ក្រសួងកសិកម្មនាំពូជជន្លេនពីបរទេស ដើម្បី…
រាជធានីភ្នំពេញ ៖ កសិករមួយចំនួនបានចាប់ផ្ដើមចិញ្ចឹមជន្លេនក្រហម ដែលបានយកពីប្រទេសជិតខាង ដើម្បីធ្វើជាចំណីមាន់ ទា កង្កែប និងត្រីជាដើម និងសម្រាប់ប្រើជាជីកសិកម្មដើម្បី
រាជធានីភ្នំពេញ ៖ កសិករមួយចំនួនបានចាប់ផ្ដើមចិញ្ចឹមជន្លេនក្រហម ដែលបានយកពីប្រទេសជិតខាង ដើម្បីធ្វើជាចំណីមាន់ ទា កង្កែប និងត្រីជាដើម និងសម្រាប់ប្រើជាជីកសិកម្មដើម្បី
រាជធានីភ្នំពេញ ៖ កសិករមួយចំនួនបានចាប់ផ្ដើមចិញ្ចឹមជន្លេនក្រហម ដែលបានយកពីប្រទេសជិតខាង ដើម្បីធ្វើជាចំណីមាន់ ទា កង្កែប និងត្រីជាដើម និងសម្រាប់ប្រើជាជីកសិកម្មដើម្បីឱ្យដីផុសល្អ និងជំរុញដំណាំលូតលាស់បានលឿនរហ័ស ។
លោក សម វិទូ នាយកប្រតិបត្តិមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (សេដាក) បានឱ្យដឹងថា កសិករមួយចំនួនដែលទទួលបានការបណ្ដុះបណ្ដាលពីសេដាក បានបន្ថែមរបរចិញ្ចឹមជន្លេន ប្រភេទជន្លេនក្រហមរាប់ពាន់គ្រួសារហើយដែរ ប៉ុន្តែការចិញ្ចឹមជន្លេននេះ មិនមែនសម្រាប់លក់យកចំណេញនោះទេ។ លោកនិយាយថា ៖«ការចិញ្ចឹមជន្លេនរបស់ប្រជាកសិករ គ្រាន់តែសម្រាប់គាំទ្រដល់របរផ្សេងរបស់ពួកគាត់ ។ ជាក់ស្ដែង កសិករចិញ្ចឹមជន្លេនដើម្បីយកទៅធ្វើចំណីមាន់ ទា កង្កែប និងត្រីដែលពួកគាត់ចិញ្ចឹមប៉ុណ្ណោះ ឬក៏ចិញ្ចឹមជន្លេនសម្រាប់ធ្វើជាជីកំប៉ុសដាក់ស្រែផងដែរ » ។
លោកបន្តថា ការចិញ្ចឹមជន្លេនឆាប់ទទួលបានផលណាស់ ហើយចំណីរបស់ជន្លេន ក៏មិនពិបាករកដែរ ។ ជាក់ស្ដែង គ្រាន់តែយកលាមកគោស្រស់ទៅដាក់នៅកន្លែងចិញ្ចឹម ហើយជន្លេនជុះមកវិញ គឺអាចយកធ្វើជាជីសម្រាប់ដាក់ដំណាំ និងដាក់ស្រែបាន ។ លោកថា ៖«សម្រាប់កសិដ្ឋានចិញ្ចឹមជន្លេន មិនបាច់ធ្វើធំដុំពេកទេ យើងយកតែស្បោងប្លាស្ទីក១ម៉ែត្រ៤ជ្រុង និងជីកជម្រៅត្រឹមតែ៣តឹក ហើយយកអាច់គោទៅដាក់បាតពីក្រោម និងបន្ថែមអាច់គោពីលើជន្លេនបន្តបន្ទាប់ទៅ គឺជាការស្រេចហើយ តែជារៀងរាល់ថ្ងៃ យើងត្រូវចាក់ទឹកឱ្យសើមជាប់ជានិច្ច ដើម្បីឱ្យជន្លេននោះឆាប់ធំ » ។
លោកបន្ថែមថា កសិករដែលចិញ្ចឹមជន្លេនបច្ចុប្បន្នភាគច្រើនយកពូជពីបរទេស ព្រោះជន្លេននៅក្នុងស្រុក វាមិននៅនឹងមួយកន្លែង គឺវានឹងផ្លាស់ប្តូរទីតាំងចេញពីកសិដ្ឋាន ឬអាងចិញ្ចឹម ។ ម្យ៉ាងទៀត ជន្លេនក្នុងស្រុក ក៏មិនដឹងថា មានប្រូតេអីុនប៉ុន្មានច្បាស់លាស់ដែរ ប៉ុន្តែចំពោះជន្លេនបរទេស ដែលជាប្រភេទពូជជន្លេនក្រហម វាមានប្រូតេអីុនខ្ពស់រហូតដល់៧០ភាគរយឯណោះ ពីព្រោះជន្លេនដែលចិញ្ចឹមនោះ គេយកទៅធ្វើជាចំណីសត្វចិញ្ចឹមផង និងយកធ្វើជាជីផង ។ ដូចនេះហើយទើបកសិករជ្រើសរើសយកពូជជន្លេនក្រហមមកចិញ្ចឹម ។
នាយកប្រតិបត្តិមជ្ឈមណ្ឌលផ្នែកកសិកម្មរូបនេះ បានឱ្យដឹងទៀតថា កសិករគ្រប់ខេត្តនៃប្រទេសកម្ពុជា អាចចិញ្ចឹមជន្លេនបានគ្រប់ៗគ្នា ដោយមិនបាច់ទាល់តែខេត្តនេះ ឬខេត្តនោះទើបអាចចិញ្ចឹមបានទេ សំខាន់មានតែលាមកគោ គឺអាចចិញ្ចឹមបានហើយ ។ បើតាមអ្វីដែលលោកដឹង បច្ចុប្បន្ន មានកសិកររាប់ពាន់គ្រួសារហើយដែលចិញ្ចឹមជន្លេន ដូចជា នៅខេត្តកំពត តាកែវ កំពង់ឆ្នាំង កំពង់ស្ពឺ និងព្រៃវែងជាដើម ហើយភាគច្រើន កសិករទាំងនោះចិញ្ចឹមជន្លេនសម្រាប់យកធ្វើជាចំណីមាន់ ចំណីត្រី ដើម្បីបន្ថែមប្រូតេអុីនឱ្យត្រី និងមាន់ឆាប់ទទួលបានផល ។
លោកបញ្ជាក់ថា កន្លងមក ការនាំចូលពូជជន្លេនពីបរទេស មិនមានរបាយការណ៍ជាផ្លូវការណាមួយនៅឡើយទេ ។ សម្រាប់កសិករដែលទទួលបានការបណ្ដុះបណ្ដាលពីមជ្ឈមណ្ឌលរបស់លោក គឺបាននាំចូលតាមរយៈការសុំចែកពូជពីប្រទេសជិតខាងមកសាកល្បងចិញ្ចឹមប៉ុណ្ណោះ ។
អ្នកស្រី ជ័យ ស៊ីយ៉ាត កសិករនៅស្រុកកំពង់ត្រាច ខេត្តកំពត ដែលចិញ្ចឹមជន្លេន សម្រាប់ធ្វើជាចំណីមាន់ បានឱ្យដឹងថា មាន់របស់អ្នកស្រី ដែលស៊ីជន្លេន មិនត្រឹមតែធំធាត់លឿនរហ័សនោះទេ តែវាក៏ឈ្នះជំងឺនានាផងដែរ ។ ជាក់ស្ដែង នៅពេលរដូវក្ដៅម្ដងៗ មាន់អ្នកស្រុកតែងតែងាប់ពាសវាលពាសកាល ប៉ុន្តែសម្រាប់មាន់អ្នកស្រីវិញ គ្មានជំងឺ ឬងាប់ទេ។ ទោះជាយ៉ាងណា ក៏មានការប្រុងប្រយ័ត្នមួយចំនួនដែរដូចជា ចាប់មាន់បញ្ចូលទ្រុង និងដាក់ជន្លេនឱ្យស៊ីជាដើម ៕
ចែករំលែកព័តមាននេះ