រាជធានីភ្នំពេញ ៖ ការរៀបចំធ្វើស្រែតាមបែបចុះកិច្ចសន្យា ជាការជួយកសិករឲ្យមានលំនឹងក្នុងចិត្ត និងជំរុញធ្វើយ៉ាងណា ឲ្យកសិករផលិតពូជសុទ្ធមានគុណភាពល្អដើម្បីងាយស្រួលនាំចេញ និងប្រកួតប្រជែងជាមួយប្រទេសនាំចេញអង្ករនានា ។
ថ្លែងនៅក្នុងសិក្ខាសាលាពិគ្រោះយោបល់មួយដែលប្រារព្ធធ្វើឡើងកាលពីថ្ងៃទី១៧ សីហា កន្លងមក លោក វេង សាខុន រដ្ឋមន្ត្រីក្រសួងកសិកម្ម រុុក្ខាប្រមាញ់ និងនេសាទ បានលើកឡើងថា ការធ្វើកសិកម្មតាមកិច្ចសន្យា គឺដើម្បីឈានទៅផ្តល់ភាពស្មោះត្រង់ដល់ការផ្គត់ផ្គង់សេចក្តីត្រូវការរបស់ទីផ្សារ ប៉ុន្តែប្រសិនបើគ្មានការអនុវត្តការធ្វើកសិកម្មតាមកិច្ចសន្យាទេ នឹងបាត់បង់ទំនុកចិត្តលើទីផ្សារ ។
ក្នុងឱកាសនោះ លោករដ្ឋមន្ត្រីបានជំរុញផលិតករ និងប្រជាកសិករឲ្យលើកកម្ពស់បច្ចេកទេសដាំដុះ ពង្រឹងគុណភាព និងការវេចខ្ចប់ផលិតផលកសិកម្ម សំដៅឆ្លើយតបតាមតម្រូវការទីផ្សារនៃប្រទេសនាំចូល ។
លោករដ្ឋមន្ត្រីបានបញ្ជាក់ថា ៖« នៅក្នុងឆ្នាំ២០១៦ ការនាំចេញវិស័យកសិកម្មបានកើនឡើងដល់ទៅ៥ពាន់លានដុល្លារ ប៉ុន្តែទិន្នន័យនេះនឹងបន្តកើនឡើងថែមទៀត បើសិនកម្ពុជាអាចដោះស្រាយបញ្ហាភូតគាមអនាម័យ និងមានហេដ្ឋារចនាសម្ព័ន្ធគ្រប់គ្រាន់សម្រាប់បម្រើការផលិត និងការនាំចេញកសិផល » ។
លោកបណ្ឌិត ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម បានមានប្រសាសន៍តាមទូរស័ព្ទកាលពីថ្ងៃទី២៤ សីហា ម្សិលមិញថា ការអនុវត្តកសិកម្មតាមកិច្ចសន្យា ជាគោលនយោបាយសំខាន់មួយរបស់ក្រសួងកសិកម្ម ដើម្បីតម្រង់ទិសទីផ្សារជូនកសិករ និងបញ្ចៀសការធ្លាក់ថ្លៃនៅពេលកសិករប្រមូលផលកសិកម្មម្តងៗ ។
លោកបណ្ឌិតបន្តថា ៖« ការអនុវត្តកសិកម្ម តាមកិច្ចសន្យានេះ ធ្វើឱ្យអ្នកដាំដុះបានដឹងជាមុនថា ដៃគូដែលបានចុះកិច្ចសន្យាជាមួយគាត់នេះ ចង់ទិញអី ចំនួនប៉ុន្មាន ហើយត្រូវប្រមូលផលនៅពេលណា មុននឹងគាត់ចាប់ផ្តើមដាំដុះដំណាំអ្វីមួយ ។ ផ្ទុយមកវិញ សម្រាប់កសិករមិនបានអនុវត្តកសិកម្មតាមកិច្ចសន្យា ខណៈការដាំដុះតាមរយៈការយល់ឃើញតគ្នា ដល់ពេលរដូវប្រមូលផលឈានចូលមកដល់ គឺអត់មានអ្នកប្រមូលទិញកសិផល » ។
លោកឧកញ៉ា សុង សារ៉ន អគ្គនាយកក្រុមហ៊ុនអេមរុ រាយស៍ ជាក្រុមហ៊ុននាំចេញអង្ករធំមួយនៅកម្ពុជា កន្លងមកបានគាំទ្រគោលនយោបាយធ្វើកសិកម្មតាមកិច្ចសន្យានេះ ដោយលោកថ្លែងថា ការដាក់ចេញនូវគោលនយោបាយនេះ ជារឿងល្អដើម្បីលើកស្ទួយជីវភាពកសិករ និងការទទួលបានអង្ករមានគុណភាពល្អ។
លោកបន្តថា កន្លងមក ក្រុមហ៊ុនរបស់លោកបានធ្វើស្រែចុះកិច្ចសន្យាជាមួយសហគមន៍កសិករនៅខេត្តមួយចំនួនដូចជា ព្រះវិហារ ពោធិ៍សាត់ បាត់ដំបង និងកំពង់ចាមមួយចំនួនហើយ ។ លោកថា ៖« អ្វីសំខាន់ គឺរឿងទីផ្សារ ប្រសិនជាយើងមានទីផ្សារនាំចេញច្រើន យើងអាចធ្វើស្រែចុះកិច្ចសន្យាជាមួយកសិករបានច្រើន ប៉ុន្តែយើងប្រឈមនឹងហានិភ័យនៃការខាតបង់ ប្រសិនជាយើងគ្មានទីផ្សារ » ។
លោករដ្ឋមន្ត្រីក្រសួងកសិកម្ម ក៏បានកោតសរសើរចំពោះក្រុមហ៊ុនអេមរុ រាយស៍ផងដែរ ដែលបានធ្វើការយ៉ាងល្អប្រសើរជាមួយមន្ទីរកសិកម្មខេត្តព្រះវិហារ និងចុះកិច្ចសន្យាជាមួយសហគមន៍កសិកម្មជាមួយក្រុមហ៊ុនអេមរុ រាយស៍ ដើម្បីនាំចេញអង្ករសរីរាង្គ ។
បើតាមលោកឧកញ៉ា សុង សារ៉ន នៅក្នុងឆ្នាំ២០១៧នេះ ក្រុមហ៊ុនរបស់លោកគ្រោងនាំចេញអង្ករសរីរាង្គចំនួន៨ពាន់តោនទៅកាន់ទីផ្សារក្រៅប្រទេស ខណៈទីផ្សារក្នុងស្រុកក៏កំពុងមានកំណើនខ្ពស់ផងដែរ ។
គួរបញ្ជាក់ថា រាជរដ្ឋាភិបាលបានចេញនូវអនុក្រឹត្យលេខ៣៦ អនក្រ ចុះថ្ងៃទី២២ កុម្ភៈ ឆ្នាំ២០១១ ដើម្បីឲ្យក្រសួងកសិកម្មរៀបចំគណៈកម្មការមួយឈានទៅដល់ការរៀបចំគាំទ្រចុះកិច្ចសន្យារវាងវិស័យឯកជន និងសហគមន៍កសិកម្ម ដែលមានពាក់ព័ន្ធនឹងក្រសួងចំនួន១៨ ត្រូវចូលរួមជាសមាជិក ប៉ុន្តែអនុក្រឹត្យនោះហាក់ដូចពុំសូវមានសកម្មភាព ទើបតែពេលនេះ លោក វេង សាខុន រដ្ឋមន្ត្រីក្រសួងកសិកម្ម បានខិតខំជំរុញធ្វើយ៉ាងណា ឲ្យការអនុវត្តអនុក្រឹត្យនេះមានសកម្មភាពឡើងវិញ ៕
ចែករំលែកព័តមាននេះ