ទឹកជំនន់នៅតែធ្ងន់ធ្ងរក្រោយព្យុះ
ទឹកជំនន់ធ្ងន់ធ្ងរបំផុតជាប្រវត្តិសាស្ត្រដែលបំផ្លាញក្រុងហ៊ូស្តុន និងតំបន់ជុំវិញក្រុងនេះ បណ្តាលឱ្យ
សហរដ្ឋអាមេរិក ៖ ទឹកជំនន់ធ្ងន់ធ្ងរបំផុតជាប្រវត្តិសាស្ត្រដែលបំផ្លាញក្រុងហ៊ូស្តុន និងតំបន់ជុំវិញក្រុងនេះ បណ្តាលឱ្យមនុស្សស្លាប់យ៉ាងតិច៧នាក់ ហើយអាចមានភាពធ្ងន់ធ្ងរថែមទៀតនាប៉ុន្មានថ្ងៃខាងមុខនេះ មកពីភ្លៀងធ្លាក់ខ្លាំង ដែលនៅបន្តក្រោយការវាយប្រហារនៃព្យុះឈ្មោះ HARVEY លើភាគអាគ្នេយ៍ រដ្ឋតិចសាស់ ។
សមាជិកកងឆ្មាំជាតិ ប៉ូលិស អ្នកជួយសង្គ្រោះ ឬជនស៊ីវិលធម្មតាច្រើនពាន់នាក់ត្រូវបានបញ្ជូនទៅតាមឧទ្ធម្ភាគចក្រ នាវា ឬរថយន្តកាំមីញ៉ុងខ្ពស់ៗបំពាក់ ជាពិសេសដោយដងស្ទូច ដើម្បីជួយប្រជាជនច្រើនរយនាក់ដែលជាប់ទៅណាមិនរួច ក្នុងទីក្រុងធំទី៤នោះរបស់សហរដ្ឋអាមេរិក ។
ព្យុះ HARVEY វាយប្រហារលើ រដ្ឋតិចសាស់កាលពីយប់ថ្ងៃទី២៥ សីហា ហើយជាព្យុះសង្ឃរាខ្លាំងបំផុតវាយប្រហារលើរដ្ឋនេះពុំធ្លាប់មានចាប់តាំងពីជាងកន្លះសតវត្សមកហើយ ។
បណ្តាសាលារៀន ព្រលានយន្តហោះ អគារការិយាល័យនៅក្រុងហ៊ូស្តុន ទទួលបញ្ជាឱ្យនៅតែបិទទ្វារ ហើយផ្លូវថ្នល់ជាច្រើនក្លាយទៅជាស្ទឹង ។ ក្នុងសង្កាត់មួយចំនួនទឹកឡើងដល់ទ្រូង ។ ប្រជាជនក្រុងហ៊ូស្តុនប្រមាណជា៥.៥០០នាក់ ត្រូវបានជម្លៀសមកកាន់ទីខ្ពស់ ។ គេវាយតម្លៃថា ការខូចខាតដោយសារគ្រោះមហន្តរាយធម្មជាតិនេះអាចមានដល់២០ពាន់លានដុល្លារ ។
ប្រធានាធិបតីអាមេរិក លោកដូណាល់ ត្រាំ ត្រូវមកកាន់រដ្ឋតិចសាស់នាថ្ងៃទី២៩ សីហា ជាមួយឆន្ទៈពង្រឹងឯកភាពរបស់ប្រទេសប្រឈមមុខនឹងសោកនាដកម្មដ៏សែនទារុណនេះ ៕
ចែករំលែកព័តមាននេះ