រាជធានីភ្នំពេញ ៖ កាលពីព្រឹកថ្ងៃទី២២ មេសា នៅក្នុងបរិវេណវត្តចំពុះក្អែក សង្កាត់ព្រែកថ្មី ខណ្ឌមានជ័យ រាជធានីភ្នំពេញ បានរៀបចំធ្វើពិធីថ្វាយរថយន្តទួរីស១២កៅអី ២គ្រឿង របស់ក្រុមហ៊ុនអិនវីស៊ីខបភើរ៉េសិនដែលជាក្រុមហ៊ុនផលិតទឹកពិសាបរិសុទ្ធ វីតាល់ដល់អគ្គាធិការដ្ឋានពុទ្ធិកសិក្សាជាតិ ។
ពិធីនេះមានការថ្វាយផ្ទាល់ពីសំណាក់លោកជំទាវហ៊ុន ម៉ាណា ប្រធានក្រុមប្រឹក្សាភិបាល និងជាអគ្គនាយិកាក្រុមហ៊ុនអិន វី ស៊ី ដល់សម្តេចសង្ឃនន្ទ ង៉ែត ព្រះអគ្គាធិការនៃអគ្គាធិការដ្ឋានពុទ្ធិកសិក្សាជាតិ ។ លោកជំទាវហ៊ុន ម៉ាណា បានថ្លែងអំណរព្រះគុណយ៉ាងជ្រាលជ្រៅចំពោះសម្តេចព្រះសុមេធាធិបតី នន្ទ ង៉ែត ដែលបានយាងចូលរួមជាព្រះរាជអធិបតីក្នុងពិធីប្រគល់រថយន្តទួរីស១២កៅអី២គ្រឿង ដែលជាវិភាគទានរបស់អតិថិជនប្រើប្រាស់ទឹកពិសាបរិសុទ្ធ វីតាល់ប្រគេនថ្វាយអគ្គាធិការដ្ឋានពុទ្ធិកសិក្សាជាតិនេះ ។
លោកជំទាវបានលើកឡើងថា ក្រុមហ៊ុនអិន វី ស៊ី ខបភើរ៉េសិន បានបើកសម្ពោធជាផ្លូវការនៅថ្ងៃទី៧ មករា ឆ្នាំ២០១០ ត្រូវនឹងថ្ងៃរំលឹកខួបលើកទី៣១ឆ្នាំ នៃទិវាជ័យជម្នះលើរបបប្រល័យពូជសាសន៍ប៉ុល ពត ។ ថ្ងៃ៧មករា បានផ្តល់ជីវិតថ្មីឱ្យយើងទាំងអស់គ្នាបានជួបជុំក្រុមគ្រួសារញាតិមិត្ត ព្រមទាំងបានស្គាល់នូវសុខសន្តិភាព ភាពសំបូរសប្បាយ និងមានការអភិវឌ្ឍយ៉ាងឆាប់រហ័សលើគ្រប់វិស័យ ដូចសព្វថ្ងៃនេះ ក្រោមមាគ៌ាដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដ៏ឈ្លាសវៃ និងប្រកបដោយគតិបណ្ឌិត ។
ចាប់តាំងពីថ្ងៃសម្ពោធនោះមក ក្រុមហ៊ុនមិនត្រឹមតែផ្តល់ភាពស្រស់ថ្លាដល់ជីវិតប្រចាំថ្ងៃរបស់អតិថិជនតាមរយៈការផលិត និងផ្គត់ផ្គង់ទឹកពិសាដែលមានគុណភាពល្អប៉ុណ្ណោះទេ វីតាល់ ថែមទាំងបានចូលរួមចំណែកដល់ការអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋផងតាមរយៈការផ្តល់ការងារធ្វើឱ្យពលរដ្ឋខ្មែរ និងបរិច្ចាគជាប្រចាំនូវទឹកប្រាក់របស់ក្រុមហ៊ុន ដើម្បីឧបត្ថម្ភគាំពារដល់សកម្មភាពសង្គម និងចលនាមនុស្សធម៌នានាទៀតផង ។ ជាក់ស្តែងថ្ងៃនេះក្រុមហ៊ុនអិន វី ស៊ី ទឹកពិសាបរិសុទ្ធវីតាល់ បាននាំយករថយន្តទួរីស១២កៅអី២គ្រឿង ដែលជាវិភាគទានរបស់អតិថិជនប្រើប្រាស់ទឹកសុទ្ធវីតាល់ប្រគេនអគ្គាធិការដ្ឋានពុទ្ធិកសិក្សាជាតិ ដើម្បីបង្កលក្ខណៈងាយស្រួលសម្រាប់ចុះបំពេញ បេសកកម្មតាមខេត្ត ក្នុងការលើកកម្ពស់វិស័យពុទ្ធិកសិក្សាឱ្យកាន់តែរីកចម្រើនទៅមុខតាមសំណើចម្រើនពររបស់ព្រះអង្គ ដែលថវិកានេះបានមកពីការដកចំណូល២៥រៀលក្នុង១ដបចេញពីការលក់ទឹកបរិសុទ្ធវីតាល់ ។ បើគ្មានការគាំទ្រពីអតិថិជនប្រើប្រាស់ទឹកបរិសុទ្ធវីតាល់ទេ ក៏គ្មានពិធីប្រគេនរថយន្តទួរីស១២កៅអី២គ្រឿងនេះដែរ ពិសេសបានទទួលការគាំទ្រយ៉ាងលើសលប់រហូតដល់អាចមានលទ្ធផលប្រគេនថ្វាយរថយន្តវិភាគទានដល់ព្រះសង្ឃទៅមុខទៀត ។
ក្នុងនាមលោកជំទាវជាប្រធានក្រុមប្រឹក្សា ភិបាល និងជាអគ្គនាយិកាក្រុមហ៊ុន សូមគោរព ថ្លែងអំណរគុណ និងដឹងគុណចំពោះការគាំទ្រទឹកសុទ្ធវីតាល់ពីដើមរៀងមក ពីសំណាក់លោក លោកឧកញ៉ា លោកជំទាវ លោក លោកស្រី នាងកញ្ញា ដែលបានប្រើប្រាស់ទឹកសុទ្ធវីតាល់ ដែលជាកត្តាលើកទឹកចិត្តយ៉ាងធំធេងធ្វើឱ្យក្រុមហ៊ុនបន្តប្រឹងប្រែងអភិវឌ្ឍខ្លួន ដើម្បីបម្រើសុខភាពប្រជាពលរដ្ឋ ក៏ដូចជាបម្រើបុព្វហេតុរបស់ក្រុមហ៊ុនតាំងពីដើមរៀងមក និងតទៅទៀត ។
ជោគជ័យរបស់វីតាល់ គឺមិនអាចកាត់ផ្តាច់បានពីទំនុកចិត្ត និងការបន្តគាំទ្រពីសំណាក់អតិថិជនបានឡើយ ហេតុនេះក្រុមហ៊ុនរង់ចាំទទួលយកមតិយោបល់រិះគន់ស្ថាបនាទាំងឡាយពីអតិថិជនគ្រប់មជ្ឈដ្ឋានជានិច្ច ដើម្បីកែលំអទាំងគុណភាពផលិត និងសេវាកម្ម ។ បន្ទាប់មក សម្តេចសង្ឃរួមទាំងមន្ត្រីសង្ឃ៦អង្គទៀតបានប្រសិទ្ធពរជ័យដល់លោកជំទាវអគ្គនាយិកាក្រុមហ៊ុន ព្រមទាំងបុគ្គលិកទាំងអស់ និងភ្ញៀវដែលបានចូលរួម ។ លោកជំទាវក៏បានប្រគេន និងប្រគល់សោរថយន្ត ជានិមិត្តរូបដល់សម្តេចព្រះសង្ឃនន្ទ ង៉ែត ។
កម្មវិធីបន្តទៀតលោកជំទាវ និងគណៈអធិបតីបាននាំយកអំណោយជាសំភារលុយកាក់ ចែកជូនដល់តាជី យាជី និងចាស់ជរា ប្រជាពលពលរដ្ឋក្រីក្រប្រមាណជា២០០នាក់ មានសម្លៀកបំពាក់១សម្រាប់ ក្រមា១ ត្រីខ ៥កំប៉ុង មីយើង៥កញ្ចប់ ស្ករស១គីឡូក្រាម ទឹកពិសាបរិសុទ្ធវីតាល់២ដប ទឹកដោះគោខាប់២កំប៉ុង តែ១កញ្ចប់ អូវ៉ាន់ទីន១ដបធំ និងថវិកា៥ម៉ឺនរៀល ក្នុងម្នាក់ៗ ។ សំភារ និងថវិកានេះលោកជំទាវអះអាងថា ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា និងលោកជំទាវ បណ្ឌិត ប៊ុន រ៉ានី ហ៊ុន សែន ដែលជាឪពុកនិងម្តាយបង្កើតរបស់លោកជំទាវ ។
ភ្ជាប់ជាមួយកម្មវិធីនោះដែរ លោកជំទាវ ហ៊ុន ម៉ាណា និងមាតាក្មេក ព្រមទាំងក្រុមគ្រួសារបាននាំយកអំណោយជាកញ្ចប់ មានសំភារ និងទឹកប្រាក់ដូចរៀបរាប់ខាងលើដែរ ឧបត្ថម្ភដល់ដូនជី តាជី ចាស់ ជរា ប្រជាពលរដ្ឋក្រីក្រប្រមាណ៥០០នាក់នៅក្នុងបរិវេណវត្តចំពុះក្អែក ។ អំណោយទាំងនេះលោកជំទាវឱ្យដឹងថា ជាទានបានមកពីឪពុកម្តាយបង្កើត និងម្តាយក្មេក ៕
ចែករំលែកព័តមាននេះ