ខេត្តកំពង់ឆ្នាំង ៖ កម្លាំងកងរាជអាវុធហត្ថផ្ទៃប្រទេស សហការណ៍ជាមួយអង្គការវ៉ាយអេត និងខណ្ឌរដ្ឋបាលព្រៃឈើ ខេត្តកំពង់ឆ្នាំង នៅវេលាម៉ោង៤ និង៣០នាទីរសៀល ថ្ងៃទី២៩ ខែសីហា ឆ្នាំ២០១៧នេះ បានឆ្មក់ចូលចាប់ដកហូតសត្វខ្លាឃ្មុំមួយក្បាល មានទម្ងន់ប្រមាណ៥០គីឡូក្រាម ពីក្នុងផ្ទះសំណាក់ផ្កាយព្រឹក ស្ថិតក្នុងភូមិតំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង។ ទោះយ៉ាងនេះក្តីម្ចាស់ផ្ទះសំណាក់ផ្កាយព្រឹក បានអះអាងថា សត្វខ្លាឃ្មុំ១ក្បាលនេះគាត់ចញ្ចឹមតាំងពីតូចៗមកម្លេះ។
លោក ថោង វីរ៉ាវុឌ្ឍី នាយខណ្ឌរដ្ឋបាលព្រៃឈើ នៃមន្ទីកសិកម្មខេត្តកំពង់ឆ្នាំងបានឲ្យដឹងថា តាមផ្លូវច្បាប់គ្មានអ្នកណាម្នាក់អាចចិញ្ចឹមសត្វព្រៃបានទេ អ្នកចិញ្ចឹមសត្វព្រៃក៏ត្រូវមានទោសផងដែរ ប៉ុន្តែនេះដោយសារម្ចាស់ផ្ទះដែលចិញ្ចឹមសត្វព្រៃនេះមិនយល់ពីច្បាប់ និងម្យ៉ាងវិញទៀត គាត់សុខចិត្តប្រគល់ឲ្យសត្វខ្លាឃុំមួយក្បាលនេះ មកក្រុមសមត្ថកិច្ចចម្រុះ ទើបយើងគ្រាន់តែសុំដកហូតយកសត្វព្រៃ ជាខ្លាឃ្មុំ១ក្បាលនេះតែប៉ុណ្ណោះ។ លោកបានបញ្ជាក់ថា សត្វខ្លាឃ្មុំ១ក្បាលនេះ ខាងអង្គការវ៉ាយអេត និងយកទៅលែងនៅភ្នំតាម៉ៅ។
ជាមួយនឹងការដកហូតសត្វខ្លាំឃ្មុំមួយក្បាលនេះ ម្ចាស់ផ្ទះសំណាក់ ផ្កាយព្រឹក ពីដំបូងឡើយបានប្រតិកម្មជាមួយសមត្ថកិច្ចចម្រុះខ្លះដែរ ដោយលើកហេតុផលថា គាត់បានទិញវាមកចិញ្ចឹមតាំងពីតូចៗ រហូតវាធំប៉ុណ្ណេះ ស្រលាញ់វាដូចកូនដូចចៅទៅហើយ។ ម្ចាស់ផ្ទះសំណាក់ខាងលើ ក៏ចង់រារាំងមិនឲ្យដកយកសត្វព្រៃដែលគាត់ចិញ្ចឹមតាំងពីតូចៗនោះដែរ តែដោយសារព្យាយាមពន្យល់សម្របសម្រួលពីសមត្ថកិច្ចជំនាញ អំពីផ្លូវច្បាប់ ទើបព្រមប្រគល់ឲ្យនៅម៉ោងជាង៦ល្ងាចថ្ងៃដដែល ក្រោមការចោមរោមមើលពីប្រជាពលរដ្ឋយ៉ាងច្រើននាក់ស្ទើស្ទះចរាចរណ៍៕
ចែករំលែកព័តមាននេះ