កសិករសំណូមពរដល់រាជរដ្ឋាភិបាល ជួយរកទីផ្សារម្រេច
ខេត្តត្បូងឃ្មុំ ៖ ដំណាំម្រេចត្រូវបានប្រជាពលរដ្ឋ រស់នៅតំបន់ត្រើយខាងកើតទន្លេមេគង្គនាំគ្នាដាំដុះច្រើនពាន់ហិកតា
ខេត្តត្បូងឃ្មុំ ៖ ដំណាំម្រេចត្រូវបានប្រជាពលរដ្ឋ រស់នៅតំបន់ត្រើយខាងកើតទន្លេមេគង្គនាំគ្នាដាំដុះច្រើនពាន់ហិកតា ក្នុងនោះនៅឃុំដារ ស្រុកមេមត់ បានដាំច្រើនជាងតំបន់ផ្សេងៗ ក្នុងពេលដំបូងៗតម្លៃទីផ្សារ១គីឡូក្រាមតម្លៃ៤ម៉ឺនរៀល។ ហើយម្នាក់ៗក៏បានពង្រីកការដាំដុះបន្ថែមទៀត មកដល់ឆ្នាំ២០១៧ តម្លៃបានធ្លាក់ចុះនូវត្រឹម១៧.០០០រៀល ហើយក៏មានអ្នកខ្លះជំពាក់បំណុលធនាគារច្រើនផងដែរ។ អ្នកស្រី នង វណ្ណនី អាយុ៥០ឆ្នាំ នៅភូមិ៧មករា ឃុំដារ ស្រុកមេមត់ ប្រាប់ឲ្យដឹងនៅរសៀលថ្ងៃទី៣០ សីហា ២០១៧ថា ក្នុងពេលដំបូងប្តីរបស់គាត់បានយកពូជម្រេចប្រភេទយូឡិន មកពីប្រទេសវៀតណាមមកដាំដុះនៅផ្ទៃដីទំហំ២ហិកតា ក្នុងពេលដែលបានហុចផលដំបូងនោះមានឈ្មួញមកពីវៀតណាមមកទិញដល់ផ្ទះតែម្តងដោយក្នុង១គីឡូក្រាមបានតម្លៃ៤ម៉ឺនរៀល គាត់ពិតជាសប្បាយរីករាយហើយក៏បានពង្រីកដាំបន្ថែមទៀតរហូតពេញដីតែម្តង។
អ្នកស្រី វណ្ណ នី ប្រាប់បន្តទៀតថា បន្ទាប់មកទៀតតម្លៃម្រេចបានចុះមកនូវជាង៣ម៉ឺនរៀល គឺមិនមានបញ្ហាចោទសម្រាប់គាត់នោះទេ ដោយថវិកាដែលបានកម្រៃពីលក់ម្រេចនេះ គាត់បានផ្តល់ឲ្យកូនៗបានរៀនសូត្រ និងរស់នៅបានសមរម្យនឹងគេ។ ប៉ុន្តែមកដល់ឆ្នាំ២០១៧នេះតម្លៃម្រេចបានបន្តធ្លាក់ចុះនូវត្រឹម១៧.០០០រៀល ដែលពិបាកនឹងចំណេញណាស់ នៅឆ្នាំ២០១៦ កន្លងទៅភ្លៀងបានធ្លាក់ជោគជាំពេកដែលជាហេតុធ្វើឲ្យពូជម្រេចនាំមកពីវៀតណាម បានងាប់ជាច្រើនជន្លង់ កត្តានេះមកពីរលួយឫសតែម្តង។ តែម្រេចពូជម៉ាឡេវិញ ដែលគាត់បានដាំដុះ នៅចំហៀងផ្ទះម្ខាងទៀតមិនបានងាប់នោះទេគឺនៅពេលដែលត្រូវទឹកភ្លៀងច្រើនកាន់តែល្អដើម ពូជនេះល្អធន់នឹងអាកាសធាតុ ហើយនៅមណ្ឌលគិរីវិញ១ជន្លង់អាចហុចផលបានដល់ទៅ១០គីឡូក្រាមឯណោះ។
តែដីរបស់គាត់មានគ្រួសបន្តិចដូច្នេះទិន្នផលមិនបានច្រើនដូចគេទេ។ ដោយសារតែមើលឃើញពូជនេះល្អ ទើបមានអ្នកភូមិរបស់គាតមកសុំទិញដើម គាត់ក៏បានកាត់លក់ឲ្យទៅគេជាហូរហែ និងប្តេជ្ញាដាំពូជម្រេចម៉ាឡេនេះឲ្យបាន២ហិកតាព្រោះតែងាយស្រួលថែទាំ។ លោក ឡូវ គារុន អាយុ៥២ឆ្នាំ នៅភូមិដារផ្សារ ឃុំដារ ស្រុកមេមត់ ប្រាប់ថាគាត់បានចាប់ផ្តើមដាំម្រេចដោយបានពង្រីកបន្តបន្ទាប់បានរហូតដល់ទៅ២.០០០ជន្លង់ ក្នុងពេលបានផលដំបូងលក់បាន៤ម៉ឺនរៀលក្នុង១គីឡូក្រាម តែរាល់ថ្ងៃនេះចុះមកនូវត្រឹមពី១៦.០០០រៀលទៅ១៧.០០០រៀល។ ណាមួយផាត់ការចំណាយទៅលើកម្មករនោះគាត់ទទួលបានប្រាក់ចំណេញតិចពេក ហើយក៏ស្នើសុំដល់ប្រមុខរាជរដ្ឋាភិបាលកម្ពុជាមេត្តាជួយរកទីផ្សារឲ្យប្រសើរជាងនេះ។
លោក ហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្តប្រាប់ឲ្យដឹងដែរថា ម្រេចដែលប្រជាពលរដ្ឋដាំដុះនៅខេត្តត្បូងឃ្មុំទាំងមូលមានជាង២.៧០០ហិកតា ក្នុងនោះមានជាង១.០០០ហិកតាកំពុងតែប្រមូលផល ។ ទាក់ទងតម្លៃម្រេចក្នុងអំឡុងឆ្នាំ២០១៤ និង២០១៥តម្លៃពី៣ម៉ឺនរៀលជាងទៅ៤ម៉ឺនរៀល ដើម្បីឲ្យម្រេចមានតម្លៃទាល់តែកសិករដាំម្រេចសុវត្ថិភាព ហើយចងក្រងជាសហគមន៍៕
ចែករំលែកព័តមាននេះ