គម្រោងបង្កើតសាលាភាពយន្តនៅកម្ពុជាមិនទាន់ចេញជារូបរាង…
រាជធានីភ្នំពេញ ៖ រហូតមកដល់ពេលនេះគម្រោងបង្កើតសាលាបណ្តុះបណ្តាលសិល្បៈភាពយន្តនៅក្នុងប្រទេសកម្ពុជា នៅមិនទាន់ចេញជារូបរាងនៅឡើយទេ បន្ទាប់ពីគម្រោងមួយនេះ
រាជធានីភ្នំពេញ ៖ រហូតមកដល់ពេលនេះគម្រោងបង្កើតសាលាបណ្តុះបណ្តាលសិល្បៈភាពយន្តនៅក្នុងប្រទេសកម្ពុជា នៅមិនទាន់ចេញជារូបរាងនៅឡើយទេ បន្ទាប់ពីគម្រោងមួយនេះ
រាជធានីភ្នំពេញ ៖ រហូតមកដល់ពេលនេះគម្រោងបង្កើតសាលាបណ្តុះបណ្តាលសិល្បៈភាពយន្តនៅក្នុងប្រទេសកម្ពុជា នៅមិនទាន់ចេញជារូបរាងនៅឡើយទេ បន្ទាប់ពីគម្រោងមួយនេះលេចលឺកាលពីអំឡុងឆ្នាំ២០០៦-២០០៧ ។
លោកផុក បូរះ ប្រធាននាយកដ្ឋានភាពយន្តនៃក្រសួងវប្បធម៌និងវិចិត្រសិល្បៈបានអះអាងប្រាប់កោះសន្តិភាពតាមទូរស័ព្ទកាលពីពេល ថ្មីៗកន្លងមកថាគម្រោងបង្កើតសាលាបណ្តុះបណ្តាលផ្នែកភាពយន្តរហូតមកដល់ពេលនេះហាក់នៅទ្រឹងនៅឡើយ ។ កន្លងមកកម្ពុជាយើងធ្លាប់បានធ្វើកិច្ចសហប្រតិបត្តិការជាមួយនឹងសហសាកលវិទ្យាសិល្បៈនៅប្រទេសកូរ៉េខាងត្បូងនាអំឡុងឆ្នាំ២០០៦ និង២០០៧ ដើម្បីបង្កើតសាលាបណ្តុះបណ្តាលភាពយន្តនេះឡើង ។ ប៉ុន្តែក្រោយមកគម្រោងនេះបានរាំងស្ទះទៅវិញ បន្ទាប់ពីប្រទេសកូរ៉េបានជួបនឹងបញ្ហាវិបត្តិសេដ្ឋកិច្ចផង និងការផ្លាស់ប្តូររដ្ឋាភិបាលផង ។
បើតាមលោកផុក បូរះ តាមរយៈកិច្ចសហប្រតិបត្តិការជាមួយប្រទេសកូរ៉េនាពេលនោះ គឺខាងភាគីកូរ៉េជួយទាំងស្រុងទាំងធនធានគ្រូ និងសម្ភារនៃការបណ្តុះបណ្តាល ចំណែកខាងយើងគឺត្រៀមតែទីតាំងប៉ុណ្ណោះ ដោយយើងបានគ្រោងយកទៅដាក់នៅសាលាភូមិន្ទវិចិត្រសិល្បៈ ។
ទោះជាយ៉ាងណាក្តីបញ្ហាចំពោះមុខ បើទោះជាគម្រោងមួយនេះរាំងស្ទះក៏ពិតមែន ប៉ុន្តែក្រសួងវប្បធម៌និងវិចិត្រសិល្បៈតែងតែព្យាយាមធ្វើយ៉ាងណាឲ្យមានសាលាបណ្តុះបណ្តាលលើផ្នែកសិល្បៈភាពយន្ត ។
លោកផុក បូរះ ឲ្យដឹងបន្ថែមថា ឈរលើមូលដ្ឋានចាំបាច់ខាងលើនេះ កន្លងមកក្រសួងក៏បានបើកវគ្គបណ្តុះបណ្តាល ខ្លីៗលើជំនាញភាពយន្ត ។ ជាក់ស្តែងមុខវិជ្ជានេះមានសាលាឯកជនមួយចំនួនធ្លាប់បានដាក់បញ្ចូលក្នុងកម្មវិធីសិក្សារបស់ខ្លួនដែរ ប៉ុន្តែហាក់មិនបានជោគជ័យដោយសារមិនមានសិស្សច្រើនដាក់ពាក្យចូលរៀន ។
លោកផុក បូរះ បញ្ជាក់ថា ការដែលយើងអាចឈានទៅដល់ការបើកសាលាបណ្តុះបណ្តាលលើជំនាញភាពយន្តបានគឺត្រូវពឹងផ្អែកលើកក្តា ធំៗចំនួន៣ គឺទី១ ធនធានគ្រូបង្រៀន ទី២កត្តាសិស្ស និងទី៣សម្ភារបច្ចេកទេសក្នុងការបណ្តុះបណ្តាល ។
កក្តាធនធានគ្រូគឺយើងសំដៅទៅលើគ្រូដែលមានជំនាញពាក់ព័ន្ធដូចជា ផ្នែកកាត់ត រៀបចំប្លង់ ដឹកនាំរឿង និងការសរសេររឿង។ល។ ចំណែកកត្តាសិស្សវិញ គឺត្រូវធ្វើយ៉ាងណាដើម្បីធានាឲ្យបាននូវនិរន្តរភាពនៅពេលដែលសិស្សរៀនចប់ហើយអាចមានទីផ្សារការងារ ។ ចំពោះបញ្ហាសម្ភារបច្ចេកទេសគឺត្រូវទាមទារឲ្យមានគ្រប់គ្រាន់សម្រាប់សិស្សអនុវត្តដោយផ្ទាល់ក្រោយរៀនទ្រឹស្តី ។
លោកផុក បូរះ បានបដិសេធចំពោះទស្សនៈរបស់អ្នកដឹកនាំរឿងមួយចំនួន ដោយបានលើកឡើងថា ពុំមានការចាំបាច់ក្នុងការបង្កើតសាលាភាពយន្តនេះឡើយ ព្រោះការទទួលបទពិសោធន៍ពីរៀមច្បង ចាស់ៗ និងការមើលដោយភ្នែករបស់ខ្លួនពីការដឹកនាំរបស់គេ ផ្សេងៗនោះក៏ជាការសិក្សាមួយដើម្បីឈានទៅដល់ការអាចមានសមត្ថភាពដឹកនាំភាពយន្តបានដែរ ។ លោកផុក បូរះ ថ្លែងថា «ទស្សនៈមួយនេះគឺវានឹងនាំទៅរកភាពបរាជ័យនាពេលអនាគតទៅវិញទេ ព្រោះការទទួលការបណ្តុះបណ្តាលពីសាលាត្រឹមត្រូវគឺជាគោលការណ៍គ្រឹះសម្រាប់ការអភិវឌ្ឍទៅថ្ងៃមុខ។ ការបណ្តុះបណ្តាលមួយដោយមានភាពត្រឹមត្រូវ និងច្បាស់លាស់វានឹងធ្វើឲ្យវិស័យភាពយន្តយើងមាននិរន្តរភាពនិងអាចមានលទ្ធភាពប្រកួតប្រជែងជាមួយភាពយន្តក្នុងតំបន់ និងនៅលើពិភពលោកផងដែរ» ៕
ចែករំលែកព័តមាននេះ