កា.ប់ដីព្រៃកប់សពសហគមន៍ ជាប់ទោសមួយខែ
ខេត្តស្ទឹងត្រែង ៖ តុលាការខេត្តស្ទឹងត្រែងកាលពីព្រឹកថ្ងៃទី២២ ខែសីហា ឆ្នាំ២០១៧ បានប្រកាសសាលក្រមសម្រេចផ្តន្ទាទោសជនម្នាក់
ខេត្តស្ទឹងត្រែង ៖ តុលាការខេត្តស្ទឹងត្រែងកាលពីព្រឹកថ្ងៃទី២២ ខែសីហា ឆ្នាំ២០១៧ បានប្រកាសសាលក្រមសម្រេចផ្តន្ទាទោសជនម្នាក់ដាក់ពន្ធនាគាររយៈពេលមួយខែ តែព្យួទោសនៅក្រៅឃុំក្រោយរកឃើញមានទោសកំហុសកាប់ទន្ទ្រានដីព្រៃកប់សពសហគមន៍ជនជាតិដើមភាគតិចនៅភូមិរំដេង ឃុំចម្ការលើ ស្រុកថាឡាបរិវ៉ាត់។ ប្រជាសហគមន៍រស់នៅភូមិរំដេង ឃុំចម្ការលើ ស្រុកថាឡាបរិវ៉ាត់ ខេត្តស្ទឹងត្រែងបានដាក់បណ្តឹងទៅសាលាស្រុកដើម្បីទាមទារឲ្យជនចំណាកស្រុកម្នាក់ទទួលខុសត្រូវលើទំនៀមទម្លាប់ប្រពៃណីជនជាតិដើមភាគតិចក្រោយកាប់ទន្ទ្រានដីព្រៃកប់សពក្នុងសហគមន៍ជនជាតិដើមភាគតិចកាលអំឡុងច្រើនឆ្នាំកន្លងទៅ។
ប្រជាសហគមន៍ទាំងនោះថា ជនដែលពាក់ព័ន្ធកាប់ទន្ទ្រានដីព្រៃកប់សពក្នុងសហគមន៍ជនជាតិដើមភាគតិចខាងលើឈ្មោះ ព្រំ សំអៀត ភេទប្រុស អាយុ៤៤ឆ្នាំ ជាជនជាតិខ្មែរ បានកាប់ទន្ទ្រានដីព្រៃប៉ះពាល់ចូលដល់ក្នុងដែនព្រៃកប់សពជនជាតិដើមភាគតិចចាប់តាំងពីឆ្នាំ២០០៦ តែពួកគាត់មិនដាក់ពាក្យបណ្តឹងភ្លាមៗនោះឡើយ។ ដោយសារមិនទាន់ប៉ះពាល់ដល់ចំណុចធ្ងន់ធ្ងរតែមានការហាមឃាត់លុះក្រោយមកពួកគាត់សម្រេចដាក់បណ្តឹងទៅអាជ្ញាធរមូលដ្ឋាន និងសាលាស្រុកនៅឆ្នាំ២០១២ និង២០១៣ គ្រាជនខាងលើនោះបន្តសកម្មភាពកាប់ទន្ទ្រានបន្ថែមឲ្យប៉ះដល់ទំនៀមទម្លាប់ប្រពៃណី។ លោក ព្រំ សំអៀត រងការចោទបានសារភាពថា ខ្លួនពិតជាបានកាប់ទន្ទ្រានដីព្រៃស្ថិតនៅភូមិរំដេង ឃុំចម្ការលើ ស្រុកថាឡាបរិវ៉ាត់ បង្កការប៉ះពាល់ចូលទៅដីព្រៃកប់សពក្នុងសហគមន៍ជនជាតិដើមភាគតិចពិតមែន។
លោកបន្តថា ក្រោយដឹងពីជម្រៅប៉ះពាល់ដល់ទំនៀមទម្លាប់ប្រពៃណីជនជាតិដើមភាគតិច ក៏បានសុំការអភ័យទោសដោយជូនស្រាស៣០លីត្រ និងជ្រូកមួយក្បាលដើម្បីរៀបចំពិធីសែនព្រេនសុំខមាទោស តែប្រជាសហគមន៍ជនជាតិមិនព្រម ដោយបានទាមទារសំណងជាប្រាក់ចំនួនបីពាន់ដុល្លារ។ ក្រោយសំណុំរឿងត្រូវបានអូសបន្លាយពេលវេលាយូរ នៅព្រឹកថ្ងៃទី២២ ខែសីហា ឆ្នាំ២០១៧ អយ្យការអមសាលាដំបូងខេត្តស្ទឹងត្រែង បានបើកសវនាការដើម្បីជំនុំជម្រះពីបទល្មើសខាងលើ ដោយមានសមាសភាពចូលរួមដោយលោក អៀង គឹមថុល ជាចៅក្រមជំនុំជម្រះនៃសាលាដំបូងខេត្តស្ទឹងត្រែង លោក គឹម ហុងសាន ជាព្រះរាជអាជ្ញារង អមសាលាដំបូងខេត្តស្ទឹងត្រែង និងលោក នៅ ចាន់ថន ជាក្រឡាបញ្ជីសវនាការ។
ដោយបានសម្រេចផ្តន្ទាទោសជនខាងលើដាក់ពន្ធនាគាររយៈពេលមួយខែព្យួរទោសឲ្យនៅក្រៅឃុំ កង្គាប់ឲ្យបង់ប្រាក់ពិន័យចូលថវិការដ្ឋចំនួន១០ម៉ឺនរៀល បង្គាប់ឲ្យប្រគល់ដីព្រៃកប់សពទៅសហគមន៍ជនជាតិដើមភាគតិចវិញរួមសាច់ជ្រូក៤០គីឡូក្រាម និងស្រាស៣០លីត្រទៅប្រជាសហគមន៍ជនជាតិដើមរៀបចំពិធីសែនព្រេនតាមប្រពៃណី៕
ចែករំលែកព័តមាននេះ