រាជធានីភ្នំពេញ ៖ ជប៉ុននឹងចាប់ផ្តើមសិក្សាស្រាវជ្រាវពីលទ្ធភាព (Feasibility Study) សម្រាប់គម្រោងសាងសង់រថភ្លើងស្វ័យប្រវតិ្ត (Sky Train) មួយខ្សែពីចំណុចបេះដូងនៃរាជធានីភ្នំពេញ ឆ្ពោះទៅអាកាសយានដ្ឋានអន្តរជាតិភ្នំពេញ ដែលមានទឹកប្រាក់ប្រមាណ ៨០០លានដុល្លារ នឹងចាប់ផ្តើមនៅដើមខែកញ្ញា ឆ្នាំ២០១៧ ។
ទន្ទឹមនឹងនេះ អ្នករត់ម៉ូតូកង់បីអះអាងថា បើសិនជាគម្រោងរថភ្លើងស្វ័យប្រវត្តិដំណើរការពិតមែន វាមិនប៉ះពាល់ដល់មុខរបរដឹកភ្ញៀវចេញចូលព្រលានយន្តហោះអន្តរជាតិទេ ប៉ុន្តែវាជួយដល់ពួកគាត់កាត់បន្ថយការចំណាយលើថ្លៃសាំង ដែលជាលទ្ធផលនៃការកកស្ទះចរាចរណ៍លើដងផ្លូវ ។
នៅក្នុងកិច្ចសម្ភាសន៍ផ្តាច់មុខជាមួយសហការីនៃសារព័ត៌មានកោះសន្តិភាពនាពេលថ្មីៗនេះ លោក ហូរីណុអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា បានថ្លែងថា ជប៉ុននឹងធ្វើការសិក្សាស្រាវជ្រាវគម្រោងនេះរយៈពេល១ឆ្នាំពេញ ហើយវាមានសារសំខាន់សម្រាប់ប្រទេសកម្ពុជា ដោយសារតែចំនួនអ្នកដំណើរចេញចូលព្រលានយន្តហោះបានកើនឡើងជាលំដាប់។
លោក ហូរីណុអ៊ុជិ ហ៊ីដេហ៊ីសា មានប្រសាសន៍ថា ៖« នេះជារឿងដែលសម្តេចតេជោ បានស្នើសុំផ្ទាល់ជាមួយនាយករដ្ឋមន្ត្រី អាបេ ។ ដូច្នេះហើយយើងខ្ញុំនឹងចាប់ផ្តើមសិក្សាស្រាវជ្រាវពីលទ្ធភាពនៃគម្រោងនេះសម្រាប់រយៈពេល១ឆ្នាំ ចាប់ផ្តើមពីកញ្ញា ឆ្នាំនេះ » ។
សូមរំឭកផងដែរថា ក្នុងដំណើរទស្សនកិច្ចផ្លូវការរយៈពេល៤ថ្ងៃនៅប្រទេសជប៉ុន ចាប់ពីថ្ងៃទី៦ ដល់៩ ខែសីហា ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានស្នើឲ្យរដ្ឋាភិបាលជប៉ុនជួយគិតគូរផ្ដល់ជំនួយជាហិរញ្ញវត្ថុនិងបច្ចេកទេស ដើម្បីអភិវឌ្ឍន៍លើវិស័យដឹកជញ្ជូន ជាពិសេស រៀបចំឲ្យមានរថភ្លើងស្វ័យប្រវត្តិលើអាកាសបែបនេះ ដើម្បីកាត់បន្ថយនូវការចំណាយរបស់ពលរដ្ឋ ព្រមទាំងកាត់បន្ថយការកកស្ទះចរាចរណ៍ និងគ្រោះថ្នាក់ផ្សេងៗ ។
លោកឯកអគ្គរាជទូតជប៉ុនប្រចាំកម្ពុជាយល់ស្របថា គម្រោងសាងសង់រថភ្លើងស្វ័យប្រវត្តិលើអាកាស ដែលស្នើដោយរាជរដ្ឋាភិបាលកម្ពុជា ពិតជាមានអត្ថប្រយោជន៍យ៉ាងខ្លាំងដល់ប្រជាពលរដ្ឋកម្ពុជា និងភ្ញៀវជាតិ-អន្តរជាតិ ដែលធ្វើដំណើរទៅកាន់ព្រលានយន្តហោះអន្តរជាតិភ្នំពេញ ។
លោកឯកអគ្គរាជទូតបន្តថា ៖« ប្រជាជននៅទីក្រុងភ្នំពេញដឹងហើយថា នៅទីក្រុងភ្នំពេញរាល់ថ្ងៃមានបញ្ហាកកស្ទះចរាចរណ៍ ។ ម្យ៉ាងវិញទៀត ចំនួនប្រជាពលរដ្ឋដែលប្រើប្រាស់ព្រលានយន្តហោះពោធិ៍ចិនតុង ក៏កាន់តែច្រើនឡើងៗផងដែរ ។ ដូច្នេះហើយតាមរយៈគម្រោងរថភ្លើងស្វ័យប្រវត្តិនេះ គឺភ្ជាប់ពីព្រលានយន្តហោះពោធិ៍ចិនតុង រហូតមកដល់កណ្តាលទីក្រុង » ។
ឯកអគ្គរាជទូតជប៉ុនប្រចាំកម្ពុជា បានថ្លែងថា ក្នុងដំណើរទស្សនកិច្ចទៅកាន់ទីក្រុងតូក្យូកន្លងមក សម្តេចតេជោក៏បានសាកល្បងជិះរថភ្លើងស្វ័យប្រវតិ្តលើអាកាស (Sky Line) នៅទីក្រុងតូក្យូផងដែរ ។ ឯកអគ្គរាជទូតបញ្ជាក់ថា រថភ្លើងស្វ័យប្រវតិ្តដែលសម្តេចតេជោបានជិះសាកល្បង គឺជារថភ្លើងមិនមែនដើរលើខ្សែដែក ដូចរថភ្លើងធម្មតាទេ គឺរថភ្លើងនេះមានកង់កៅស៊ូ ហើយរត់នៅលើផ្លូវស៊ីម៉ងត៍ ។
លោក ហូរីណុអ៊ុជិ ហ៊ីដេហ៊ីសា បានពន្យល់ថា ៖« ចំណុចល្អមាន៣ នៃរថភ្លើងស្វ័យប្រវត្តិរបស់ជប៉ុន គឺថារថភ្លើងនេះ ពេលសាងសង់ គឺចំណាយតិចជាងរថភ្លើងធម្មតា ។ ទី២ ការរំខានដោយសំឡេងតិច ដោយសារតែយើងប្រើប្រាស់កង់កៅស៊ូ ។ ទី៣ ទូរថភ្លើងតូច ដូច្នេះហើយយើងអាចបើកបរបង្វែរទិសដៅយ៉ាងស្រួល ។ ដូច្នេះ បានជាយើងអាចសាងសង់នៅលើផ្លូវបាន។ ឧទាហរណ៍ រថភ្លើងធម្មតា យើងត្រូវតែប្រើជាផ្លូវដែក ហើយយើងត្រូវការស្នើសុំប្រជាជនឲ្យប្តូរទីតាំងយ៉ាងច្រើន ។ ក៏ប៉ុន្តែចំពោះរថភ្លើងអូតូម៉ាទិកនេះ យើងអាចឲ្យវាដើរបាននៅលើមហាវិថី ហើយការស្នើសុំប្តូរទីតាំងគឺតិច » ។
ឯកអគ្គរាជទូតជប៉ុនប្រចាំកម្ពុជាបានបន្ថែមថា បើប្រៀបធៀបជាមួយ Sky Train នៅទីក្រុងបាងកក គឺ Sky Train នៅទីក្រុងបាងកកដូចជាត្រូវការប្រើដែក ។ ដូច្នេះ វាមានឮសូរសំឡេងច្រើន (សំឡេងឮខ្លាំង) ត្រូវការទីតាំងដីធ្លីច្រើន ហើយការចំណាយក្នុងការសាងសង់ក៏ថ្លៃដែរ ។
លោក ហូរីណុអ៊ុជិ ហ៊ីដេហ៊ីសា អះអាងថា៖« ក៏ប៉ុន្តែរថភ្លើងអូតូម៉ាទិកនេះ គឺចំណាយតិច មានសំឡេងរំខានក៏តិច ហើយនឹងប្រើប្រាស់ដីធ្លីក៏តិចដែរ » ។
សម្រាប់អត្ថប្រយោជន៍ បើអាចសាងសង់តាមការស្នើសុំរបស់ប្រមុខរាជរដ្ឋាភិបាលកម្ពុជា ពេលមានរថភ្លើងស្វ័យប្រវត្តិលើអាកាសនៅក្នុងទីក្រុងភ្នំពេញ គឺវាអាចមានប្រយោជន៍ច្រើនក្នុងការកាត់បន្ថយការស្ទះចរាចរណ៍ក្នុងទីក្រុង ។ ឧទាហរណ៍ បច្ចុប្បន្ននេះ បើប្រជាពលរដ្ឋទៅព្រលានយន្តហោះអន្តរជាតិភ្នំពេញ អីចឹងពួកគាត់មិនដឹងពិតប្រាកដទេថា ត្រូវចេញពីផ្ទះម៉ោងប៉ុន្មាន ។ ក៏ប៉ុន្តែបើសិនជាមានរថភ្លើងអូតូម៉ាទិកនេះហើយ គឺគាត់ដើរតាមម៉ោង (ដឹងពេលវេលាច្បាស់លាស់) ។ ដូច្នេះ យើងមិនបាច់គិតគូរអំពីការស្ទះចរាចរណ៍ទេ ។
សម្រាប់អត្ថប្រយោជន៍ទី២ រថភ្លើងស្វ័យប្រវត្តិនេះបញ្ចេញឧស្ម័ន Co2 តិច គឺតិចជាងរថភ្លើងធម្មតា ។ ដូច្នេះ ការមានរថភ្លើងស្វ័យប្រវត្តិនេះនៅក្នុងទីក្រុងភ្នំពេញ គឺពិតជារួមចំណែកពន្លឿនសមត្ថភាព លំហូរចរាចរណ៍ល្អ និងជួយសេដ្ឋកិច្ចនៃទីក្រុងភ្នំពេញ ។
ទាក់ទងនឹងបញ្ហានេះ លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូន បានប្រាប់កោះសន្តិភាពកាលពីថ្ងៃទី៧ សីហា ថា កន្លងមក ទីភ្នាក់ងារជប៉ុនសម្រាប់កិច្ចសហប្រតិបត្តិការអន្តរជាតិ (JICA) បានសិក្សាពីគម្រោងវិនិយោគ និងសាងសង់ផ្លូវរថភ្លើងលើអាកាសនេះរួចហើយ ប៉ុន្តែការសិក្សានោះមិនទាន់បានបញ្ចប់ និងមានផែនការលម្អិតទេ។ លោកបន្តថា គម្រោងនេះត្រូវមានការសិក្សាលម្អិត និងផែនការច្បាស់លាស់ណាស់ដើម្បីធ្វើឲ្យគម្រោងនេះទទួលបានជោគជ័យ ។
លោក វ៉ា ស៊ីមសូរិយា មានប្រសាសន៍នាពេលនោះថា ៖« គម្រោងដែលសម្តេចបានស្នើឡើងនេះ អាចជាគម្រោងស្នើកម្ចីពីភាគីជប៉ុន មិនមែនជាការវិនិយោគទេ ព្រោះកន្លងមក យើងបានស្នើសុំឲ្យជប៉ុនជួយលើគម្រោងនេះ »។ លោកថា ៖« ប្រសិនជាគម្រោងនេះកើតឡើងមែន វាចំណេញច្រើនណាស់ ពិសេសជួយកាត់បន្ថយការកកស្ទះចរាចរណ៍ ហើយខ្ញុំជឿថា ប្រជាពលរដ្ឋកម្ពុជានឹងប្រើប្រាស់រថភ្លើងអាកាសធ្វើដំណើរ ដូចក្រុងបាងកកអីចឹង » ។
អ្វីដែលជាចម្ងល់នោះគឺថា តើមហាជនយល់យ៉ាងណាចំពោះគម្រោងសាងសង់រថភ្លើងស្វ័យប្រវត្តិលើអាកាស តើវាពិតជាចាំបាច់ណាស់ឬ ?
« បាទ! ប្រាកដណាស់ វានឹងជួយសម្រួលចរាចរណ៍មួយផ្នែក ហើយអាចកំណត់ពេលវេលាក្នុងការធ្វើដំណើរបានយ៉ាងងាយស្រួលបំផុត»។ នេះគឺជាការលើកឡើងរបស់លោក សេង សិទ្ធិជ័យ អគ្គនាយកក្រុមហ៊ុនជ្រើសរើសពលករមួយនៅក្រុងភ្នំពេញ ។
ជាមួយនឹងបទពិសោធន៍នៃការធ្វើដំណើរទៅក្រៅប្រទេសញឹកញាប់ក្នុងមុខជំនួញនោះ លោកធ្លាប់មានបទពិសោធន៍ចុះចេញពីរថយន្តកណ្តាលទី ហើយត្រូវឡើងជិះម៉ូតូឌុបដើម្បីឲ្យទាន់ជើងហោះហើរជាដើម ។
លោក សេង សិទ្ធិជ័យ បានឲ្យដឹងថា ៖«ជាបទពិសោធន៍ បើឡើងយន្តហោះម៉ោង១០ព្រឹកវិញ ត្រូវត្រៀមចេញដំណើរតាំងពីម៉ោង៦ ឬ៧ព្រឹក តែនេះដោយសារព្រលានយន្តហោះយើង អនុញាតឲ្យចុះឈ្មោះហោះហើរមុនត្រឹមតែ២៥នាទីទេ តែបើព្រលានយន្តហោះនៅថៃវិញ ត្រូវចុះឈ្មោះហោះហើរមុន២ម៉ោងឯណោះ » ។
លោក វន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានបង្ហាញការសាទរជាមួយរាជរដ្ឋាភិបាល ព្រោះលោកជឿជាក់ថា គម្រោងសាងសង់រថភ្លើងស្វ័យប្រវត្តិលើអាកាស នឹងគ្មានផលអវិជ្ជមានដល់បងប្អូនដែលប្រកបរបររត់ម៉ូតូកង់៣ ដឹកភ្ញៀវចេញចូលព្រលានយន្តហោះអន្តរជាតិភ្នំពេញទេ ។
លោក វន ពៅ បន្តថា ៖« សម្រាប់ខ្ញុំយល់ឃើញថា បើមានផ្លូវរថភ្លើងលើអាកាស គឺយើងអបអរសាទរ… ព្រោះថា បញ្ហានៃការកកស្ទះចរាចរណ៍សព្វថ្ងៃ គឺវាជាបញ្ហាចម្បងរបស់អ្នករត់ម៉ូតូកង់៣ផងដែរ ។ អីចឹង បើមានរថភ្លើងលើអាកាស វាជាប្រយោជន៍សម្រាប់បងប្អូនអ្នករត់ម៉ូតូកង់៣ដឹកភ្ញៀវ ដោយសារបញ្ហាកកស្ទះចរាចរណ៍ ពួកគាត់ត្រូវខាតសាំងច្រើន ។ ឧទាហរណ៍ ត្រូវចំណាយសាំងកន្លះលីត្រដឹកភ្ញៀវពីកណ្តាលក្រុងទៅកាន់ព្រលានយន្តហោះ តែជាក់ស្តែង គឺត្រូវចំណាយសាំងដល់ទៅ១លីត្រ ដោយសារតែបញ្ហាស្ទះចរាចរណ៍ » ។
យ៉ាងណាមិញ មិនថាការកកស្ទះត្រូវចំណាយសាំងច្រើនជាងមុនទេ តម្លៃនៃការដឹកភ្ញៀវជាតិ និងអន្តរជាតិទៅព្រលានយន្តហោះ គឺតម្លៃត្រឹម៧ដុល្លារសម្រាប់មនុស្សម្នាក់ដដែល ខណៈការចំណាយលើថ្លៃសាំងទ្វេមួយជាពីរក្តី ។
លោក វន ពៅ បន្តថា ៖« អីចឹង ពេលមានផ្លូវរថភ្លើងស្វ័យប្រវត្តិលើអាកាសនោះ ផ្លូវក្រោមនឹងអាចកាត់បន្ថយការកកស្ទះបានច្រើន។ វាមានប្រយោជន៍ច្រើនសម្រាប់បងប្អូនយើងជាអ្នករត់រ៉ឺម៉កដឹកភ្ញៀវ ។ សម្រាប់ខ្ញុំយល់ឃើញថា បើសិនជាផ្លូវរថភ្លើងលើអាកាសដំណើរការ វាមិនប៉ះពាល់ដល់បងប្អូនយើងទេ ព្រោះខ្ញុំគិតថា អ្នកដែលចុះពីយន្តហោះ ប្រាកដជាពេញចិត្តនឹងការធ្វើដំណើរតាមរ៉ឺម៉ក ដោយសារតែពួកគាត់ភាគច្រើនមានបទពិសោធន៍ធ្វើដំណើរជាមួយរថភ្លើងលើអាកាស ។ ដូច្នេះ អ្នកប្រើប្រាស់រថភ្លើងលើអាកាស គឺភាគច្រើនសម្រាប់តែអ្នកត្រូវឡើងយន្តហោះ ដែលតម្រូវឲ្យគាត់ទៅព្រលានយន្តហោះទាន់ពេលវេលា គឺជាមុខសញ្ញា ដែលត្រូវធ្វើដំណើរតាមរថភ្លើងលើអាកាស » ។
យោងតាមគេហទំព័ររបស់ Cambodia Airport ដែលជាក្រុមហ៊ុនទទួលបានសម្បទានដើម្បីគ្រប់គ្រងព្រលានយន្តហោះអន្តរជាតិធំៗទាំងបី បានបង្ហាញថា ចរាចរណ៍នៅព្រលានយន្តហោះកម្ពុជាបានកើនឡើង២ខ្ទង់នៅក្នុងខែមករា ឆ្នាំ២០១៧ ។
ព្រលានយន្តហោះអន្តរជាតិភ្នំពេញបានស្វាគមន៍អ្នកដំណើរជិត៣៥ម៉ឺននាក់ក្នុងខែមករា ឆ្នាំ២០១៧ កើនឡើង១៩,១% ក្នុងនោះដែរ ៣០%នៃអ្នកដំណើរសរុបនៅអាកាសយានដ្ឋានអន្តរជាតិភ្នំពេញ គឺមកពីប្រទេសចិន ម៉ាកាវ ហុងកុង និងតៃវ៉ាន់ ។ ២៤%ផ្សេងទៀតមកពីប្រទេសថៃ និង១០% មកពីម៉ាឡេស៊ី និងសិង្ហបុរី ។ អ្នកធ្វើដំណើរមកពីប្រទេសកម្ពុជាបានរួមចំណែកដល់កំណើនប្រមាណ១០%។ សម្រាប់ពេញមួយឆ្នាំ២០១៦ ព្រលានយន្តហោះអន្តរជាតិភ្នំពេញ ទទួលបានអ្នកដំណើរចំនួន៣.៣៨៨.៥៥៣នាក់ ៕
ចែករំលែកព័តមាននេះ