រាជធានីភ្នំពេញ ៖ ក្រុមសេដ្ឋវិទូកម្ពុជាបានថ្លែងថា កម្ពុជាចាំបាច់ត្រូវធ្វើពិពិធកម្ម (ភាពសម្បូរបែប) នៃសេដ្ឋកិច្ចរបស់ខ្លួនបន្ថែមទៀត ដើម្បីរក្សាបានកំណើនសេដ្ឋកិច្ចរឹងមាំ និងប្រកបដោយនិរន្តរភាព ។
យោងតាមរបាយការណ៍របស់ធនាគារពិភពលោក ដែលបានចេញផ្សាយកាលពីពេលថ្មីៗនេះបង្ហាញថា ក្នុងដំណើរឆ្ពោះទៅមុខ កម្ពុជាទំនងជាមិនអាចពឹងផ្អែកលើកត្តាដដែលៗដើម្បីជំរុញឲ្យមានកំណើនរីកចម្រើនខ្លាំងក្លា និងកាត់បន្ថយភាពក្រីក្រក្នុងរយៈពេល២ទសវត្សរ៍កន្លងមកទេ ។ កំណើនសេដ្ឋកិច្ចជោគជ័យរបស់កម្ពុជាត្រូវបានរំពឹងថា នឹងធ្វើឲ្យថយចុះជាបណ្តើរៗនូវភាពអនុគ្រោះផ្នែកពាណិជ្ជកម្ម និងការផ្តល់ហិរញ្ញប្បទានពីម្ចាស់ជំនួយ ដោយសារកម្ពុជាបានក្លាយជាប្រទេសមានប្រាក់ចំណូលមធ្យមកម្រិតទាប ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងតាមទូរស័ព្ទកាលពីល្ងាចថ្ងៃទី២១ សីហាថា វាមិនមែនជារឿងថ្មីទេ អ្នកជំនាញបានដឹងពីរឿងនេះ ប៉ុន្តែប្រទេសណា ក៏ដូចប្រទេសណាដែរ គឺចាប់ផ្តើមដំបូងចេញពីវិស័យកសិកម្ម និងកាត់ដេរ ដែលប្រើប្រាស់កម្លាំងពលកម្មច្រើន ប៉ុន្តែបន្តិចម្តងៗ ប្រទេសនីមួយៗបានវិវត្តន៍រីកចម្រើនមួយកម្រិត អាស្រ័យលើជំនាញ ព្រោះបើកម្លាំងពលកម្មរបស់យើងកាន់តែមានជំនាញ វិនិយោគិននឹងឆ្លើយតបតាមជំនាញដែលយើងមាន ។
លោកបន្តថា ៖« វិស័យស្នូលទាំង៤ ដែលជាកម្លាំងចលករនៃសេដ្ឋកិច្ចកម្ពុជា គឺនៅតែជាមូលដ្ឋាន យើងមិនអាចផ្លាស់ប្តូរទេ វានៅតែជាសសរស្តម្ភនៃសេដ្ឋកិច្ចរបស់កម្ពុជា»។ លោកថា ៖ « អ្វីដែលសំខាន់ គឺជំរុញធ្វើយ៉ាងណា ឲ្យវិស័យទាំង៤នេះកាន់តែមានភាពរីកចម្រើន និងទទួលបានតម្លៃបន្ថែមកាន់តែច្រើន » ។
ជាមួយការរីកចម្រើននៃសេដ្ឋកិច្ច ដែលសម្រេចបានអត្រាជាមធ្យម៧,៦% ពីឆ្នាំ១៩៩៤ ដល់ឆ្នាំ២០១៥ ហើយកម្ពុជាបានក្លាយជាប្រទេសមានប្រាក់ចំណូលមធ្យមកម្រិតទាបនៅឆ្នាំ២០១៥ កម្ពុជាបានកាត់បន្ថយភាពក្រីក្រពី៤៧,៨%ក្នុងឆ្នាំ២០០៧ មកនៅត្រឹម១៣,៥%ក្នុងឆ្នាំ២០១៤ ដែលជាមូលដ្ឋាននៃការបង្កើតការងារខាងលើនេះ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting ថ្លែងថា ការលើកឡើងរបស់ធនាគារពិភពលោក គឺជាការត្រឹមត្រូវ ព្រោះកម្ពុជាមានសភាពដូចប្រទេសកូរ៉េ បន្ទាប់ពីសង្គ្រាម ដែលផ្តោតលើឧស្សាហកម្មធុនធ្ងន់ និងប្រើប្រាស់កម្លាំងពលកម្មច្រើន ។ ដូចអ្វីដែលកម្ពុជាមាននាពេលនេះ គឺការប្រើប្រាស់កម្លាំងពលកម្មច្រើន គួបផ្សំនឹងបញ្ហាអតិផរណា ធ្វើឲ្យមានការដំឡើងប្រាក់ខែជាប្រចាំ បានធ្វើឲ្យភាពប្រកួតប្រជែងរបស់កម្ពុជាថមថយល្បឿន ។
លោកបន្តថា កម្ពុជាគួរងាកមកផ្តោតឲ្យបានខ្លាំងលើវិស័យទេសចរណ៍ ព្រោះបច្ចុប្បន្ន វិស័យទេសចរណ៍កម្ពុជាហាក់មានលក្ខណៈជាប្រពៃណី ដែលមិនទាន់មានយុទ្ធសាស្ត្រទាក់ទាញឲ្យបានខ្លាំងក្លានៅឡើយ ដែលធ្វើឲ្យវិស័យនេះដើរយឺត ។ ដូច្នេះ កម្ពុជាគួររៀនសូត្រពីប្រទេសថៃ ឬរកគំរូផ្សេងមួយដែលកាន់តែមានភាពទាក់ទាញជាងនេះ ។ លោកបន្តថា យើងស្វាគមន៍គោលនយោបាយអភិវឌ្ឍន៍វិស័យឧស្សាហកម្មដាក់ចេញដោយរាជរដ្ឋាភិបាល ប៉ុន្តែកម្ពុជាគួរធ្វើឲ្យចេញជាសកម្មភាពជាក់ស្តែង លើគោលនយោបាយនេះ ព្រោះបច្ចុប្បន្ន វាជាគោលនយោបាយនៅឡើយ ។
លោក ង៉ែត ជូ បន្ថែមថា លើសពីនេះ កម្ពុជាគួរបង្កើនការកែច្នៃផលិតផលកសិកម្ម ដែលបច្ចុប្បន្ន កម្ពុជាផលិតបានច្រើន និងពឹងផ្អែកតែលើការនាំចេញទៅកាន់ប្រទេសជិតខាង ដែលធ្វើឲ្យកម្ពុជាមានបញ្ហា ពេលប្រទេសគេលែងត្រូវការ ។ កម្ពុជាមិនអាចប្រកួតប្រជែងជាមួយប្រទេសទាំងពីរនេះទេ ។ ហេតុនេះ កម្ពុជាគួរផ្តោតលើអ្វីជាពិសេស ដូចជា ម្រេចកំពត ស្វាយចន្ទី និងផលិតផលដទៃទៀត ៕
ចែករំលែកព័តមាននេះ