រថយន្តគេចម៉ូតូជ្រុលទៅបុកបង្គោលភ្លើង
រាជធានីភ្នំពេញ ៖ រថយន្តមួយគ្រឿង បានបើកគេច និងម៉ូតូមួយគ្រឿង ដែលធ្វើដំណើរក្នុងទិសដៅស្របគ្នា បានរេចង្កូតជ្រុលទៅបុក និងបង្គោលភ្លើងពេញទំហឹង
រាជធានីភ្នំពេញ ៖ រថយន្តមួយគ្រឿង បានបើកគេច និងម៉ូតូមួយគ្រឿង ដែលធ្វើដំណើរក្នុងទិសដៅស្របគ្នា បានរេចង្កូតជ្រុលទៅបុក និងបង្គោលភ្លើងពេញទំហឹង បណ្តាលឲ្យបើកបររងរបួសបាក់ដៃខាងឆ្វេង ហេតុការណ៍នេះបានកើតឡើងនៅវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី២២ ខែសីហា ឆ្នាំ២០១៧ ទល់មុខនឹងផ្ទះយីហោ ម៉េត សុខជា លក់ស៊ុបគោ និងគ្រឿងក្លែម ផ្លូវ៣៦៩ ភូមិអូរអណ្តូង សង្កាត់ព្រែកប្រា ខណ្ឌច្បារអំពៅ ។
សមត្ថកិច្ចបានឲ្យដឹងថា ៖ អ្នកបើករថយន្តមានឈ្មោះ សោម ឆេង ភេទប្រុស អាយុ២៧ឆ្នាំ ស្នាក់នៅភូមិព្រែកតាឯក ឃុំត្រើយស្លា ស្រុកស្អាង ខេត្តកណ្តាល ។
តាមសម្តីជនរងគ្រោះ ដែលជាអ្នកបើករថយន្ត បានឲ្យដឹងថា ៖ មុនពេលកើតហេតុ រូបគាត់បានបើករថយន្តម៉ាក ហ៊ីយ៉ានដាយស្តារិច ពណ៌ទឹកប្រាក់ ពាក់ស្លាកលេខ ភ្នំពេញ ២P-៧៣២៣ គោលបំណងត្រូវទៅផ្ទះនៅស្រុកស្អាង ខេត្តកណ្តាល ដោយបានធ្វើដំណើរតាមផ្លូវ៣៦៩ ក្នុងទិសដៅពីជើងទៅត្បូង ក្នុងល្បឿនលឿន ខណៈមកដល់ចំណុចកើត បានគេចនឹងម៉ូតូមិនចាំម៉ាកមួយគ្រឿង ដែលធ្វើដំណើរក្នុងទិសដៅស្របគ្នា ធ្វើឲ្យរថយន្តរេចង្កូតទៅខាងឆ្វេងដៃជ្រុលទៅបុកនឹងបង្គោលភ្លើងបេតុងពេញទំហឹង បណ្តាលឲ្យរថយន្តរងការខូចខាតខ្ទេចផ្នែកខាងមុខចំហៀងខាងឆ្វេង បែកកញ្ចក់ខាងមុខ ព្រមទាំងផ្ទុះពោងសុវត្តិភាព និងធ្វើឲ្យអ្នកបើកបររថយន្ត រងរបួសបាក់ដៃខាងឆ្វេងផងដែរ ។ ដោយឡែកបង្គោលភ្លើងវិញ រងការខូចខាតបាក់ និងវៀច តែមិនទាន់ដួលដល់ដីនោះទេ ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅដល់កន្លែងកើតហេតុ រួចហើយបានស្ទូចយករថយន្តយកទៅរក្សារទុកនៅការរិយាល័យចរាចរណ៍ជើងគោក ។ ចំណែកអ្នកបើកបររថយន្ត ត្រូវបានឲ្យបងប្អូនដឹកយកទៅសង្គ្រោះនៅមន្ទីពេទ្យ ៕
ចែករំលែកព័តមាននេះ