ក្រសួងការងារស្នើក្រុមហ៊ុននាំកម្មសិក្សាការីខ្មែរទៅធ្វើការ… មានបទដ្ឋានអប្បបរមាច្បាស់លាស់
រាជធានីភ្នំពេញ ៖ ដើម្បីទទួលបានការមើលថែ និងផ្តល់ជំនាញច្បាស់លាស់ដល់កម្មការិនីខ្មែរពីសំណាក់ភ្នាក់ងារបញ្ជូនពលករនានា
រាជធានីភ្នំពេញ ៖ ដើម្បីទទួលបានការមើលថែ និងផ្តល់ជំនាញច្បាស់លាស់ដល់កម្មការិនីខ្មែរពីសំណាក់ភ្នាក់ងារបញ្ជូនពលករនានា
រាជធានីភ្នំពេញ ៖ ដើម្បីទទួលបានការមើលថែ និងផ្តល់ជំនាញច្បាស់លាស់ដល់កម្មការិនីខ្មែរពីសំណាក់ភ្នាក់ងារបញ្ជូនពលករនានា ក្រសួងការងារ និងបណ្តុះបណ្តាលវិជ្ជាជីវៈបានស្នើដល់ក្រុមហ៊ុន ដែលមានបំណងបណ្តុះបណ្តាលកម្មសិក្សាការីកម្ពុជាទៅបម្រើការងារនៅប្រទេសជប៉ុន ត្រូវមានបទដ្ឋានអប្បបរមាច្បាស់លាស់ ។
ការស្នើរបស់ក្រសួងការងារ ធ្វើឡើងតាមរយៈសារាចរស្តីពីបទដ្ឋានអប្បបរមាសម្រាប់ការជ្រើសរើសបណ្តុះបណ្តាល បញ្ជូន និងគ្រប់គ្រងកម្មសិក្សាការីខ្មែរទៅធ្វើការនៅប្រទេសជប៉ុន ។
ខ្លឹមសារនៃសារាចររបស់ក្រសួងការងារ និងបណ្តុះបណ្តាលវិជ្ជាជីវៈឲ្យដឹងថា អនុលោមតាមអនុស្សរណៈនៃកិច្ចសហប្រតិបត្តិការលើកម្មវិធីបណ្តុះបណ្តាលកម្មសិក្សាការី លើជំនាញបច្ចេកទេសឲ្យទៅបម្រើការងារនៅប្រទេសជប៉ុន ក្រសួងការងារ និងបណ្តុះបណ្តាលវិជ្ជាជីវៈ សូមណែនាំដល់ទីភ្នាក់ងារជ្រើសរើសឯកជនទាំងអស់ ដែលទទួលបានការអនុញ្ញាតឲ្យជ្រើសរើស បណ្តុះបណ្តាល និងគ្រប់គ្រងកម្មសិក្សាការីខ្មែរទៅធ្វើការនៅជប៉ុន ត្រូវគោរព និងអនុវត្តតាមបទដ្ឋានអប្បបរមាសម្រាប់ការជ្រើសរើស បណ្តុះបណ្តាល បញ្ជូន និងគ្រប់គ្រងកម្មសិក្សាការីខ្មែរទៅធ្វើការនៅជប៉ុន ។
ក្រសួងបានគូសបញ្ជាក់ដល់ក្រុមហ៊ុនជាភ្នាក់ងារទទួលជ្រើសរើសកម្មសិក្សាការីខ្មែរថា ៖« ត្រូវជ្រើសរើស បណ្តុះបណ្តាល និងបញ្ជូនសម្រាប់តែជនណាមានបំណងច្បាស់លាស់ ក្នុងការចូលរួមកម្មវិធីការងារនៅប្រទេសជប៉ុន។ យល់ដឹងច្បាស់លាស់អំពីជំនាញបច្ចេកទេសដែលបានបណ្តុះបណ្តាល និងមានបំណងប្រើប្រាស់នូវជំនាញបច្ចេកទេសដែលទទួលបានពីការបណ្តុះបណ្តាលនៅប្រទេសជប៉ុន » ។
ជាងនេះទៀត ក្រសួងបានឲ្យក្រុមហ៊ុនត្រូវកំណត់ឲ្យបានច្បាស់លាស់អំពីមុខចំណាយនៃកម្រៃសេវា និងការចំណាយផ្សេងទៀតដែលកម្មសិក្សាការី និងបេក្ខជនត្រូវបង់ ព្រមទាំងផ្សព្វផ្សាយឲ្យបានច្បាស់លាស់អំពីមុខចំណាយទាំងនោះដល់កម្មសិក្សាការី និងបេក្ខជន ។
ក្នុងសារាចរក្រសួងការងារក៏បានគូសបញ្ជាក់ថា ៖« ត្រូវផ្តល់សេវាគាំទ្រចាំបាច់ដល់កម្មសិក្សាការី និងបេក្ខជនជំនាញបច្ចេកទេសដែលវិលត្រឡប់មកកម្ពុជាវិញ បន្ទាប់ពីបានបញ្ចប់ការបណ្តុះបណ្តាលជំនាញបច្ចេកទេសនៅប្រទេសជប៉ុនរួចមក ដូចជា ត្រូវស្វែងរកការងារឲ្យពួកគាត់ធ្វើ ដើម្បីប្រើប្រាស់ជំនាញបច្ចេកទេសនោះឲ្យបានសមស្រប » ។
សូមបញ្ជាក់ថា បច្ចុប្បន្ន កម្មសិក្សាការីខ្មែរមានចំនួនជិត៥ពាន់នាក់នៅតាមរោងចក្រ សហគ្រាស និងក្រុមហ៊ុនមួយចំនួននៅប្រទេសជប៉ុន ។ ថ្នាក់ដឹកនាំក្រសួងការងារកន្លងមក បានកោតសរសើរដល់និយោជកជប៉ុន ដែលបានទទួលកម្មសិក្សាការីខ្មែរមកធ្វើការ និងយកចិត្តទុកដាក់ដល់សិក្ខាកាម ដោយផ្តល់នូវការបណ្តុះបណ្តាលបច្ចេកទេសខ្ពស់ដល់កម្មសិក្សាការីខ្មែរអាចសិក្សាពីមិត្តជប៉ុន របៀបរបបរស់នៅ និងវិន័យការងារ ហើយពេលត្រឡប់វិញ ពួកគេនឹងក្លាយជាមនុស្សល្អ ។
លោករដ្ឋមន្ត្រី អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមទាំងគណៈប្រតិភូកម្ពុជា នៅពេលអញ្ជើញទស្សនកិច្ចនៅអង្គការសម្រាប់កម្មវិធីបណ្តុះបណ្តាលបច្ចេកទេស ហៅកាត់ថា (OTIT) នៅទីក្រុងតូក្យូ ប្រទេសជប៉ុន កាលពីខែកក្កដានេះ បានស្នើសុំឱ្យពង្រឹងកិច្ចសហការល្អរវាងប្រទេសទាំងពីរ គាំទ្រដល់ការបណ្តុះបណ្តាល និងជ្រើសរើសកម្មសិក្សាការីខ្មែរមកជប៉ុនកាន់តែច្រើនថែមទៀត ព្រមទាំងជួយក្រសួងរៀបចំបែបបទផ្សេងៗស្របតាមនីតិវិធីនៃច្បាប់ថ្មី និងផ្តល់ជំនួយបច្ចកទេសលើការបណ្តុះបណ្តាលជំនាញបច្ចេកទេសដល់កម្មសិក្សាការីខ្មែរ ឱ្យស្របតាមតម្រូវការទីផ្សារការងារនៅប្រទេសជប៉ុន ។
លោក ហេង សួរ អ្នកនាំពាក្យក្រសួងការងារ ធ្លាប់បានឲ្យដឹងថា ៖« សព្វថ្ងៃ យើងមានពលករចេញទៅបម្រើការងារនៅប្រទេសថៃ កូរ៉េ ម៉ាឡេស៊ី ជប៉ុន និងសិង្ហបុរី ។
យើងមានចុះកិច្ចព្រមព្រៀងជាមួយប្រទេសអារ៉ាប៊ីសាអូឌីត កូវ៉េត និងកាតា ប៉ុន្តែយើងមិនទាន់អនុវត្ត។ វិស័យដែលបងប្អូនទៅធ្វើការមាន រោងចក្រ កសិកម្ម សំណង់ និងសេវាកម្ម » ។
រដ្ឋមន្ត្រីក្រសួងការងារបានឲ្យដឹងថា នៅចុងឆ្នាំខាងមុខ នឹងមានពលការិនីខ្មែរប្រមាណពី១ទៅ២ពាន់នាក់ចេញដំណើរទៅតំបន់រដ្ឋបាលហុងកុងជាលើកដំបូង ដើម្បីធ្វើការងារជាស្ត្រីជំនួយការមេផ្ទះ បន្ទាប់ពីលោករដ្ឋមន្ត្រីបានធ្វើទស្សនកិច្ចសិក្សានៅតំបន់នោះរួចមក ដើម្បីឈ្វេងយល់បន្ថែមពីលក្ខខណ្ឌការងារច្បាប់ និងបទប្បញ្ញត្តិផ្សេងៗ សំដៅធ្វើយ៉ាងណា ធានាពលករកម្ពុជាអាចទទួលបានលក្ខខណ្ឌការងារ និងការការពារសិទ្ធិល្អប្រសើរនៅទីនោះ ៕
ចែករំលែកព័តមាននេះ