១ឡូ ។ ឯគ្រួសាររងគ្រោះផ្សេងទៀត ក្នុង១គ្រួសារទទួលបានថវិកា១០ម៉ឺនរៀល ។ នេះជាសេចក្តីរាយការណ៍របស់ប្រជាពលរដ្ឋដែលរងគ្រោះដោយអគ្គីភ័យប្រាប់អ្នកយកព័ត៌មានកោះសន្តិភាពកាលពីព្រឹកថ្ងៃទី២២ មេសា ។
ដោយឡែក កាលពីរសៀលថ្ងៃទី២៣ ខែមេសា ឆ្នាំ២០១១ ក្រុមការងាររបស់គណបក្សប្រជាជនកម្ពុជា ដឹកនាំដោយលោកឧត្តមសេនីយ៍ទោថោង វរលក្ខណ៍ និងលោកជំទាវសៀង ធីតា រួមជាមួយនឹងសប្បុរសជនដែលជាក្រុមការងាររបស់គណបក្សប្រជាជនកម្ពុជា មានមេឃុំ មេភូមិ បាននាំយកអំណោយមានអង្ករ ទឹកត្រី ទឹកស៊ីអ៊ីវ រួមនឹងថវិកាមួយចំនួនទៅចែកជូនដល់គ្រួសាររងគ្រោះដោយអគ្គីភ័យទាំង៤គ្រួសារ ដោយមួយគ្រួសារៗទទួលបានអង្ករ២បាវ ស្មើនឹង១០០គីឡូក្រាម ទឹកត្រី១យួរ ទឹកស៊ីអ៊ីវ១យួរ និងថវិកាចំនួន២០ម៉ឺនរៀល។ ក្នុងឱកាសនោះដែរ លោកឧត្តមសេនីយ៍ទោ ថោង វរលក្ខណ៍ បានសន្យាជួយឧបត្ថម្ភស័ង្កសីដល់គ្រួសារដែលខ្វះខាតជាងគេ សម្រាប់យកទៅធ្វើជញ្ជាំងព្រោះគ្រួសារនេះពុំមានលទ្ធភាព ។ ប្រជាពលរដ្ឋរងគ្រោះដោយអគ្គីភ័យទាំងអស់បានថ្លែងអំណរគុណយ៉ាងជ្រាលជ្រៅដល់លោកឧត្តមសេនីយ៍ និងលោកជំទាវព្រមទាំងក្រុមការងារទាំងអស់ដែលបានជួយឧបត្ថម្ភនាពេលនេះ ៕
ចែករំលែកព័តមាននេះ