ទីបំផុត… ត្រូវផ្អាកនិងត្រូវរុះកែប្រព័ន្ធប្រឡាយទឹកឱ្យបានដូចដើមវិញ
អភិបាលស្រុកភ្នំព្រឹក លោកសួន គឿន បានលើកឡើងថា
អភិបាលស្រុកភ្នំព្រឹក លោកសួន គឿន បានលើកឡើងថា
ខេត្តបាត់ដំបង ៖ សំណង់រមណីយដ្ឋានរបស់មន្ត្រីគយម្នាក់ ដែលបង្កផលប៉ះពាល់ស្ទើរទាំងស្រុង ដល់ប្រព័ន្ធប្រឡាយរំដោះទឹករបស់ក្រុមហ៊ុនចិននៅលើភ្នំព្រឹក ត្រូវបានអាជ្ញាធរស្រុក ចេញលិខិតបញ្ជាឱ្យផ្អាកសកម្មភាពសាងសង់ហើយ កាលពីថ្ងៃទី២១ សីហា ក្រោយពីមានការរិះគន់ខ្លាំងៗពីមហាជន មន្ត្រីនានា និងតាមបណ្ដាញសង្គមយ៉ាងចាស់ដៃផងនោះ ។ នេះបើតាមប្រភពពីមន្ត្រីសាលាស្រុកភ្នំព្រឹក ដែលបានប្រាប់កោះសន្តិភាពឱ្យដឹងនៅរសៀលថ្ងៃទី២២ សីហា ។
លោកសួន គឿន អភិបាលស្រុកភ្នំព្រឹក បានបំភ្លឺប្រាប់កោះសន្តិភាពតាមទូរស័ព្ទនៅរសៀលថ្ងៃទី២២ សីហាថា លោកពិតជាបានចេញលិខិតមួយច្បាប់ទៅកាន់ម្ចាស់សំណង់នោះ ដើម្បីឱ្យផ្អាកការសាងសង់សំណងរមណីយដ្ឋាននៅលើចង្កេះភ្នំព្រឹកមែន ។ លោកអភិបាលស្រុក បាននិយាយថា ក្រោយពីមានការរិះគន់អំពីផលប៉ះពាល់ទៅលើប្រព័ន្ធបង្ហូរទឹករបស់ក្រុមហ៊ុនចិន ដោយសារសំណង់រមណីយដ្ឋាននេះ លោកនិងមន្ត្រីមួយចំនួនបានចុះទៅពិនិត្យ ហើយមើលឃើញថា សំណង់នេះពិតជាបានបង្កផលប៉ះពាល់មែន ។ លោកសួន គឿន បានបញ្ជាក់ថា ម្ចាស់សំណង់រមណីយដ្ឋាននេះ បានសាងសង់ខ្យូសតូចៗជាកន្លែងផឹកស៊ីនៅតាមចង្កេះភ្នំប៉ែកខាងលើផ្លូវដែលជាដីរបស់រដ្ឋ រំលោភលើប្រព័ន្ធប្រឡាយបេតុង ដែលក្រុមហ៊ុនចិនបានសាងសង់សម្រាប់រំដោះទឹកបញ្ចៀសមិនឱ្យហូរច្រោះផ្លូវជាតិលេខ៥៩ ។ លោកបានបញ្ជាក់បន្ថែមថា ពេលនេះលោកបានចេញលិខិតបញ្ជាឱ្យម្ចាស់បញ្ឈប់ការសាងសង់ ហើយត្រូវដកកូនលូតូចៗចេញពីប្រឡាយបង្ហូរទឹករៀបចំធ្វើឱ្យដូចដើមវិញ ។
ចំពោះការរិះគន់ពីមហាជន និងមន្ត្រីមួយចំនួនដែលថា អាជ្ញាធរស្រុកភ្នំព្រឹក ជាអ្នកអនុញ្ញាតឱ្យមានការសាងសង់កន្លែងផឹកស៊ីរំលោភលើប្រព័ន្ធរំដោះទឹកនេះ លោកសួន គឿន អភិបាលស្រុកភ្នំព្រឹកបានបដិសេធថា លោកមិនជាប់ពាក់ព័ន្ធនឹងសំណង់រមណីយដ្ឋានខាងលើនេះទេ ហើយក៏មិនមានលិខិតអនុញ្ញាតណាមួយ ដែលលោកចុះហត្ថលេខាឯកភាពឱ្យសាងសង់ដែរ ។
បើតាមមន្ត្រីស្រុកភ្នំព្រឹកបានប្រាប់ថា សំណង់រមណីយដ្ឋានដែលសង់ជាខ្យួសតូចៗធ្វើពីដែកតាមចង្កេះភ្នំជាង៤០ខ្យូសខាងលើនេះ ជាកម្មសិទ្ធិរបស់លោកភុត ឆាយ៉ា មានតួនាទីជាអនុប្រធានការិយាល័យគយ និងរដ្ឋាកប្រចាំច្រកទ្វារតំបន់អូររំដួល ស្រុកភ្នំព្រឹក ។ មន្ត្រីដដែលនិយាយថា មន្ត្រីគយរូបនេះបានសាងសង់ស្ថានីយប្រេងដ៏ធំមួយកន្លែង និងមានគម្រោងសាងសង់រមណីយដ្ឋាន ដែលមានអាងហែលទឹកផង នៅខាងមុខស្ថានីយប្រេង រីឯមួយកន្លែងទៀតកំពុងសាងសង់ជាខ្យូសតូចៗយ៉ាងតិចជាង៤០ខ្យូសសម្រាប់អង្គុយលំហែកាយនិងជាទីតាំងផឹកស៊ីនៅតាមចង្កេះភ្នំខាងលើផ្លូវជាតិលេខ៥៩ ដែលរំលោភលើប្រព័ន្ធប្រឡាយរំដោះទឹកដែលក្រុមហ៊ុនចិនសាងសង់សម្រាប់បញ្ចៀសជំនន់ទឹកភ្លៀងហូរចុះពីភ្នំ កុំឱ្យហូរច្រោះប៉ះពាល់ផ្លូវថ្នល់នៅលើភ្នំ ហើយគេសង្ស័យថា សំណង់ទាំងនេះទំនងសុទ្ធតែគ្មានច្បាប់ទាំងអស់ ។
លោកភុត ឆាយ៉ា បានធ្វើខ្យូសផឹកស៊ីគ្របលើសំណង់បេតុង ដែលជាប្រព័ន្ធប្រឡាយសម្រាប់រំដោះទឹកមានមុខទំហំ១ម៉ែត្រ ដែលសាងសង់ដោយក្រុមហ៊ុនចិន ស្ថាបនាផ្លូវជាតិលេខ៥៩។ មិនតែប៉ុណ្ណោះ មន្ត្រីគយរូបនេះបានបញ្ជាឱ្យជាងរៀបថ្មបិទប្រព័ន្ធបង្ហូរទឹកនេះយ៉ាងរឹងម៉ាំ ហើយគេដាក់កូនលូរំដោះទឹកតូចៗដែលមានមុខ២តឹកជំនួសវិញ ។
ជុំវិញការសង់ខ្ទមតូចៗខាងលើនេះ មន្ត្រីនានា និងប្រជាពលរដ្ឋស្រុកភ្នំព្រឹកបានលើកឡើងដែរថា បញ្ហានេះមិនមែនលោកអភិបាលស្រុកមិនដឹងអំពីសកម្មភាពសាងសង់ខ្សូសលើភ្នំនេះទេ តែលោកហាក់ធ្វើព្រងើយកន្តើយថែមទាំងបណ្ដែតបណ្ដោយឱ្យមន្ត្រីគយឈ្មោះភុត ឆាយ៉ា នេះសាងសង់សំណង់យ៉ាងអនាធិបតេយ្យតាមអំពើចិត្តនៅលើភ្នំ បើទោះបង្កផលប៉ះពាល់ដល់សម្បត្តិសាធារណ:របស់រដ្ឋបែបណាក្ដី។ ប៉ុន្តែពាក់ព័ន្ធជាមួយនឹងការបង្កើតរមណីយដ្ឋានថ្មីរបស់មន្ត្រីគយដ៏មហិមានេះ គេឃើញអភិបាលរងស្រុកភ្នំព្រឹកម្នាក់ គឺលោកហែម ស៊ីណាក់ ហាក់បានប្រទាក់ក្រឡាការងារសាងសង់ខ្យូសផឹកស៊ីនេះជាមួយគ្នាយ៉ាងស្និតស្នាលបំផុត ដែលគេសង្ស័យអាចមានភាគហ៊ុនជាមួយមន្ត្រីគយនោះទៀតផង ។
នៅក្នុងរឿងនេះកោះសន្តិភាពមិនអាចទំនាក់ទំនងសុំការបំភ្លឺពីលោកហែម ស៊ីណាក់ អភិបាលរងស្រុកភ្នំព្រឹក និងលោកភុត ឆាយ៉ា ដែលជាដង្ខៅរមណីយដ្ឋានទឹកធ្លាក់ភ្នំព្រឹកបានទេនៅរសៀលថ្ងៃទី២២ សីហា ។ ប៉ុន្តែលោកភុត ឆាយ៉ា បានបញ្ជាក់ប្រាប់អ្នកសារព័ត៌មានដទៃទៀតថា សំណង់ខ្ទមដែកតូចៗដែលសង់រំលោភលើប្រព័ន្ធរំដោះទឹកនៅលើភ្នំព្រឹកនោះ ពិតជារបស់លោកមែន ហើយលោកបានបញ្ជាក់ថា ពេលនេះលោកបានផ្អាកការសាងសង់ហើយ ក្រោយពីអាជ្ញាធរស្រុកបញ្ជាឱ្យផ្អាក ។
សូមបញ្ជាក់ថា សំណង់រមណីយដ្ឋានរបស់មន្ត្រីគយ លោកភុត ឆាយ៉ា ដែលកំពង់សាងសង់នៅលើភ្នំព្រឹកនេះ ត្រូវបានមហាជន និងមន្ត្រីនានាប្រតិកម្មរិះគន់យ៉ាងខ្លាំង ជាពិសេសតាមបណ្ដាញសង្គមតែម្ដង ។ នៅក្នុងបណ្ដាញសង្គមខ្លះបានរិះគន់ធ្ងន់ៗ ថែមទាំងបានវាយប្រហារចំៗចោទអាជ្ញាធរថា បានឃុបឃិតជាមួយមន្ត្រីគយនោះដើម្បីផលប្រយោន៍ផ្ទាល់ខ្លួន ទើបមិនខ្វល់ខ្វាយពីផលប៉ះពាល់ដល់សម្បត្តិរដ្ឋ និងសណ្ដាប់ធ្នាប់សាធារណ: ។ មិនតែប៉ុណ្ណោះ ថែមទាំងបណ្ដែតបណ្ដោយឱ្យមន្ត្រីគយនោះធ្វើសកម្មភាពអភិវឌ្ឍន៍ដោយគ្មានច្បាប់ទម្លាប់តាមអំពើចិត្ត។ លុះមានប្រតិកម្មខ្លាំងពីមហាជន និងមានបទបញ្ជាពីថ្នាក់លើ ទើបអាជ្ញាធរស្រុកធ្វើជាភ្ញាក់ផ្អើលចុះទៅពិនិត្យ ហើយម្នាក់ៗឆ្លើយយករួចខ្លួនរៀងៗខ្លួន ។
បើតាមមន្ត្រីសាលាស្រុកភ្នំព្រឹកមួយរូបបានប្រាប់ថា ក្រោយពីផ្ទុះរឿងនេះ ក្រុមហ៊ុនចិនបានប្ដឹងទៅអាជ្ញាធរខេត្តដើម្បីសុំឱ្យជួយអន្តរាគមន៍រុះរើសំណង់រមណីយដ្ឋានរបស់លោក ឆាយ៉ា ដែលធ្វើរំលោភលើប្រព័ន្ធរំដោះទឹក ។ មន្ត្រីដដែលបានបញ្ជាក់ថា ក្រោយពីទទូលបានដំណឹងភ្លាម លោកអភិបាលខេត្តក៏បានកោះហៅអាជ្ញាធរស្រុកភ្នំព្រឹកមកសាលាខេត្ត ដើម្បីសួរនាំពីរឿងភ្នំព្រឹកនេះ កាលពីថ្ងៃទី២១ សីហា ។ ដូច្នេះហើយទើបលោកអភិបាលស្រុកចេញលិខិតត្របញ្ជាឱ្យថៅកែរមណីយដ្ឋានទឹកធ្លាក់នេះបញ្ឈប់ការសាងសង់ភ្លាមៗដែរ ។
អភិបាលស្រុកភ្នំព្រឹក លោកសួន គឿន បានលើកឡើងថា ជំហានដំបូងនេះ លោកបានចេញលិខិតឱ្យផ្អាកការសងសង់ ហើយម្ចាស់សំណង់ត្រូវរុះរើកែសម្រួលធ្វើប្រព័ន្ធប្រឡាយរំដោះទឹកឱ្យបានដូចដើមវិញ ។ ដោយឡែក ខ្ទមឬខ្យូសធ្វើពីដែករាប់សិបខ្នងនោះ លោកសួន គឿន បានបញ្ជាក់ថា ពេលនេះយើងកំពុងរង់ចាំសេចក្ដីសម្រេចពីលោកអភិបាលខេត្តថា តើត្រូវធ្វើការរុះរើទាំងស្រុង ឬត្រូវមានវិធានការផ្សេង ?
ចែករំលែកព័តមាននេះ