ក្រោយប៉ះទង្គិចខ្លាំងមួយប្រាវ រវាងសន្តិសុខ និងស្ត្រីលក់បបរមុខពេទ្យរុស្ស៊ី…
បន្ទាប់ពីមានការបង្ហោះហ្វេសប៊ុកដោយចោទថា
បន្ទាប់ពីមានការបង្ហោះហ្វេសប៊ុកដោយចោទថា
រាជធានីភ្នំពេញ ៖ ក្រោយពីមានការប៉ះទង្គិចគ្នាមួយប្រាវ រវាងក្រុមសន្តិសុខរបស់សាលាខណ្ឌចំការមន ជាមួយនឹងស្ត្រីរែកបបរលក់មុខមន្ទីរពេទ្យមិត្តភាពខ្មែរ-សូវៀត(មន្ទីរពេទ្យរុស្ស៊ី) បណ្តាលឱ្យកំពប់បបរ កាលពីល្ងាចថ្ងៃទី២១ សីហា បានក្លាយទៅជាការចាប់អារម្មណ៍ពីសាធារណជន បន្ទាប់ពីមានការបង្ហោះហ្វេសប៊ុកដោយចោទថា ចំណាត់ការរបស់អាជ្ញាធរបែបនេះគឺជ្រុលពេកហើយ និងពិតជាអាក្រក់មើលខ្លាំងណាស់ ដែលសន្តិសុខម្នាក់ហ៊ានទាត់ឆ្នាំងបបរឱ្យកំពប់ខ្ចាយ បង្កឱ្យមានការស្រែកយំពីស្ត្រីអ្នករែកលក់។
ការប្រឹងប្រែងរៀបចំសណ្តាប់ធ្នាប់នៅមុខមន្ទីរពេទ្យនេះ ពិតជាទទួលបានការគាំទ្រសម្រាប់អ្នកធ្វើដំណើរឆ្លងកាត់ចំណុចខាងលើ ដោយសារតែមានការធុញទ្រាន់ចំពោះការលក់ដូរផ្សេងៗនៅមុខមន្ទីរពេទ្យនេះដែលធ្វើឱ្យប៉ះពាល់ដល់សណ្តាប់ធ្នាប់ និងកកស្ទះចរាចរណ៍ ។ ប៉ុន្តែអ្វីដែលទឹកភ្នែកធ្លាក់មកលើស្ត្រីរែកបបរលក់តូចតាចម្នាក់ ពិតជាមិនគប្បីធ្វើព្រៃផ្សៃបែបនេះឡើយ ក្នុងការព្យាយាមលុបបំបាត់ការលក់ដូរនៅមុខមន្ទីរពេទ្យនេះ ។
នាព្រឹកថ្ងៃទី២២ ខែសីហា លោក ព្រុំ សំខាន់ អភិបាលខខណ្ឌចំការមន បានដឹកនាំកម្លាំងដោយផ្ទាល់ចុះទៅរៀបចំសណ្តាប់ធ្នាប់ជាបន្តនិងប្រកាសថា អាជ្ញាធរខណ្ឌហាមមិនឱ្យមានការលក់ដូរនៅតាមចិញ្ចើមផ្លូវ និងបរិវេណខាងមុខមន្ទីរពេទ្យតទៅទៀតទេ ។
លោក ព្រុំ សំខាន់ ថ្លែងថា ក្នុងនាមរូបលោកជាអភិបាលខណ្ឌ សូមសម្តែងនូវការសោកស្តាយយ៉ាងខ្លាំងចំពោះកម្លាំងសណ្តាប់ធ្នាប់របស់លោកដែលមានការជ្រុលជ្រួសប៉ះទង្គិចជាមួយនឹងស្ត្រីអ្នកលក់បបរម្នាក់ បណ្តាលឱ្យកំពប់ឆ្នាំងបបររបស់គាត់ ក្នុងពេលចុះរៀបចំសណ្តាប់ធ្នាប់កាលពីថ្ងៃទី២១ ខែសីហា ។
ក្រោយពីកើតហេតុនោះភ្លាម លោកក៏បានធ្វើការប៉ះប៉ូវសតិអារម្មណ៍ជាមួយនឹងស្ត្រីអ្នកលក់បបររូបនេះ ដោយបានសងជាសំណងថ្លៃខូចខាតចំនួន៤០ម៉ឺនរៀលផងដែរ ។ ចំណែកឯកម្លាំងសន្តិសុខវិញ លោកក៏បានហៅយកទៅធ្វើការ ណែនាំដែរ តែមិនបានបញ្ឈប់ពីការងារឡើយ ។
លោកអភិបាលខណ្ឌថ្លែងទៀតថា ក្រោយពេលកើតមានការប៉ះទង្គិចកាលពីថ្ងៃទី២១ ខែសីហារួចមក ក្នុងថ្ងៃនេះដែររូបលោកក៏បានបន្តដឹកនាំកងកម្លាំងចុះមករៀបចំសណ្តាប់ធ្នាប់ជាបន្តទៀត ដោយកន្លែងនេះមិនអាចឲ្យពួកគាត់យកទៅធ្វើជាកន្លែងលក់ដូរជាបន្តទៀតបានទេ ។យើងត្រូវរកកន្លែងផ្សេងឱ្យពួកគាត់លក់ដូរ ហើយកន្លងមក រូបលោកក៏ធ្លាប់បានពិភាក្សាជាមួយនឹងនាយករងរបស់មន្ទីរពេទ្យ ដើម្បីសុំរកកន្លែងណាមួយឱ្យពួកគាត់បានលក់ដូរផងដែរ។
ដោយឆ្លងកាត់តាមការណែរនាំរបស់លោក អភិបាលរាជធានីភ្នំពេញនោះ កម្លាំងរបស់លោកតែងតែចុះរៀបចំសណ្តាប់ធ្នាប់នៅគ្រប់ទីកន្លែងទូទាំងខណ្ឌ ។ ណាមួយទីនេះគឺជាមន្ទីរពេទ្យគេត្រូវការស្អាត ណាមួយទៀតការលក់ដូររបស់ពួកគាត់ធ្វើឲ្យប៉ះពាល់ដលសណ្តាប់ធ្នាប់សារធារណៈយ៉ាងខ្លាំង ជាពិសេសធ្វើឲ្យស្ទះចរាចរណ៍ដល់អ្នកដំណើរតាមផ្លូវស្ទើរតែរាល់ថ្ងៃ ។ ដូចនេះហើយ សុំបងប្អូនអាជីវករមេត្តាយោគយល់ទៅដល់ចំណុចនេះ ក៏ដូចជាអាជ្ញាធរមូលដ្ឋានផងដែរ ។
ស្ត្រីម្នាក់ឈ្មោះហៃ សារឿន អាយុ៤៣ឆ្នាំនិយាយថា រូបគាត់ជាស្ត្រីមេម៉ាយចិញ្ចឹមកូនប្រុសស្រីចំនួន៣នាក់នៅក្នុងបន្ទុក រស់នៅក្នុងជីវភាពខ្វះខាតយ៉ាងខ្លាំង ដោយប្រកបរបរលក់នំបុ័ងដាក់សាច់បន្តិចបន្តួចនៅខាងមុខមន្ទីរពេទ្យរុស្ស៊ីដើម្បីបានប្រាប់យកទៅចិញ្ចឹកកូន និងបង់ថ្លៃផ្ទះជួលផង ។ ក្នុងនាមរូបគាត់ម្នាក់ដែលមានជីវភាពក្រីក្រ និងគ្មានប្រាក់ទៅរកជួលតាមមុខផ្ទះគេដើម្បីលក់ដូរនោះ រូបគាត់ក៏សុំការអនុញ្ញាតបានលក់ដូរនៅទីតាំងខាងលើផង ដោយសន្យាថា នឹងធ្វើការសម្អាតឲ្យបានស្អាត ក្រោយពេល
ឈប់លក់ជាប្រចាំរាល់ថ្ងៃ បើមិនដូច្នោះទេគ្រួសារគាត់នឹងជួបបញ្ហាធ្ងន់ធ្ងរជាងនេះមិនខាន ។
គួរបញ្ជាក់ថា កន្លងមកនេះនៅខាងមុខមន្ទីរពេទ្យមិត្តភាពខ្មែរ-សូវៀត មានប្រជាពលរដ្ឋយ៉ាងច្រើនកុះករនាំគ្នាទៅលក់ដូរដូចជា តាមរទេះ កូនគ្រែ ដឹកតាមកង់ និងរែកក៏មាន ។ ទន្ទឹមនឹងនេះ ក៏តែងតែមានការកកស្ទះចរាចរណ៍យ៉ាងខ្លាំងរាប់ម៉ោងផងដែរ ។
បើមានការរៀបចំសណ្តាប់ធ្នាប់នៅចំណុចនេះបានទទួលជោគជ័យ គឺពិតជាស្នាដៃរបស់អាជ្ញាធរ ហើយអ្នកធ្វើដំណើរតាមដងផ្លូវនេះពិតជាសាទររាល់វិធានការធ្វើឱ្យមានសណ្តាប់ធ្នាប់ល្អនេះ ។
ប៉ុន្តែបញ្ហាចោទនៅត្រង់ថា តើអ្នកលក់ដូរដែលជាជនក្រីក្រអាចមានវិធីបែបណាជួយពួកគាត់បាន ? ចំណែកអ្នកជំងឺដែលមកសម្រាកព្យាបាលនៅមន្ទីរពេទ្យ ក៏មានតម្រូវការទិញម្ហូបអាហារនិងផ្លែឈើដែរ ។ សង្ឃឹមថា អាជ្ញាធរនឹងរៀបរយបញ្ហាស្មុគស្មាញនេះ ឱ្យទទួលយកបានទាំងអស់គ្នាជាមិនខាន ៕
ចែករំលែកព័តមាននេះ