មើលស្លាកម៉ូតូអ្នកកាសែត(21.L1002.96)ចម្លែកអត់?
អ្នកសារព័ត៌មានពីរនាក់ បានត្រូវលោក សូ សាហុង អភិបាលស្រុក និងជាប្រធានគណៈបញ្ជាការឯកភាពស្រុកភ្នំក្រវាញ បញ្ជាឱ្យសមត្ថកិច្ចធ្វើការឃាត់ខ្លួន
ខេត្តពោធិ៍សាត់ ៖ សេចក្តីរាយការណ៍ឱ្យដឹងថា អ្នកសារព័ត៌មានពីរនាក់បានត្រូវលោក សូ សាហុង អភិបាលស្រុក និងជាប្រធានគណៈបញ្ជាការឯកភាពស្រុកភ្នំក្រវាញ បញ្ជាឱ្យសមត្ថកិច្ចធ្វើការឃាត់ខ្លួន បន្ទាប់ពីមានពលរដ្ឋប្ដឹងថា ពួកគេបានដើរធ្វើសកម្មភាពយកលុយពីអ្នកដឹកឈើតាមម៉ូតូបន្តិចបន្តួចគ្រាន់ចិញ្ចឹមឆ្នាំង និងការប្រើប្រាស់ស្លាកលេខម៉ូតូក្លែងក្លាយ ធ្វើឡើងកាលពីថ្ងៃទី២០ សីហា ស្ថិតត្រង់ចំណុចភូមិស្រែពពាយ ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់ ។
លោកវរសេនីយ៍ត្រី វង សាវ៉េត អធិការនគរបាលស្រុកភ្នំក្រវាញឱ្យដឹងថា ជនសង្ស័យជាអ្នកកាសែតទាំង២នាក់នេះ ១-ឈ្មោះ អ៊ុយ គឹមង៉ុយ អាយុ៤៧ឆ្នាំ មានទីលំភូមិដំណាក់អំពិល សង្កាត់លលក.ស ក្រុងពោធិ៍សាត់ និងទី២-ឈ្មោះធម្ម នី អាយុ៥៧ឆ្នាំ មានទីលំនៅក្នុងភូមិព្រៃធំ ឃុំកំពង់ល្ពៅ ស្រុកសំឡូត ខេត្តបាត់ដំបង ។ ទាំងពីរនាក់នេះ ជាភ្នាក់ងារអ្នកសារព័ត៌មានក្នុងស្រុកមួយដែលមានឈ្មោះថា(គំនិតខ្មែរ) ។
លោកអធិការបន្តថា ការឃាត់ខ្លួនជនសង្ស័យទាំង២នាក់នោះ ធ្វើឡើងបន្ទាប់ពីប្រជាពលរដ្ឋនៅភូមិក្សេត្របុរី ឃុំសន្ទ្រែ ស្រុកភ្នំក្រវាញ រាយការណ៍មកថា ពួកគាត់ទាំងពីរនាកជិះម៉ូតូ១គ្រឿងម៉ាក ហុងដាសេ១២៥ សេរីឆ្នាំ២០១៥ ពណ៌ខ្មៅ ពាក់ស្លាកលេខចម្លែក 21.L1 002.96 ដើរធ្វើសកម្មភាពក្នុងព្រៃជំរិតទារលុយពីប្រជាពលរដ្ឋដឹកឈើតាមរទេះគោក្របី តាមគោយន្ដ ដែលខ្លះដឹកយកទៅធ្វើផ្ទះ និងខ្លះទៀត ដឹកតាមម៉ូតូបន្តិចបន្តួចគ្រាន់ចិញ្ចឹមឆ្នាំងបាយតែប៉ុណ្ណោះ ។
លោកបញ្ជាក់ថា ការយកលុយពីប្រជាពលរដ្ឋដឹកអុសដឹកឈើធ្វើផ្ទះនេះ វាជាកំហុសមួយទៅហើយ ប៉ុន្តែអ្វីដែលធ្ងន់ធ្ងរជាងនេះទៅទៀតនោះ គឺពួកគាត់ជាប់ពាក់ព័ន្ធទៅនឹងករណីប្រើប្រាស់ស្លាកលេខម៉ូតូក្លែងក្លាយតែម្ដង ។ ជនសង្ស័យអ្នកសារព័ត៌មានគំនិតខ្មែរទាំងពីរនាក់សមត្ថកិច្ចបានកសាងសំណុំរឿងបញ្ជូនទៅសាលាដំបូងដើម្បីចាត់ការបន្តតាមនីតិវិធី៕
ចែករំលែកព័តមាននេះ