សហរដ្ឋអាមេរិក ៖ ស្ដេចប្រដាល់អាមេរិកមិនដែលចាញ់ Floyd Mayweather និងស្ដេចប្រដាល់ក្បាច់គុនចម្រុះសញ្ជាតិអៀរឡង់ Conor McGregor ដល់ថ្ងៃវ៉ៃគ្នាដណ្ដើមខ្សែក្រវាត់ «Money Belt» នៅលើសង្វៀនT-Mobile Arena ស្ថិតក្នុងទីក្រុង Las Vegas រដ្ឋ Nevada សហរដ្ឋអាមេរិកហើយ នាថ្ងៃសៅរ៍ ទី២៦ សីហា ត្រូវនឹងព្រឹកថ្ងៃអាទិត្យទី២៧ សីហា នៅកម្ពុជា ខណៈទូរទស្សន៍ធំក្នុងស្រុក CTN នឹងផ្សាយបន្តផ្ទាល់កម្មវិធីប្រកួតទាំងមូលនេះផងដែរ។
Floyd Mayweather វ័យ៤០ឆ្នាំ ធ្លាប់ប្រកួត៤៩លើក មិនដែលចាញ់ ក្នុងនោះផ្ដួលគូប្រកួតឱ្យសន្លប់២៦លើក និងគ្រងខ្សែក្រវាត់លំដាប់ពិភពលោក៥ស្ថាប័ន ។
ចំណែក Conor McGregor វ័យ២៩ឆ្នាំ ធ្លាប់ប្រកួតយុទ្ធគុនចម្រុះ (MMA)របស់កម្មវិធី Ultimate Fighting Championship(UFC)ដែលជាការប្រកួតនៅក្នុងទ្រុងចំនួន២៤លើកក្នុងនោះឈ្នះ២១លើក និងចាញ់៣លើក ។
ស្ដេចប្រដាល់ទាំងពីរនឹងត្រូវប្រកួតគ្នាចំនួន១២ទឹកក្រោមច្បាប់កីឡាប្រដាល់សាកលអាជីពដើម្បីដណ្ដើមខ្សែក្រវាត់ពិសេសដែលមានឈ្មោះថា «Money Belt» ។
ព្រឹត្តិការណ៍នេះអាចចាត់ទុកថាជាការប្រកួតប្រដាល់ដ៏ធំក្នុងពិភពលោកប្រចាំឆ្នាំ២០១៧ ដែលស្ដេចប្រដាល់ទាំងពីរនឹងទទួលបានប្រាក់ច្រើនជាងគេក្នុងប្រវត្តិសាស្ត្រប្រដាល់ផងដែរ ។
តាមប្រភពព័ត៌មានឱ្យដឹងថា Conor McGregorនឹងទទួលបានប្រាក់តម្លៃខ្លួនមិនតិចជាង៧៥លានដុល្លារទេចំណែកFloyd Mayweatherនឹងទទួលបាន១០០លានដុល្លារ
ប៉ុន្តែអ្នកជំនាញមួយចំនួនរំពឹងទុកថា Conor McGregorនឹងទទួលបានប្រាក់តម្លៃខ្លួនប្រមាណជា១០០លានដុល្លារ ឯFloyd Mayweather នឹងទទួលបាន២០០លានដុល្លារ។
មុនការប្រកួតចាប់ផ្ដើម Floyd Mayweather ទទួលស្គាល់ Conor McGregor មានប្រៀបជាងខ្លួនទាំងកម្ពស់-វ័យ និងចម្ងាយដៃវាយចេញ ។
លោកបានលើកឡើងថា៖ « Conor McGregor មិនមែនជាអ្នកប្រដាល់ដូច២ឆ្នាំមុនទេ ខ្ញុំជឿជាក់ថា គូប្រកួតរបស់ខ្ញុំពិតជាមានប្រៀបជាងនៅថ្ងៃប្រកួតនោះ ។ ម្យ៉ាងខ្ញុំខានវាយ២ឆ្នាំហើយ ពេលនេះខ្ញុំអាយុ៤០ឆ្នាំទៀត ប្រសិនមើលតាមកាសែត គេនាំមុខខ្ញុំច្រើន» ។
Conor McGregor ដែលត្រូវបានអ្នកជំនាញប្រដាល់ព្យាករទុកថា មានសង្ឃឹមតិចតួចបំផុតក្នុងការយកឈ្នះការប្រកួតប្រដាល់អាជីពជាលើកទី១របស់គេនោះ បានអួតក្ដែងៗថា៖« ខ្ញុំត្រៀមខ្លួនរួចរាល់ក្នុងការបង្កើតឱ្យមានការភ្ញាក់ផ្អើលក្នុងពិភពប្រដាល់ ។
នេះមិនមែនជាការប្រកួតដ៏ស្វិតស្វាញបំផុតរបស់ខ្ញុំឡើយ ។ ខ្ញុំនឹងបំបែករូបគេជាបំណែកៗដោយសារខ្ញុំបានសម្របខ្លួនយ៉ាងល្អឥតខ្ចោះទៅកាន់កីឡាប្រដាល់ ។ ខ្ញុំពិតជាមនុស្សពិសេសម្នាក់ ហើយខ្ញុំហ៊ានប្រាប់លោកអ្នកជាមុនថា ការប្រកួតនៅថ្ងៃនោះនឹងចំណាយពេលត្រឹមតែ១ ទឹកឬ២ទឹកប៉ុណ្ណោះ ខ្ញុំនឹងវាយឱ្យគេសន្លប់ និងផ្តល់ការចុកចាប់ដល់រូបគេ ខ្ញុំនឹងមិនអាណិតអាសូរឡើយ ។ ខ្ញុំជឿជាក់ថា រូបគេនឹងសន្លប់ក្នុងទឹកទី១»។
ចុះលោកអ្នកវិញយល់ឃើញយ៉ាងណាដែរ រវាងកីឡាករទាំងពីរតើមួយណាសក្តិសមជាអធិរាជនៅលើសង្វៀនប្រដាល់នៅព្រឹកថ្ងៃអាទិត្យនោះ ?
ចែករំលែកព័តមាននេះ