វិបត្តិរថយន្តប្រើប្រាស់ប្រេងម៉ាស៊ូតអាចនឹងប៉ះពាល់ដល់សេដ្ឋកិច្ច
វិបត្តិទាក់ទិននឹងរថយន្តចាស់ៗដែលប្រើប្រាស់ប្រេងម៉ាស៊ូត អាចនឹងប៉ះពាល់ដល់សេដ្ឋកិច្ចអាល្លឺម៉ង់ ។
រដ្ឋាភិបាលអាល្លឺម៉ង់បាននិយាយកាលពីថ្ងៃចន្ទថា
ប្រទេសអាល្លឺម៉ង់ ៖ វិបត្តិទាក់ទិននឹងរថយន្តចាស់ៗដែលប្រើប្រាស់ប្រេងម៉ាស៊ូត អាចនឹងប៉ះពាល់ដល់សេដ្ឋកិច្ចអាល្លឺម៉ង់ ។
រដ្ឋាភិបាលអាល្លឺម៉ង់បាននិយាយកាលពីថ្ងៃចន្ទថា បើទោះជាពួកគេមិនអាចដឹងពីកម្រិតប៉ះពាល់នាពេលនេះក្តី ក៏មិនអាចមើលរំលងហានិភ័យដល់ការលូតលាស់នាពេលអនាគតទេ ។
ក្រសួងហិរញ្ញវត្ថុរបស់ប្រទេសនេះបានដាក់វិបត្តិរថយន្តប្រើប្រាស់ប្រេងម៉ាស៊ូតក្នុងបញ្ជីគំរាមកំហែងសេដ្ឋកិច្ច ក្នុងរបាយការណ៍ប្រចាំខែសីហា និងការចរចា Brexit ជាមួយចក្រភពអង់គ្លេស រួមទាំងគោលជំហរការពារនិយមរបស់លោកត្រាំ ទាក់ទិននឹងការធ្វើពាណិជ្ជកម្មផងដែរ ។
អាល្លឺម៉ង់ គឺជាប្រទេសជំរុញដល់សេដ្ឋកិច្ចអឺរ៉ុបធំជាងគេ ហើយក៏កំពុងតែលូតលាស់យ៉ាងលឿន ប៉ុន្តែមានរឿងអាស្រូវទាក់ទិននឹងលោកស្រីអធិការបតី Angela Merkel កំពុងចង់បន្តតំណែងអាណត្តិទី៤ នាថ្ងៃទី២៤ កញ្ញា ខាងមុខ ។
ក្រសួងខាងលើនិយាយថា ទិន្នន័យ និងការស្ទង់មតិបង្ហាញថា សេដ្ឋកិច្ចកំពុងតែឈានទៅរកត្រីមាសដ៏ល្អមួយទៀតចាប់ពីខែមិថុនា ដល់ខែកញ្ញានេះ ។
ពួកគេបន្ថែមថា ៖« ប៉ុន្តែការប៉ះពាល់ដល់សេដ្ឋកិច្ចអាល្លឺម៉ង់ ដែលអាចបង្កឡើងដោយវិបត្តិរថយន្តប្រើប្រេងម៉ាស៊ូត គឺមិនទាន់មើលដឹងនាបច្ចុប្បន្នកាលទេ ព្រោះតែសារសំខាន់របស់វិស័យយានយន្ត វិបត្តិនេះអាចនឹងជាហានិភ័យក្នុងរយៈពេលមធ្យមសម្រាប់ការអភិវឌ្ឍសេដ្ឋកិច្ចទាំងស្រុង » ។
យានយន្ត គឺជាផ្នែកធំបំផុតក្នុងវិស័យឧស្សាហកម្មអាល្លឺម៉ង់ ។ វិស័យនេះបាននាំចេញច្រើនជាងគេ និងផ្តល់ការងារដល់ពលរដ្ឋប្រមាណ៨០ម៉ឺននាក់ក្នុងប្រទេសនេះ ។
រឿងអាស្រូវទាក់ទិននឹងរថយន្តប្រើប្រាស់ប្រេងម៉ាស៊ូតបានកើតឡើងជិត២ឆ្នាំមកហើយ នៅពេលក្រុមហ៊ុន Volkswagen ទទួលស្គាល់ថា ពួកគេបានបន្លំកម្រិតបញ្ចេញជាតិពុល តាមរយៈការប្រើប្រាស់ Software ដែលអាចធ្វើឲ្យម៉ាស៊ីនបញ្ចេញជាតិពុលតិចពេលកំពុងសាកល្បង។ តាំងពីពេលនោះមក ក្រុមហ៊ុនយានយន្តកាន់តែច្រើនត្រូវបានស៊ើបអង្កេត ។
សម្ពាធលើវិស័យនេះបានកើនឡើងកាន់តែខ្លាំងក្នុងរយៈពេលប៉ុន្មានសប្តាហ៍ថ្មីៗនេះ បន្ទាប់ពីមន្ត្រីប្រឆាំងនឹងភាពផ្តាច់មុខរបស់អឺរ៉ុបនិយាយថា ពួកគេកំពុងស៊ើបអង្កេតពីការអះអាងថា វិស័យយានយន្តរបស់អាល្លឺម៉ង់បានដំណើរការជាក្រុមលក់ផ្តាច់មុខខុសច្បាប់អស់រយៈពេលជាច្រើនឆ្នាំមកហើយ ។
ទីក្រុងអាល្លឺម៉ង់មួយចំនួនគំរាមថា នឹងហាមឃាត់ការប្រើប្រាស់រថយន្តប្រើប្រេងម៉ាស៊ូតផងដែរ ព្រោះតែបារម្ភពីបរិយាកាសកខ្វក់កើនឡើង ៕
ចែករំលែកព័តមាននេះ