ទើបតែចេញពីគុក ឥឡូវចូលគុកវិញ
រាជធានីភ្នំពេញ ៖ ជនសង្ស័យជាមុខសញ្ញា
រាជធានីភ្នំពេញ ៖ ជនសង្ស័យជាមុខសញ្ញាកាច់.កម៉ូតូម្នាក់ត្រូវបានកម្លាំងសមត្ថកិច្ចផ្នែកព្រហ្មទណ្ឌនៃអធិការដ្ឋាននគរបាលខណ្ឌមានជ័យធ្វើការឃាត់ខ្លួនបានភ្លាមៗក្រោយធ្វើសកម្មភាពកាច់.កម៉ូតូពីប្រជាពលរដ្ឋ តែមិនបានសម្រេចកាលពីវេលាម៉ោង០៤និង២០នាទីល្ងាច ថ្ងៃទី០៣ ខែកញ្ញា ឆ្នាំ២០១៧ នៅតាមបណ្តោយផ្លូវ៣៧១ ស្ថិតក្នុងភូមិត្នោតជ្រុំ សង្កាត់បឹងទំពុន២ ខណ្ឌមានជ័យ ។
ជនសង្ស័យមានឈ្មោះ សុខ ចាន់ អាយុ២៧ឆ្នាំ មុខរបរ និងទីកន្លែងស្នាក់នៅមិនពិតប្រាកដ ។ ចំណែកជនរងគ្រោះឈ្មោះ ត.វ.ណ ភេទប្រុស អាយុ២៦ឆ្នាំ មុខរបរជាអ្នកបើករថយន្តដឹកអីវ៉ាន់ និងជាអ្នករត់ម៉ូតូឌុបផងដែរ មានទីលំនៅក្នុងខណ្ឌដង្កោ ។
លោកវរសេនីយ៍ ហួរ ម៉េងវ៉ាង អធិការរងនគរបាលខណ្ឌមានជ័យទទួលផែនព្រហ្មទណ្ឌបានឱ្យដឹងថា មុខកើតហេតុជនរងគ្រោះបានទុកម៉ូតូនៅមុខផ្ទះដែលខ្លួនដឹកអីវ៉ានយកមកឱ្យ ដោយពេលនោះរូបគេពុំបានចាក់សោរ.ក ម៉ូតូទុកចោល ។ លុះមកដល់វេលាខាងលើស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងមិនចាំម៉ាក បានជិះក្បែរ ហើយពេលនោះជនសង្ស័យម្នាក់បានធ្វើសកម្មភាពប្រើដែកអក្សរ T កាច់.កម៉ូតូជនរងគ្រោះបានសម្រេចហើយបម្រុងជិះរត់គេច ប៉ុន្តែអកុសលពេលនោះជនរងគ្រោះជាម្ចាស់ម៉ូតូបានដើរចេញមកទាន់ក៏លោតស្ទុះទៅធាក់ជនសង្ស័យឱ្យដួលហើយប្រវាយប្រតប់គ្នាបង្កការភ្ញាក់ផ្អើល ។ ស្របពេលជាមួយគ្នានោះដែរ ជនសង្ស័យបានដកកាំភ្លើងខ្លីម៉ាកកា៥៤ ចេញពីចង្កេះបម្រុងបាញ់ទៅលើជនរងគ្រោះ ប៉ុន្តែកាំភ្លើងរបស់ជនសង្ស័យអាម៉េមិនចូលគ្រាប់ក៏ត្រូវបានកម្លាំងនគរបាលដែលជិះល្បាតពួនស្ទាក់ក្នុងមូលដ្ឋានបានជិះប្រទះឃើញក៏ដកកាំភ្លើងភ្ជង់គំរាមបាញ់ទៅលើជនសង្ស័យជាហេតុធ្វើឱ្យរូបគេទម្លាក់អាវុធចុះហើយប្រគល់ខ្លួនឱ្យសមត្ថកិច្ចចាប់ ។
ដោយឡែកជនសង្ស័យម្នាក់ទៀតជាបក្ខពួកក្រោយឃើញហេតុការណ៍ដូចនេះបានជិះម៉ូតូរត់គេចខ្លួនបាត់ស្រមោល ។ លោកបានបញ្ជាក់ឱ្យដឹងទៀតថា ជនសង្ស័យខាងលើគឺជាមុខសញ្ញាទើបតែចេញពីពន្ធនាគារថ្មីៗពាក់ព័ន្ធនឹងអំពើចោរកម្មប្រព្រឹត្តិទៅនៅខេត្តត្បូងឃ្មុំ ៕
ចែករំលែកព័តមាននេះ