រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សហភាពអឺរ៉ុបប្រចាំនៅកម្ពុជា កាលពីថ្ងៃទី២១ មេសា ឆ្នាំ២០១១ ដែលកោះសន្តិភាពបានទទួលឲ្យដឹងថា សហភាពអឺរ៉ុបគ្រោងនឹងផ្តល់ទឹកប្រាក់ចំនួនជាង១,៥លានអឺរ៉ូ គឺប្រមាណជាង២លានដុល្លារអាមេរិក សម្រាប់គម្រោងនានាសំដៅពង្រឹងអភិបាលកិច្ចនៅថ្នាក់ក្រោមជាតិ។ ការប្រកាសនេះបានធ្វើឡើង សម្រាប់អញ្ជើញអាជ្ញាធរមូលដ្ឋានឲ្យដាក់បញ្ជូនសំណើរបស់ខ្លួនចូលរួមប្រកួតប្រជែងយកថវិកា ដើម្បីអនុវត្តគម្រោងនេះ។ គម្រោងមានគោលបំណងពង្រឹងសមត្ថភាពរដ្ឋបាលនៅមូលដ្ឋាន ដើម្បីផ្តល់សេវាកម្មដល់ប្រជាពលរដ្ឋកម្ពុជា ជាពិសេសក្រុមដែលងាយរងគ្រោះបំផុត។
សេចក្តីប្រកាសព័ត៌មានបន្តថា ការប្រកាសសំណើបានកំណត់យកអភិបាលកិច្ចល្អនៅថ្នាក់ក្រោមជាតិជាបុរេលក្ខខណ្ឌសម្រាប់សង្គមឲ្យកាន់តែមានសមធម៌ បើកចំហនិងប្រជាធិបតេយ្យ។ លោកស្រីមីសែល ឡាបឺ ប្រធានប្រតិភូសហភាពអឺរ៉ុបបានមានប្រសាសន៍ថា «ជាមួយនឹងថវិកានេះយើងរំពឹងថា នឹងធ្វើឲ្យរចនាសម្ព័ន្ធរដ្ឋបាលថ្នាក់ក្រោមជាតិរបស់រដ្ឋាភិបាលកាន់តែប្រសើរឡើង ដើម្បីរួមចំណែកដល់ការលើកកម្ពស់អភិបាលកិច្ចប្រកបដោយគណនេយ្យភាពរួមបញ្ចូលគ្នា និងមានការពិគ្រោះយោបល់យ៉ាងពេញលេញដែលកម្ពុជាត្រូវការសម្រាប់កាត់បន្ថយភាពក្រីក្ររបស់ប្រជាជន»។
ថវិកាទាំងនេះ គឺសម្រាប់គម្រោងនានាដែលលើកកម្ពស់ផលប្រយោជន៍អភិវឌ្ឍន៍នៃក្រុមដែលងាយរងគ្រោះនៅកម្ពុជា ព្រមទាំងបង្កើនភាពជាតំណាង និងការចូលរួមរបស់ពួកគេនៅក្នុងដំណើរការអភិវឌ្ឍន៍។ អាទិភាពផ្អែកទៅលើ ទី១-សកម្មភាពគាំទ្រកិច្ចពិភាក្សារវាងអាជ្ញាធរមូលដ្ឋាន និងសង្គមស៊ីវិល រួមទាំងអង្គការនៅតាមសហគមន៍ដែលតំណាងឲ្យក្រុមងាយរងគ្រោះ និងក្រុមដែលឯកោ។ ទី២-សកម្មភាពគាំទ្រការអភិវឌ្ឍសហគមន៍សម្រាប់ក្រុមដែលមិនត្រូវបានគេយកចិត្តទុកដាក់ និងក្រុមដែលងាយរងគ្រោះដូចជាស្រ្តី និងជនពិការ។ ទី៣-សកម្មភាពលើកកម្ពស់ការរៀបចំផែនការប្រើប្រាស់ និងគ្រប់គ្រងដីធ្លីរួមទាំងសហគមន៍របស់ជនជាតិដើមភាគតិច ដីសម្បទានសង្គមកិច្ចសម្រាប់គ្រួសារដែលគ្មានដីធ្លីនិងគ្មានភាពជាដៃគូរវាងកសិករតូចៗជាលក្ខណៈគ្រួសារ ឬកសិករគ្មានដីជាមួយដីសម្បទានសេដ្ឋកិច្ច៕
ចែករំលែកព័តមាននេះ