ទូរស័ព្ទស្មាតហ្វូនអាចវិនិច្ឆ័យជំងឺ តាមរយៈឧបករណ៍អេឡិចត្រូនិក
ក្រុមអ្នកវិទ្យាសាស្ត្របានបង្កើតឧបករណ៍អាចភ្ជាប់នឹងទូរស័ព្ទស្មាតហ្វូន ដើម្បី
ក្រុមអ្នកវិទ្យាសាស្ត្របានបង្កើតឧបករណ៍អាចភ្ជាប់នឹងទូរស័ព្ទស្មាតហ្វូន ដើម្បីធ្វើតេស្តរករោគវិនិច្ឆ័យវេជ្ជសាស្ដ្រ ។ កម្រិតនៃការធ្វើតេស្តរបស់ឧបករណ៍នេះ គឺដូចគ្នានឹងការធ្វើតេស្តរបស់មន្ទីរពិសោធន៍ ។
ឧបករណ៍វិភាគអេឡិចត្រូនិក Transmission-reflectance-intensity (TRI) មានតម្លៃ៥៥០ដុល្លារអាមេរិក ។ វាអាចភ្ជាប់ទៅនឹងទូរស័ព្ទស្មាតហ្វូន ដើម្បីវិភាគគំរូឈាម ទឹកនោម ឬទឹកមាត់របស់អ្នកជំងឺ ហើយវាអាចជឿជាក់បានដូចនឹងឧបករណ៍នៅគ្លីនិក ដែលមានតម្លៃរាប់ពាន់ដុល្លារ ។
លោក Brian Cunningham សាស្ត្រា- ចារ្យនៅសាកលវិទ្យាល័យ Illinois នៅ Urbana-Champaign សហរដ្ឋអាមេរិក និយាយថា ៖« ឧបករណ៍វិភាគ TRI របស់យើង គឺដូចជាកាំបិតមួយដែលមានមុខងារច្រើនទាក់ទងនឹងការវិភាគជីវសាស្ត្រ ។ វាមានសមត្ថភាពធ្វើតេស្តប្រភេទសាមញ្ញបំផុតចំនួន៣ » ។
តើវាជួយយើងរបៀបណា ?
ក្រុមអ្នកស្រាវជ្រាវបានប្រើប្រាស់ឧបករណ៍វិភាគ TRI ដើម្បីវិភាគគំរូ២ ដោយធ្វើតេស្តទៅលើស្ត្រីមានផ្ទៃពោះ ទាក់ទងនឹងការសម្រាលកូនមិនគ្រប់ខែ និងធ្វើតេស្ត Phenylketonuria (PKU) សម្រាប់ទារកទើបនឹងកើត ។ គេបានវិភាគជាប្រយោលរកមើលអង់ហ្ស៊ីមមានសារសំខាន់សម្រាប់ការលូតលាស់ និងការអភិវឌ្ឍធម្មតារបស់ទារក ។
លទ្ធផលនៃការធ្វើតេស្តរបស់ពួកគេ គឺអាចប្រៀបធៀបនឹងលទ្ធផលដែលទទួលបានពីឧបករណ៍ធ្វើតេស្តកម្រិតគ្លីនិក ។ លោក Kenny Long អ្នកដឹកនាំការស្រាវជ្រាវ ដែលត្រូវបានចេញផ្សាយក្នុងព្រឹត្តិបត្រ Lab on a chip និយាយថា ៖« ឧបករណ៍វិភាគ TRI គឺដូចគ្នានឹងមន្ទីរពិសោធន៍ចល័តមួយ ជាងឧបករណ៍ឯកទេស » ។
ក្នុងចំណោមការធ្វើតេស្តរោគវិនិច្ឆ័យជាច្រើន ដែលអាចប្រើជាមួយទូរស័ព្ទស្មាតហ្វូន គឺការធ្វើតេស្ត ELISA អាចរកឃើញ និងវាស់វែងនូវប្រូតេអីុន និងអង្គបដិបក្ខជាច្រើននៅក្នុងឈាម ហើយត្រូវបានគេប្រើជាទូទៅសម្រាប់ធ្វើតេស្តសុខភាពជាច្រើន ។
ឧបករណ៍វិភាគ TRI ដំណើរការដោយប្រើប្រាស់កាមេរ៉ាស្មាតហ្វូន គឺមានតួនាទីដូចនឹងឧបករណ៍ Spectrometer មានដំណើរការខ្លាំង។ វាអាចវាស់ស្ទង់គំរូជាច្រើនក្នុងពេលដំណាលគ្នាផងដែរ ។
សមត្ថភាពអាចវិភាគគំរូជាច្រើនយ៉ាងឆាប់រហ័ស និងជឿទុកចិត្តបាន ធ្វើឱ្យឧបករណ៍វិភាគនេះសមស្របជាមួយអ្នកជំងឺដែលគ្មានលទ្ធភាពគ្រប់គ្រាន់ទៅធ្វើតេស្តនៅតាមគ្លីនិក មន្ទីរពេទ្យ ឬសម្រាប់អ្នកជំងឺត្រូវការលទ្ធផលធ្វើតេស្តភ្លាមៗ ៕
ចែករំលែកព័តមាននេះ