សុខភាពក្នុងវិស័យវាយនភ័ណ្ឌចាប់ផ្តើមជួបបញ្ហា ខណៈរោងចក្របិទច្រើន
រាជធានីភ្នំពេញ ៖ រយៈពេល៧ខែឆ្នាំនេះ ចំនួនរោងចក្របិទទ្វារបានកើនលើសរោងចក្របើកថ្មីនៅកម្ពុជា ។ វាជាសញ្ញាមួយបង្ហាញថា
រាជធានីភ្នំពេញ ៖ រយៈពេល៧ខែឆ្នាំនេះ ចំនួនរោងចក្របិទទ្វារបានកើនលើសរោងចក្របើកថ្មីនៅកម្ពុជា ។ វាជាសញ្ញាមួយបង្ហាញថា សុខភាពក្នុងវិស័យនេះមិនល្អប្រសើរទេ ។
លោក តោ ដារ៉ារិទ្ធ មន្ត្រីការងារ និងច្បាប់នៃសមាគមរោងចក្រកាត់ដេរកម្ពុជា បានថ្លែងតាមទូរស័ព្ទនាព្រឹកថ្ងៃទី២២ សីហាថា គិតត្រឹមដំណាច់ខែកក្កដាកន្លងមក រោងចក្រកាត់ដេរចំនួន៤៩បានបិទទ្វារ និងមានរោងចក្រថ្មីចំនួន១៨ប៉ុណ្ណោះបានបើកដំណើរការ ។ តួលេខនេះ យើងនិយាយតែក្នុងក្របខ័ណ្ឌរោងចក្រ ដែលជាសមាជិកសមាគមកាត់ដេរកម្ពុជាប៉ុណ្ណោះ។ លោកបន្តថា សមាគមរោងចក្រកាត់ដេរបច្ចុប្បន្ន មានសមាជិកចំនួន៥៨៨ ក្នុងនោះរោងចក្រផលិតស្បែកជើង និងកាបូបមានចំនួន៤៨៨, រោងចក្រផលិតស្បែកជើងចំនួន៥៧ និងរោងចក្រផលិតតែមិននាំចេញ មានចំនួន៤៣រោងចក្រ ។ លោកបន្តថា ៖« វាជាសញ្ញាមិនសូវល្អទេសម្រាប់វិស័យនេះ ព្រោះតួលេខបិទមានចំនួនច្រើនជាងរោងចក្របើកថ្មី » ។
អគ្គលេខាធិការសមាគមរោងចក្រកាត់ដេរកម្ពុជា លោកបណ្ឌិត កាំង ម៉ូនីកា បានថ្លែងថា ចំនួនរោងចក្របិទច្រើនជាងបើកនេះ និងការដំឡើងប្រាក់ឈ្នួលនិយោជិត ជាសញ្ញាគួរឲ្យបារម្ភហើយ ប៉ុន្តែយើងកំពុងរង់ចាំមើលគោលនយោបាយរបស់រាជរដ្ឋាភិបាលពាក់ព័ន្ធនឹងវិស័យកាត់ដេរ និងស្បែកជើង រយៈពេល៨ឆ្នាំថា តើរាជរដ្ឋាភិបាលអាចជួយអ្វីខ្លះសម្រាប់វិស័យនេះ ។
រាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ និងសមាគមរោងចក្រកាត់ដេរកម្ពុជា ភាគីនិយោជក និងតំណាងសហជីពនានាកំពុងព្រាងគោលនយោបាយក្នុងវិស័យវាយនភ័ណ្ឌ ដើម្បីអភិវឌ្ឍន៍វិស័យនេះឲ្យមាននិរន្តរភាព និងមានភាពសុខដុមរមនារវាងភាគីនិយោជក និងនិយោជិត ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting ថ្លែងថា លោកមិនដឹងពីមូលហេតុនៃការបិទរោងចក្រទាំងនោះទេ ប៉ុន្តែជាក់ស្តែង កម្ពុជាកំពុងប្រកួតប្រជែងជាមួយប្រទេសមីយ៉ាន់ម៉ា ដែលមានកម្លាំងពលកម្មច្រើន និងតម្លៃទាប ។ លោកបន្តថា រយៈពេល១០ទៅ២០ឆ្នាំកន្លងមកហើយ កម្ពុជាជាប់ជាប្រទេសមានតម្លៃពលកម្មថោក ប៉ុន្តែរាជរដ្ឋាភិបាលបានដំឡើងប្រាក់ខែជាបន្តបន្ទាប់ដល់កម្មករ-និយោជិត ស្របតាមអតិផរណាតម្លៃទំនិញ ដើម្បីឲ្យពួកគេអាចរស់នៅសមរម្យ ប៉ុន្តែបែរជាផលិតភាពរបស់កម្ពុជាមានកម្រិតទាប បើធៀបជាមួយវៀតណាម និងប្រទេសមួយចំនួនទៀត ។
លោកបន្ថែមថា ៖« ក្នុងស្ថានភាពនេះ រោងចក្រកាត់ដេរគួរវិនិយោគលើបច្ចេកវិទ្យាថ្មីៗ ដើម្បីបង្កើនផលិតភាពឲ្យបានច្រើន ព្រោះបើការបិទទ្វាររោងចក្រវាកើតឡើងជានិន្នាការធម្មតាមិនអីទេ ប៉ុន្តែបើដោយសារការប្រកួតប្រជែងពីប្រទេសក្នុងតំបន់ វានឹងធ្វើឲ្យសេដ្ឋកិច្ចរបស់យើងមានសម្ពាធ » ។
ទោះជាយ៉ាងណា វិស័យនេះក៏មានក្តីសង្ឃឹមផងដែរ តាមរយៈការអនុគ្រោះពន្ធនាំចេញកាបូបពីរដ្ឋាភិបាលអាមេរិក ហើយនាពេលថ្មីៗនេះ រាជរដ្ឋាភិបាល និងសមាគមរោងចក្រកាត់ដេរកម្ពុជា បានដាក់សំណើទៅកាន់រដ្ឋាភិបាលអាមេរិក ដើម្បីបានទទួលសិទ្ធិនាំចូលស្បែកជើងទៅកាន់ទីផ្សារអាមេរិក និងអឺរ៉ុបដោយរួចពន្ធ ។
វិស័យកាត់ដេរដែលជាកម្លាំងចលករមួយសំខាន់ជាងគេក្នុងការជំរុញកំណើនសេដ្ឋកិច្ចនៅរក្សាបានកំណើនបង្គួរ ទោះបីជាថមថយល្បឿនបន្តិច បើធៀបនឹងឆ្នាំកន្លងទៅ ។ ការនាំចេញសម្លៀកបំពាក់កើនឡើង៤% បើធៀបនឹង៩%ក្នុងរយៈពេលដូចគ្នាឆ្នាំ២០១៦ ដោយសារកំណើនការនាំចេញទៅទីផ្សារសហរដ្ឋអាមេរិកធ្លាក់ចុះប្រមាណ២,៣% ខណៈកំណើនការនាំចេញទៅកាន់អង់គ្លេស កាណាដា និងជប៉ុន មានភាពល្អប្រសើរ ។ នេះបើយោងតាមរបាយការណ៍ប្រចាំឆមាសទី១ របស់ធនាគារជាតិនៃកម្ពុជា។
របាយការណ៍ដដែលបញ្ជាក់ថា ការនាំចេញរបស់កម្ពុជាមានកំណើនយឺតជាងមុន ដោយសារសមាមាត្រនៃការនាំចេញសម្រាប់វិស័យកាត់ដេរទៅកាន់ទីផ្សារអាមេរិក បានថមថយជាបន្តបន្ទាប់ចាប់តាំងពីឆ្នាំ២០១១មក។ កំណើនយឺតជាងមុននេះ អាចបណ្តាលមកពីកត្តាមួយចំនួនដូចជា ការកើនឡើងនៃការប្រកួតប្រជែងនាំចេញសម្លៀកបំពាក់ពីប្រទេសក្នុងតំបន់ ជាពិសេសវៀតណាម និងមីយ៉ាន់ម៉ា គួបផ្សំនឹងកត្តាខាងក្នុង គឺការដំឡើងប្រាក់ឈ្នួលអប្បបរមា ដែលបានធ្វើឲ្យថ្លៃដើមផលិតកម្មកើនឡើង និងកត្តាមួយទៀត គឺការថយចុះភាពទាក់ទាញវិនិយោគក្នុងវិស័យនេះ ដោយសារកម្ពុជានឹងលែងទទួលបានការអនុគ្រោះពន្ធពីសហភាពអឺរ៉ុបក្នុងរយៈពេល ៣ឆ្នាំខាងមុខ បន្ទាប់ពីកម្ពុជាបានក្លាយជាប្រទេសមានប្រាក់ចំណូលមធ្យមកម្រិតទាប។
ជាក់ស្តែង លំហូរវិនិយោគផ្ទាល់ពីបរទេសទៅក្នុងវិស័យកាត់ដេរបានធ្លាក់ចុះប្រមាណ ៣០%ក្នុងត្រីមាសទី១ ឆ្នាំ២០១៧នេះ បើធៀបនឹងការធ្លាក់ចុះ៥%នៅគ្រាដូចគ្នាឆ្នាំមុន។ របាយការណ៍នេះបញ្ជាក់ថា ក្នុងឆមាសទី១ ការនាំចេញសម្លៀកបំពាក់មានសមាមាត្រប្រមាណ៦៧% នៃការនាំចេញក្រោមប្រព័ន្ធពន្ធអនុគ្រោះ ថយចុះពីប្រមាណ៧៤%នៅគ្រាដូចគ្នាឆ្នាំមុន ៕
ចែករំលែកព័តមាននេះ