ស៊ន សៀវម៉ី មិនទាន់គិតគូរពីរឿងរៀបការក្រោយប្រកួតស៊ីហ្គេមរួច
ឆ្លើយតបសំណួរអ្នកសារព័ត៌មានដែលចង់ដឹងពីពិធីមង្គលការរបស់នាងកើតឡើងពេលណា ? កញ្ញា ស៊ន សៀវម៉ី ប្រាប់ថា
រាជធានីភ្នំពេញ ៖ វីរកីឡាការិនីស៊ន សៀវមីុ ដែលទើបឈ្នះមេដាយមាសពីការប្រកួតកីឡាស៊ីហ្គេមលើកទី២៩ នៅប្រទេសម៉ាឡេស៊ីបានវិលត្រឡប់មកដល់មាតុប្រទេសវិញហើយជាមួយអត្តពលិកមួយចំនួនទៀតកាលពីព្រឹកថ្ងៃទី៣០ សីហា ដោយមានការទទួលយ៉ាងកក់ក្តៅពីលោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំ យុវជន និងកីឡា លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា និងមន្ត្រីក្រោមឱវាទជាច្រើនរូបទៀត ។
ឆ្លើយតបសំណួរអ្នកសារព័ត៌មានដែលចង់ដឹងពីពិធីមង្គលការរបស់នាងកើតឡើងពេលណា ? កញ្ញាស៊ន សៀវម៉ី ប្រាប់ថា នាងមិនទាន់គិតគូរពីរឿងរៀបការទេ ។ ពេលនេះអ្វីដែលសំខាន់គឺនាងត្រូវបន្តខិតខំហ្វឹកហាត់បន្ថែមទៀតសម្រាប់ចូលរួមប្រកួតនៅក្នុងព្រឹត្តិការណ៍ធំៗ ជាពិសេសការប្រកួតកីឡាកម្រិតពិភពលោកតែម្ដង ។មួយវិញទៀត ពេលនេះនាងកំពុងតែមានបញ្ហារបួសក្បាលជង្គង់ខាងស្ដាំដែលត្រូវការព្យាបាលជាបន្ទាន់ប៉ុន្តែមិនទាន់សម្រេចចិត្តថា ត្រូវទៅព្យាបាលនៅថ្ងៃណានោះទេ ។ តាមនាងគឺចង់ទៅព្យាបាលនៅមន្ទីរពេទ្យប្រទេសកូរ៉េដោយសារគេមានជំនាញច្បាស់លាស់ចំណាយពេលត្រឹមតែ៦ទៅ៧ខែប៉ុណ្ណោះអាចជាសះស្បើយប្រកួតឡើងវិញបានហើយ ។
លោក ស៊ន អេលីត ត្រូវជាបងបង្កើតរបស់កីឡាការិនី ស៊ន សៀវម៉ី បានប្រាប់ថា របួសក្បាលជង្គង់របស់ប្អូនលោក គឺត្រូវការប្រាក់ព្យាបាលមិនច្រើននោះទេ គិតទៅមិនដល់១ម៉ឺនដុល្លារឡើយ ។ នៅពេលនេះ លោកកំពុងតែគិតពីការស្វែងរកជំនួយដើម្បីព្យាបាលរបួសក្បាលជង្គង់ប្អូនស្រីលោក ប៉ុន្តែរឿងទាំងអស់នេះលោកមិនមែនជាអ្នកសម្រេចទេ គឺទុកឱ្យប្អូនស្រីចុះ ។
គួររំលឹកថា ប្រតិភូកីឡាតេក្វាន់ដូកម្ពុជា ដែលបានវិលត្រឡប់មកមាតុភូមិវិញកាលពីម្សិលមិញបាននាំមកជាមួយនូវមេដាយមាស១គ្រឿង និងមេដាយសំរឹទ្ធិ២គ្រឿងមកជូនជាតិ ៕
ចែករំលែកព័តមាននេះ