ចេញពីផឹកស៊ីស្រវឹងយកដុំថ្មគប់កញ្ចក់រថយន្តត្រូវរថយន្តដេញបុកស្លា.ប់ម្នាក់
រាជធានីភ្នំពេញ ៖ យុវជន៤នាក់ ជិះម៉ូតូត្រលប់ពីផឹកស៊ីស្រវឹង គប់កញ្ចក់រថយន្ត ត្រូវរថយន្តដេញបុកពីក្រោយបណ្ដាលឲ្យ
រាជធានីភ្នំពេញ ៖ យុវជន៤នាក់ ជិះម៉ូតូត្រលប់ពីផឹកស៊ីស្រវឹង គប់កញ្ចក់រថយន្ត ត្រូវរថយន្តដេញបុកពីក្រោយបណ្ដាលឲ្យស្លាប់ម្នាក់ រងរបួសធ្ងន់២នាក់ និងស្រាលម្នាក់ ចំណែករថយន្តបើករត់បាត់ស្រមោល កាលពីវេលាម៉ោង១២និង២០នាទីរំលងអធ្រាត្រ ឈានចូលថ្ងៃទី២៣ ខែសីហា ឆ្នាំ២០១៧ តាមបណ្ដោយផ្លូវជាតិលេខ៣ កែងផ្លូវបេតុង ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
ម៉ូតូរងគ្រោះម៉ាកហុងដាឌ្រីម ស៊េរី២០០៦ ពណ៌ខ្មៅ ពាក់ស្លាកលេខ ភ្នំពេញ ១W-៧៥២១ បើកបរក្នុងទិសដៅពីជើងទៅត្បូងជិះគ្នា៤នាក់ ស្លាប់ម្នាក់ រងរបួសធ្ងន់២ និងស្រាលម្នាក់ ។ សពអ្នកស្លាប់ឈ្មោះ ឡូ គីមឡេង ភេទប្រុស អាយុ២៤ឆ្នាំ មុខរបរប្រូរថយន្ត ស្នាក់នៅការ៉ាស់រថយន្តកុងតឺន័រ ស្ថិតនៅសង្កាត់កន្ទោក ខណ្ឌពោធិ៍សែនជ័យ មានភូមិកំណើតនៅភូមិតាហៀវក្រោម ឃុំកោងកាង ស្រុកពញ្ញាក្រែក ខេត្តត្បូងឃ្មំ ។ ម្ចាស់ម៉ូតូឈ្មោះ យឿន សុឈីត ភេទប្រុស អាយុ២៤ឆ្នាំ មុខរបរប្រូរថយន្ត ស្នាក់នៅការ៉ាស់រថយន្តជាមួយគ្នា មានស្រុកកំណើតភូមិព្រៃល្វា ឃុំព្រះនិពាន្ត ស្រុកគងពិសី ខេត្តកំពង់ស្ពឺ និង២នាក់ទៀតមិនទាន់បានស្គាល់ឈ្មោះនៅឡើយ ។
តាមសម្តីមិត្តភក្តិជនរងគ្រោះដែលរួមដំណើរជាមួយម្នាក់ សុំមិនបញ្ចេញឈ្មោះ បាននិយាយថា ៖ នៅមុនពេលកើតហេតុ ជនរងគ្រោះបាននាំគ្នាទៅដើរលេងផឹកស៊ី នៅម្តុំផ្លូវជាតិលេខ៣ ជិតសង្កាត់ចោមចៅ ដោយមានគ្នា៧នាក់ ជិះម៉ូតូ២គ្រឿង ម៉ាកហុងដាឌ្រីម១គ្រឿង និងស្មាស១គ្រឿង ក្នុងនោះម៉ូតូម៉ាកហុងដាឌ្រីមជិះគ្នា៤នាក់ និងម៉ូតូស្មាសជិះគ្នា៣នាក់ ។ លុះពេលយប់ជ្រៅបាននាំគ្នាត្រលប់ទៅការ៉ាស់រថយន្តរបស់ខ្លួនវិញ លុះបើកម៉ូតូជិតដល់ចំណុចកើតហេតុ មានទំនាស់ជាមួយរថយន្តមួយគ្រឿងជាប្រភេទរថយន្តកូរ៉េទ្រុង ពណ៌ស មិនចាំស្លាក់លេខ ជិះគ្នា២នាក់ បើកបរស្របគ្នា ហើយស្រាប់តែខាងភាគីរថយន្តបង្កបានយកដុំថ្មគប់ពួកគាត់ ដែលជិះម៉ូតូម៉ាកស្មាស ធ្វើឲ្យពួកគាត់បានយកដុំថ្មគប់កញ្ចក់រថយន្តខាងលើវិញ ស្រាប់តែរថយន្តបង្កដេញបុកម៉ូតូម៉ាកស្មាសពីក្រោយបន្ទាប់មកម៉ូតូម៉ាក់ស្មាសបានគេចទៅផ្នែកខាងស្តាំផុត ហើយរថយន្តបង្កបានបើកបំបុកម៉ូតូរងគ្រោះហុងដាឌ្រីមដែលជិះ៤នាក់បានបន្ថយល្បឿនរង់ចាំម៉ូតូម៉ាកស្មាសដែលជិះពីក្រោយ បន្ទាប់មករថយន្តបង្កបានបើកបុកម៉ូតូរងគ្រោះពីក្រោយពេញទំហឹងនៅមាត់ច្រកចូលទៅការ៉ាស់រថយន្ត បណ្តាលឲ្យអូសជាច្រើនម៉ែត្រ ហើយរថយន្តបង្កខាងលើ បានបន្ថែមល្បឿនគេចខ្លួនបាត់ ធ្វើឲ្យឲ្យជនរងគ្រោះស្លាប់នៅកន្លែងកើតហេតុម្នាក់ ២នាក់ទៀតរងរបួសធ្ងន់ និងម្នាក់ទៀតរបួសស្រាល ត្រូវបានរថយន្តសង្គ្រោះរបស់អង្គភាព៧១១ បានដឹកទៅសង្គ្រោះនៅមន្ទីរពេទព្រះកុសមៈចំនួន២នាក់ ចំណែកម្នាក់ទៀតរងរបួសស្រាលមិនបានទៅព្យាបាលឡើយ ។
ក្រោយពេលកើតហេតុ សពត្រូវបានបងប្អូនដែលធ្វើការជាមួយគ្នា បានហៅរថយន្តដឹកសពយកទៅធ្វើបុណ្យតាមប្រពីណីនៅស្រុកកំណើត ចំណែកម៉ូតូត្រូវបានជំនាញចរាចរណ៍ខណ្ឌយកទៅរក្សាទុក ដើម្បីរង់ចាំប្រគល់ឲ្យបងប្អូនម្ចាស់ម៉ូតូវិញ ៕
ចែករំលែកព័តមាននេះ