ទិដ្ឋភាពការប្រឡងសញ្ញាប័ត្រមធ្យមសិក្សាទុតិយភូមិ ក្រុងព្រះសីហនុ
ក្រុងព្រះសីហនុ ៖ លោក កែវ ឡាយ ប្រធានមន្ទីរអប់រំយុវជន និងកីឡា ខេត្តព្រះសីហនុ
ក្រុងព្រះសីហនុ ៖ លោក កែវ ឡាយ ប្រធានមន្ទីរអប់រំយុវជន និងកីឡា ខេត្តព្រះសីហនុ បានឲ្យដឹងតាមទូរស័ព្ទកាលពីរសៀលថ្ងៃទី១៩ ខែសីហា ឆ្នាំ២០១៧ កន្លងមកនេះថា ៖ សម្រាប់ការប្រឡងសញ្ញាប័ត្រមធ្យមសិក្សាទុតិយភូមិ នៃឆ្នាំសិក្សា២០១៦-២០១៧ នឹងប្រព្រឹត្តទៅនាថ្ងៃទី២១-២២ ខែសីហា ឆ្នាំ២០១៧ សម្រាប់ខេត្តព្រះសីហនុ មានសិស្សានុសិស្ស ជាបេក្ខជន នៅក្នុងបញ្ជីរឈ្មោះប្រឡងចំនួន១៦៩៣នាក់ ក្នុងនោះមានសិស្សជាបេក្ខនារីចំនួន៨០១នាក់ ។ លោក កែវ ឡាយ បានបន្តឲ្យដឹងទៀតថា ៖ សម្រាប់មណ្ឌលប្រឡងមាន០៤មណ្ឌល គឺមណ្ឌលវិទ្យាល័យក្រុងព្រះសីហនុ, មណ្ឌលវិទ្យាល័យ ហ៊ុន សែន មិត្តភាព, មណ្ឌលអនុវិទ្យាល័យបុរីកម្មករ, និងមណ្ឌលអនុវិទ្យាល័យ សម្តេចឪ សរុបបន្ទប់ប្រឡងមាន៦៨បន្ទប់ ។ លោកបានបន្ថែមឲ្យដឹងទៀតថា ចំពោះកិច្ចដំណើរការប្រឡងត្រូវបានបែងចែកជាពីរក្រុមគឺ ៖
១.ក្រុមប្រឡងលើវិញ្ញាសារសំណេរផ្នែកសិក្សាសង្គមមានឈ្មោះបេក្ខជន បេក្ខនារី ក្នុងបញ្ជីរឈ្មោះចូលរួមប្រឡងចំនួន៩០០នាក់ ក្នុងនោះមានបេក្ខនារីចំនួន៣៨២នាក់ ។ មានចំនួន០២មណ្ឌល ស្មើរនឹង៣៦បន្ទប់ ។
២.ក្រុមប្រឡងលើវិញ្ញាសារវិទ្យាសាស្ត្រមានបេក្ខជន បេក្ខនារី ក្នុងបញ្ជីរឈ្មោះប្រឡងចំនួន៧៩៣នាក់ ក្នុងនោះមានបេក្ខនារីចំនួន៤១៩នាក់ ។ បែងចែកជា០២មណ្ឌលស្មើរនឹង៣២បន្ទប់ ។
លោកប្រធានមន្ទីរអប់រំយុវជន និងកីឡាខេត្ត បានបញ្ជាក់ជាចុងក្រោយថា ៖ ក្នុងឆ្នាំសិក្សា២០១៦-២០១៧ ចំនួនបេក្ខជន បេក្ខនារី ក្នុងបញ្ជីរឈ្មោះប្រឡងមានការថយចុះចំនួន១៣៨នាក់ ។ ហើយនៅក្នុងថ្ងៃកិច្ចដំណើរការនៃការប្រលងខាងលើនេះដែរ ត្រូវបានរឹតបន្តឹងដោយកម្លាំងប្រដាប់អាវុធ និងមានអ្នកស្ម័គ្រចិត្តចូលរួមសង្កេតការណ៍ មកពីអង្គភាពប្រឆាំងអំពើរពុករលួយ (ACU) បានចូលរួមសង្កេតការណ៍ នៅតាមមណ្ឌលប្រឡងនិមួយៗផងដែរ ។ ហើយនៅក្នុងថ្ងៃទី១ នៃការប្រឡងសញ្ញាប័ត្រមធ្យមសិក្សាទុតិយភូមិ នៅមណ្ឌលប្រឡងវិទ្យាល័យក្រុងព្រះសីហនុ ក៏មានវត្តមានលោក យន្ត មីន អភិបាលខេត្តព្រះសីហនុ និងលោក កែវ ឡាយ ប្រធានមន្ទីរអប់រំយុវជន និងកីឡាខេត្ត ចូលរួមក្នុងការបើកវិញ្ញាសារប្រឡងប្រចាំឆ្នាំសិក្សា២០១៦-២០១៧នេះផងដែរ ៕
ចែករំលែកព័តមាននេះ