ដឹងអត់ហ្នឹង? សួនច្បារយក្សនឹងស្ថិតនៅទីណា…
ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោហ៊ុន សែន បានប្រកាសឱ្យ
ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោហ៊ុន សែន បានប្រកាសឱ្យ
ខេត្តមណ្ឌលគិរី ៖ ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោហ៊ុន សែន បានប្រកាសឱ្យអាជ្ញាធររៀបចំអតីតអាកាសយានដ្ឋានកណ្តាលក្រុងសែនមនោរម្យទៅជាសួនច្បារ និងសួនកម្សាន្ត ។ វាជាសួនច្បារធំជាងគេនៅកម្ពុជា ។
កាលពីព្រឹកថ្ងៃទី២២ សីហា ឆ្នាំ២០១៧ សម្តេចតេជោហ៊ុន សែន នៅក្នុងវេទិកាជាតិលើកទី២ស្តីពី«ការការពារ និងអភិរក្សធនធានធម្មជាតិ»នៅវិមានសន្តិភាពបានថ្លែងថា អាកាសយានដ្ឋានក្នុងខេត្តមណ្ឌលគិរី មិនប្រគល់ឱ្យទៅឯកជនទេ តែរាជរដ្ឋាភិបាលនឹងអភិវឌ្ឍន៍ឱ្យក្លាយទៅជា«សួនច្បារយក្ស»ដ៏ស្រស់ស្អាតសម្រាប់អ្នកទេសចរជាតិ និងអន្តរជាតិ ។
សម្តេចតេជោហ៊ុន សែន ថ្លែងថា«ទីក្រុងដែលគួរឱ្យកោតសរសើរ និងក្លាយជាទីក្រុងដែលមានផ្លូវល្អនាពេលអនាគត គឺទីក្រុងបានលុង នៃខេត្តរតនគិរី ក្រុងសំរោងនៃខេត្តឧត្តរមានជ័យ និងក្រុងសែនមនោរម្យ ខេត្តមណ្ឌលគិរី នឹងក្លាយទៅជាទីក្រុងដ៏ល្អនាពេលអនាគតសម្រាប់បម្រើវិស័យទេសចរណ៍ ។
ម្យ៉ាងទៀតខ្ញុំទុកដីព្រលានយន្តហោះទាំងអស់ឱ្យធ្វើសួនច្បារ ។ គេសុំវិនិយោគធ្វើផ្ទះ ធ្វើផ្សារអី…គឺអត់ទេ ! ទុកអាហ្នឹងធ្វើសួនច្បារឱ្យទៅជាសួនច្បារយក្សដែលចង់មើលថ្ងៃក្រោយ គឺសួនច្បារនៅមណ្ឌលគិរីតែម្តង។ ព្រោះខ្ញុំចង់ប្រើប្រាស់ព្រលានយន្តហោះចាស់ឱ្យទៅជាសួនច្បារសម្រាប់ប្រជាពលរដ្ឋដើរលេង ហាត់ប្រាណ» ។
អ្នករស់នៅក្នុងក្រុងសែនមនោរម្យ ខេត្តមណ្ឌលគីរី បាននិយាយថាតាមបណ្តោយផ្លូវជាតិលេខ៧៦ ពីរង្វង់មូលគោព្រៃឆ្ពោះទៅរមណីយដ្ឋានទឹកជ្រោះប៊ូស្រា ដែលទើបស្ថាបនាផ្លូវថ្មី និងសួនច្បារលម្អតាមដងផ្លូវ ជួយលើកសម្រស់ក្រុងសែនមនោរម្យ ឱ្យកាន់តែមានភាពទាក់ទាញគួរជាទីមនោរម្យ ។
កន្លងមកអាកាសយានដ្ឋានដែលមានទីតាំងនៅចំកណ្តាលក្រុងសែនមនោរម្យ គឺជាមធ្យោបាយធ្វើដំណើរដ៏សំខាន់សម្រាប់អ្នករស់នៅខេត្តមណ្ឌលគិរី ព្រោះតាំងពីក្រោយរបបប៉ុល ពតមក ខេត្តមួយនេះជាតំបន់ដាច់ស្រយាលដ៏តូចមួយ មិនមានប្រព័ន្ឋគមនាគមន៍សម្រាប់ធ្វើដំណើរទេ ។
បើចង់ជិះរថយន្តទាល់តែជិះវាងតាមប្រទេសវៀតណាម ដូច្នេះហើយទើបរដ្ឋបង្កើតឱ្យមានការហោះហើរពីភ្នំពេញ និងពីខេត្តមួយចំនួនឆ្ពោះទៅខេត្តមណ្ឌលគិរី ដើម្បីកាត់បន្ថយពេលវេលានៃការធ្វើដំណើរដោយខ្ចីផ្លូវប្រទេសជិតខាង ។
ក្រោយផ្លូវជាតិលេខ៧៦បើកសម្ពោធឱ្យប្រើប្រាស់ជាផ្លូវការនៅដើមឆ្នាំ២០១២មកអាកាសយានដ្ឋានដែលធ្លាប់មានសកម្មភាពបម្រើដល់វិស័យដឹកជញ្ជូនសម្រាប់អ្នកខេត្តមណ្ឌលគិរី បានផ្អាកសកម្មភាពរបស់ខ្លួន ហើយសម្តេចប្រមុខរាជរដ្ឋាភិបាលប្រកាសពីការអភិវឌ្ឍទីនោះទៅជាសួនច្បារដ៏ធំជាងគេក្នុងប្រទេសកម្ពុជា ដោយមានឈ្មោះថា«សួនច្បារសម្តេចតេជោសែន-រ៉ានី» ។
សេចក្តីសម្រេចលេខ០០១ដនស.សសរ ចុះថ្ងៃទី២ មករា ២០១៧ បានបង្កើតក្រុមការងារចំពោះកិច្ចសិក្សារៀបចំប្លង់មេ និងតាមដានការអនុវត្តគម្រោងសាងសង់«សួនច្បារសម្តេចតេជោសែន រ៉ានី» ។ សួនច្បារនេះមានទំហំ២១២.៥៥៣ម៉ែត្រក្រឡា បណ្តោយប្រវែង១.២០០ម៉ែត្រ មានលក្ខណៈជាសួនឧទ្យានរុក្ខសាស្ត្រ រៀបចំដាំដុះរុក្ខជាតិសម្បូរបែប ក្នុងគោលបំណងសិក្សាស្រាវជ្រាវ ការកម្សាន្ត និងទស្សនា ។ វាជាការរួមចំណែកលើកស្ទួយសក្តានុពលវិស័យទេសចរណ៍ ដើម្បីទាក់ទាញភ្ញៀវជាតិ អន្តរជាតិ ឱ្យទៅលេងកម្សាន្តនៅក្នុងខេត្តមណ្ឌលគិរី ក្រៅពីតំបន់ទេសចរណ៍ដទៃទៀត ។
ការរៀបចំសួនឧទ្យានបែបនោះ គឺអាចប្រើប្រាស់បានសម្រាប់មនុស្សទាំងអស់គ្នា ដោយរៀបចំក្រាលថ្មក្រានីត ជាកន្លែងក្មេងលេង កន្លែងហាត់ប្រាណ កន្លែងតាំងពិព័រណ៍ មណ្ឌលកីឡា លំហពហុមុខងារ កន្លែងវិនិយោគ និងបង្គន់អនាម័យសាធារណៈជាដើម ។
លោកឡុង វិបុល អភិបាលក្រុងសែនមនោរម្យថ្លែងថា នៅឆ្នាំ២០១៧-២០១៨នឹងអភិវឌ្ឍន៍ឱ្យក្លាយទៅជាសួនច្បារតេជោសែន-រ៉ានី ។ ក្រោមការដឹកនាំកសាងដោយលោកជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ ដោយមានការបែងចែក ជាផ្នែកៗ។ នៅពេលគម្រោងនេះដំណើរការរួចរាល់ នឹងប្រគល់ឱ្យទៅខាងណាមួយសម្រាប់គ្រប់គ្រង ហើយនៅពេលនោះនឹងមានអ្នកមើលការខុសត្រូវច្បាស់លាស់ ។
អាជ្ញាធរនៅមិនទាន់អាចប៉ាន់ស្មានពីវេលានៃការសាងសង់សួនច្បារដ៏ធំនោះរួចរាល់នៅពេលណាទេ ព្រោះទើបតែមានការចាប់ផ្តើមជំហានដំបូងប៉ុណ្ណោះ ។ បច្ចុប្បន្នក្រុមជាងជំនាញកំពុងរៀបចំឥដ្ឋការ៉ូឡាបានមួយផ្នែកហើយ ។
ប្រជាពលរដ្ឋក្នុងក្រុងសែនមនោរម្យបានលើកឡើងថា កាលពីមុនពួកគាត់ពិបាករកកន្លែងដើរហាត់ប្រាណ ឬលេងកីឡាណាស់ ព្រោះសួនច្បារលើទ្រូងផ្លូវមានសភាពតូចចង្អៀត តែនៅពេលសម្តេចតេជោហ៊ុន សែន ប្រកាសឱ្យបង្កើតសួនច្បារលើអតីតអាកាសយានដ្ឋាន ពួកគាត់នឹងមានភាពងាយស្រួល ព្រមទាំងជាកន្លែងកម្សាន្តផង ៕
ចែករំលែកព័តមាននេះ