ទីក្រុងសេដ្ឋកិច្ចសំខាន់រងការវាយប្រហារភេរវកម្ម
ការវាយប្រហារពីភេរវជនកាលពីថ្ងៃព្រហស្បតិ៍កន្លងមក បានប៉ះពាល់ដល់ទីក្រុងដ៏សំខាន់សម្រាប់សេដ្ឋកិច្ច
ការវាយប្រហារពីភេរវជនកាលពីថ្ងៃព្រហស្បតិ៍កន្លងមក បានប៉ះពាល់ដល់ទីក្រុងដ៏សំខាន់សម្រាប់សេដ្ឋកិច្ច
ប្រទេសអេស្ប៉ាញ ៖ ការវាយប្រហារពីភេរវជនកាលពីថ្ងៃព្រហស្បតិ៍កន្លងមក បានប៉ះពាល់ដល់ទីក្រុងដ៏សំខាន់សម្រាប់សេដ្ឋកិច្ចអេស្ប៉ាញ ។
បាសេឡូណា គឺជាទីក្រុងធំជាងគេលេខ២ របស់ប្រទេសអេស្ប៉ាញ និងជាទីក្រុងដ៏សំខាន់សម្រាប់សេដ្ឋកិច្ចជាតិ ។ តំបន់នេះបានរួមចំណែកប្រមាណ២០% នៃ GDP សរុបរបស់ប្រទេសផងដែរ ។
វិស័យទេសចរណ៍គឺជាផ្នែកដ៏ធំមួយ ប៉ុន្តែវិស័យបច្ចេកវិទ្យា ការដឹកជញ្ជូនតាមនាវា និងផលិតកម្ម ក៏មានសារសំខាន់ដែរ ។
យោងតាម KPMG បានឲ្យដឹងថា តំបន់នេះទាក់ទាញការវិនិយោគពីបរទេសប្រមាណ៣៦% នៃការវិនិយោគពីបរទេសសរុបក្នុងប្រទេសអេស្ប៉ាញ កាលពីឆ្នាំ២០១៥ ។
បាសេឡូណា គឺជាទីតាំងទេសចរណ៍ដែលមានប្រជាប្រិយភាពជាងគេក្នុងប្រទេសនេះ និងទទួលភ្ញៀវទេសចរប្រមាណ៨លាននាក់ក្នុង១ឆ្នាំ ។
ទីក្រុងនេះក៏ជាមជ្ឈមណ្ឌលទិញទំនិញដ៏ធំមួយអស់រយៈពេលជាច្រើនឆ្នាំមកដែរ ព្រោះវាមានទីតាំងនៅលើឆ្នេរសមុទ្រមេឌីទែរ៉ាណេ ជិតប្រទេសបារាំង ។ ដូច្នេះ វាជាទ្វារមួយសម្រាប់ចរាចរណ៍ពីអាហ្វ្រិកខាងជើង និងអាមេរិកមកកាន់អឺរ៉ុប ។
ការដឹកជញ្ជូនតាមនាវាក៏បានលូតលាស់យ៉ាងខ្លាំងផងដែរក្នុងឆ្នាំ២០១៦ ទាំងចំនួននាវា, ទំនិញ និងអ្នកដំណើរ ។ យោងតាមអាជ្ញាធរឲ្យដឹងថា ចំនួនបានកើនឡើងដល់ទៅ១៨%ឯណោះ បើធៀបនឹងឆ្នាំមុន ។
មិនត្រឹមតែផ្លូវសមុទ្រទេដែលមានប្រជាប្រិយភាព អាកាសយានដ្ឋានរបស់បាសេឡូណា គឺមានចរាចរណ៍អ្នកដំណើរច្រើនជាងគេលេខ៧ ក្នុងអឺរ៉ុបផងដែរនៅឆ្នាំ២០១៦ ។ នេះបើយោងតាមក្រុមប្រឹក្សាអាកាសយានដ្ឋានអន្តរជាតិ ។
ទីក្រុងនេះថែមទាំងមានវិស័យបច្ចេកវិទ្យាលូតលាស់យ៉ាងលឿនទៀតផង ។ វាជាកន្លែងសម្រាប់ក្រុមហ៊ុនបច្ចេកវិទ្យាថ្មីៗ និងមានមជ្ឈមណ្ឌលស្រាវជ្រាវជាច្រើនកន្លែង ។ វិស័យនេះស្មើជាង៧% នៃសេដ្ឋកិច្ចរបស់បាសេឡូណា ។ លើសពីនេះ បាសេឡូណា គឺជាទីតាំងដ៏សំខាន់សម្រាប់ផ្នែកផលិតកម្ម និងឧស្សាហកម្មផងដែរ ។
ការនាំចេញរបស់ប្រទេសអេស្ប៉ាញប្រមាណ៣៤% គឺមកពីតំបន់ Catalonia ។ តាមទិន្នន័យរដ្ឋាភិបាលបង្ហាញថា ក្រុមហ៊ុននាំចេញរបស់អេស្ប៉ាញ១ភាគ៣ គឺស្ថិតនៅទីក្រុងបាសេឡូណា ៕
ចែករំលែកព័តមាននេះ