រាជធានីភ្នំពេញ ៖ នៅទីបំផុត ការប្រកួតយ៉ាងស្វិតស្វាញរវាងកីឡាករជើងខ្លាំងកម្ពុជា មាស ច័ន្ទមាន និងកីឡាករថៃល្បីឈ្មោះ Phat Chhayakphum នៅលើសង្វៀនប្រដាល់អន្តរជាតិរបស់ទូរទស្សន៍អាស៊ីអាគ្នេយ៍កាលពីថ្ងៃទី២៧ សីហា ត្រូវបានកំណត់ថាមានភាពចម្រូងចម្រាសបំផុត ។ ជ័យជម្នះរបស់ម្ចាស់ខ្សែក្រវាត់ក្នុងប្រភេទទម្ងន់៦៣,៥គីឡូក្រាម មាស ច័ន្ទមាន ត្រូវគេចោទថា ទទួលបានពីការចង់ចាប់កំហុសគូប្រកួតដោយសារដឹងខ្លួនថា ចាញ់ពិន្ទុកីឡាករថៃយ៉ាងគំហុក បើមិនលេងស្ទីលនេះទេ គឺមិនអាចតស៊ូជាមួយកីឡាករថៃបាននោះផង ។ ជាក់ស្ដែង គ្រាន់តែមានការប្រកាសថា កីឡាករកម្ពុជាទទួលបានជ័យជម្នះដោយមិនប្រក្រតីនោះ គឺទាំងភាគីអ្នកគាំទ្រ និងភាគីកីឡាករថៃសុទ្ធតែចោទប្រកាន់ទៅលើកីឡាករមាស ច័ន្ទមាន និងលោកអាជ្ញាកណ្ដាល បើទោះជាអ្វីដែលគេបានធ្វើគឺស្របនឹងបញ្ហាបច្ចេកទេសដែលសមនឹងចាប់កំហុសកីឡាករថៃក្ដី។
ការប្រកួតដែលបានធ្វើឡើងនោះកីឡាករកម្ពុជានិងថៃបានបើកឆាកប្រយុទ្ធគ្នាយ៉ាងស្វិតស្វាញ រហូតដល់ថ្នាក់រកចំណុចមានប្រៀបជាងគ្នាមិនឃើញក្នុងអំឡុង៣ទឹកដំបូង ។ ការប្រកួតរបស់ពួកគេបានឡើងកម្តៅមិនខុសពីគូស៊ីសាច់ហុតឈាមនោះទេ ដោយកីឡាករថៃបានទាំងវាយឱ្យកីឡាករកម្ពុជារាប់មួយលើកភ្លាមៗក្នុងទឹកទី៣នោះផង ។ ក្នុងទឹកទឹ៤ គេឃើញកីឡាករទាំងពីរកាន់តែស្ទុះសម្រុកដាក់គ្នាមិនព្រមដកដៃខ្លាំងឡើង រហូតកីឡាករថៃទប់ជំហរលែងបានក៏ភ្លាត់វាយមួយកែងពីក្រោយត្រូវចំកញ្ចឹង.កកីឡាករកម្ពុជាមាស ច័ន្ទមាន បណ្ដាលឱ្យដួលក្រោកលែងរួចហើយត្រូវគណៈកម្មការកាត់ក្ដីឱ្យមាស ច័ន្ទមាន ឈ្នះការប្រកួតដោយសំអាងថា កីឡាករថៃវាយខុសលក្ខន្តិកៈប្រកួត ។ បើទោះជាមានអ្នកទស្សនាមួយចំនួនយល់ស្របចំពោះការកាត់ក្ដីនោះ ប៉ុន្តែមួយចំនួនទៀតបានយល់ឃើញផ្ទុយពីនោះ១៨០ដឺក្រេ ។
កីឡាករមាស ច័ន្ទមាន ដ្បិតថា ត្រូវមួយកែងក្នុងពេលកីឡាករថៃភ្លាត់វាយត្រូវក៏ពិតមែន ប៉ុន្តែមិនអាចដល់ថ្នាក់ដួលសន្លប់នោះទេ នេះមកពីគេដឹងថា បើបន្តការប្រកួតក៏មិនអាចទៅរួចក៏ចង់ឈ្នះដោយការស៊ីឡាក់តែម្ដងទើបប្រឹងធ្វើននៀលលើរេញដើម្បីឱ្យអាជ្ញាកណ្ដាលចាប់កំហុសកីឡាករថៃតែម្ដង ។ ម្នាក់ៗបានស្រែកឱ្យគណៈកម្មការចាប់កំហុសមាស ច័ន្ទមាន វិញ ប៉ុន្តែមិនអាចទៅរួចទេ ដោយសារតែពេលចាក់សាវីដេអូចុះឡើងៗឃើញមួយកែងរបស់កីឡាករថៃគឺពិតជាត្រូវចំកញ្ចឹងកពីក្រោយរបស់កីឡាករកម្ពុជាពិតមែន ។ អ្នកទស្សនាដែលមានប្រតិកម្មមិនដាក់កំហុសទៅលើគណៈកម្មការផ្ដល់ពិន្ទុនោះទេ ប៉ុន្តែបានចោទកីឡាករមាស ច័ន្ទមាន ថាខ្វះទឹកចិត្តជាអ្នកកីឡា ទើបឆ្លៀតឱកាសកីឡាករថៃវាយត្រូវកញ្ចឹងកក្នុងពេលប្រទាញប្រទង់គ្នា ធ្វើសន្លប់ដើម្បីទទួលបានជ័យជម្នះដោយមិនចាំបាច់ប្រឹង ។ ប៉ុន្តែឆ្លើយតបនឹងករណីនោះ ក្រុមអ្នកវិភាគផ្សេងទៀតបានអះអាងថា បើនោះជាឱកាសរបស់កីឡាករថៃក៏គេពិតជាធ្វើដេកដួលបែបនោះមិនខុសគ្នានោះដែរ ដោយម្នាក់ៗនិយាយថា កីឡាករដែលល្អត្រូវចេះទប់ល្បឿនរបស់ខ្លួនក្នុងពេលវាយចេញ ទើបមិនមានបញ្ហាកើតឡើងណាមួយ ។
ទោះបីយ៉ាងណា លោកថៃ អ៊ូ អ្នកដឹកនាំកីឡាករថៃឱ្យមកប្រកួតមិនដាក់កំហុសទៅលើកីឡាករកម្ពុជាដូចអ្នកគាំទ្រមួយចំនួននោះទេ តែលោកបានទម្លាក់បញ្ហាថា បណ្ដាលមកពីលោកអាជ្ញាកណ្ដាលសុទ្ធសាធ ។ លោកថ្លែងថា ជ័យជម្នះដែលបានកាត់ឱ្យកីឡាករមាស ច័ន្ទមាន ឈ្នះគឺមិនសមនោះទេ ដោយលោកបានចាត់ទុកថា ការជ្រុលដៃរបស់កីឡាករខ្លួនមិនមែនជាការថែមដូចច្បាប់របស់សហព័ន្ធដែលបានដាក់កំហុសនោះទេ ប៉ុន្តែជាការវាយត្រូវដោយសារតែនៅសល់កម្លាំងវាត់ក្នុងពេលសម្រុកទៅវិញទៅមក ស្របគ្នាដែលកីឡាករកម្ពុជាក៏ស្រាប់តែបែរក្រោយបណ្ដាលឱ្យកញ្ចឹងករបស់គេក្លាយជាទីតាំងរងកែងទៅវិញ ។ លោកនិយាយថាកំហុសប៉ុនហ្នឹងមិនខុសបញ្ហាបច្ចេកទេសនោះទេ ដោយសារតែភាពជាក់ស្ដែងគឺកីឡាករថៃមិនបានមើលឃើញកីឡាករកម្ពុជាបែរក្រោយហើយក៏ស្ទុះអុកកែងក៏ទេដែរ គឺកែងរបស់គេវាយចេញតាំងពីពេលវាយទៅវាយមក ដែលលោកបានហៅមួយកែងត្រូវកញ្ចឹងកនេះ គឺចំហាយដែលកីឡាករថៃវាយស្រប និងបញ្ឈប់កម្លាំងដៃមិនបានប៉ុណ្ណោះ ។
លោកថាបញ្ហាមួយនេះ បើចង់ចាប់កំហុសគឺត្រូវបន្ទោសអាជ្ញាកណ្ដាលដែលស្ទុះទប់កែងកីឡាករថៃមិនទាន់ ដោយមិនអាចមកចាប់កំហុសកីឡាករលោកបានទេ ។ លោកនិយាយថា៖«ខុសបច្ចេកទេសម៉េចត្រូវអាហ្នឹង គ្នាវាយកែងទៅស្របពេលកីឡាករកម្ពុជាដួលអស់ជំហរបែរក្រោយតើ គឺវាមិនមែនថែមទេ អ៊ីចឹងរឿងហ្នឹងអត់ត្រូវកាត់ក្ដីអ៊ីចឹងទេ គឺត្រូវដាក់កំហុសអាជ្ញាកណ្ដាលទើបត្រូវ» ។
ឆ្លើយតបនឹងការចោទប្រកាន់នេះ លោក ណន រិទ្ធិ ជាអាជ្ញាកណ្ដាលសម្រាប់ការប្រកួតមួយគូនេះ បានបកស្រាយថា សកម្មភាពវាយតប់របស់ពួកគេមិនអាចឱ្យលោកទៅឃាត់មួយកែងដែលជ្រុលនោះបានទេ ដោយលោកបញ្ជាក់ថា បញ្ហានោះគឺមិនអាចបន្ទោសលោកបានទេ ដ្បិតលោកប្រឹងស្ទុះទៅទប់កម្លាំងកែងនោះដែរ ប៉ុន្តែមកពីទប់មិនទាន់ទើបបណ្ដាលឱ្យមានកំហុសបច្ចេកទេសកើតឡើង។
លោកថា នៅលើសង្វៀនមិនមែនស្រួលដូចអ្នកនៅខាងក្រោមគ្រាន់តែមើលនោះទេ ជាពិសេសនៅក្នុងកាលៈទេសៈដែលគូភាគីសម្រុកដាក់គ្នាទៅវិញទៅមក គឺមិនមែនចេះតែចូលចាប់ដោយមិនមើលស្ថានភាពនោះឡើយ ។ យ៉ាងណាមិញ លោកថា សម្រាប់ការប្រកួតរវាងមាស ច័ន្ទមាន និងកីឡាករថៃ Phat Chhayakphum គឺលោកប្រឹងអស់ពីសមត្ថភាពទៅហើយ ដោយមិនអាចមកទម្លាក់កំហុសថាលោកចាប់កែងកីឡាករថៃមិនទាន់ គឺជាអ្វីដែលលោកត្រូវទទួលខុសត្រូវនោះទេ។
លោក ញាណ សុធី អ្នករៀបចំការប្រកួតបានអះអាងថា កំហុសបច្ចេកទេសដែលបានកើតឡើង គេមិនសំដៅថាលោកអាជ្ញាកណ្ដាលចាប់មិនទាន់ ឬក៏ចាប់ទាន់នោះទេ ប៉ុន្តែឱ្យតែការវាយត្រូវកញ្ចឹងកខាងក្រោយដែលខាងសហព័ន្ធប្រកាសជាកំហុសនៅលើសង្វៀនគឺខាងគណៈកម្មការត្រូវតែកំណត់ឱ្យអ្នកសន្លប់ក្លាយជាអ្នកឈ្នះ ដើម្បីព្រមានដល់កីឡាករដែលចេះតែវាយមិនប៉ាន់ស្មានកម្លាំង និងសន្ទុះដែលនាំឱ្យទប់លំនឹងវាយចេញមិនបាន ។ យ៉ាងណាមិញ លោកថា កីឡាករកម្ពុជាអាចស្ថិតក្នុងការស៊ីឡាក់ដើម្បីចង់ឈ្នះក៏ថាបាន ប៉ុន្តែមកពីសភាពដេកដួលរបស់មាស ច័ន្ទមាន និងមួយកែងជ្រុលដៃរបស់កីឡាករថៃមើលទៅស្ថិតក្នុងសភាពស៊ីសង្វាក់គ្នា ទើបលោកយល់ថា មិនមានហេតុផលដែលនាំឱ្យចាប់កំហុសកីឡាករកម្ពុជាទេ ។
យ៉ាងណាក៏ដោយ គេកត់សម្គាល់ថា ជ័យជម្នះដែលមាស ច័ន្ទមាន បានទទួលលើកនេះ គឺត្រូវគេរិះគន់ថាបានដោយសារការធ្វេសប្រហែសរបស់លោកអាជ្ញាកណ្ដាល និងថាបានដោយសារតែគេធ្វើពុធបានសមដែលមិនទំនងជាជើងខ្លាំងម្នាក់នៅលើសង្វៀនទេ ។ ទោះយ៉ាងនេះក្ដីក៏លោកនៅតែអះអាងថា មួយកែងរបស់កីឡាករថៃ គឺលោកមិនមែនធ្វើស្ទីលននៀលនោះទេ ប៉ុន្តែពិតជាមានទម្ងន់មិនអាចឱ្យលោកបន្តការប្រកួតបានប្រាកដមែន ដោយលោកបាននិយាយនៅពេលផ្លាស់ខោអាវថា អ្នកនិយាយថាត្រូវមួយកែងមិនអីគឺបានតែនិយាយប៉ុណ្ណោះ ៕
ចែករំលែកព័តមាននេះ