រាជធានីភ្នំពេញ ៖ ស្របពេលការបាក់ឬ ស្រុតដីនៅការដ្ឋានកំពុងសាងសង់ កើតមានជារឿយៗ អាជ្ញាធររាជធានីភ្នំពេញបានជំរុញឲ្យអ្នកវិនិយោគគិតគូរពីគុណភាពសំណង់ឲ្យបានហ្មត់ចត់ ដើម្បី
រាជធានីភ្នំពេញ ៖ ស្របពេល ការបាក់ឬ ស្រុតដីនៅការដ្ឋានកំពុងសាងសង់ កើតមានជារឿយៗ អាជ្ញាធររាជធានីភ្នំពេញបានជំរុញឲ្យអ្នកវិនិយោគគិតគូរពីគុណភាពសំណង់ឲ្យបានហ្មត់ចត់ ដើម្បីបញ្ចៀសគ្រោះថ្នាក់កើតមានជាយថាហេតុ ។
ក្នុងឱកាសចុះពិនិត្យការដ្ឋានសំណង់នៃគម្រោងប៊ូយ៉ុង កាលពីព្រឹកថ្ងៃទី១៧ សីហា លោក ឃួង ស្រេង បានអំពាវនាវដល់អ្នកវិនិយោគ និងក្រុមហ៊ុនម៉ៅការសាងសង់ទាំងអស់ បង្កើនការប្រុងប្រយ័ត្នខ្ពស់ និងសិក្សាឱ្យបានច្បាស់លាស់ ដើម្បីបញ្ចៀសនូវហានិភ័យដែលអាចនឹងប៉ះពាល់ដល់ប្រជាពលរដ្ឋរស់នៅជុំវិញសំណង់អគារ និងម្ចាស់គម្រោងផ្ទាល់ ។
លោកបន្តថា ៖« កាលពីខ្ញុំនៅជាអភិបាលរងក្រុង តែងជួបប្រទះជារឿយៗនូវបញ្ហា និងទទួលបានពាក្យបណ្ដឹងពីប្រជាពលរដ្ឋរស់នៅជិតខាងនៃខុនដូ និងសំណង់អគារខ្ពស់ៗនៅក្នុងរាជធានីភ្នំពេញ ពិសេស ក្នុងខណ្ឌទាំង៤ក្នុងទីក្រុង គ្រាដែលពួកគាត់រស់នៅជិតនោះជួបនឹងបញ្ហាប៉ះពាល់ និងខូចខាតដល់ទ្រព្យសម្បត្ដិ ដោយសារតែក្រុមហ៊ុនមិនបានសិក្សាឱ្យបានច្បាស់លាស់ពីសណ្ឋានដី ព្រោះភាគច្រើនទីតាំងនៅក្នុងខណ្ឌទាំង៤នោះជាអតីតដីបឹង ដែលត្រូវបានចាក់បំពេញដោយដីខ្សាច់ » ។
លោកអភិបាលរាជធានីបានអំពាវនាវដល់បងប្អូនប្រជាពលរដ្ឋ និងម្ចាស់គម្រោងវិនិយោគត្រូវសិក្សាច្បាស់លាស់ និងបង្កើនការប្រុងប្រយ័ត្នឱ្យបានហ្មត់ចត់ មុននឹងជីកដីសាងសង់សំណង់របស់ខ្លួន ។ ភាគច្រើនអគារខ្ពស់ៗ ឬខុនដូទាំងនោះត្រូវជីកដីចុះទៅក្រោម ធ្វើចំណតរថយន្តក្រោមដី ។ ដូច្នេះ មុននឹងធ្វើចំណតទាំងនោះ ត្រូវតែមានបច្ចេកទេសទប់ស្កាត់កុំឱ្យមានការហូរច្រោះបាក់ដី ធ្វើយ៉ាងណា កុំឱ្យបង្កគ្រោះថា្នក់ដល់ប្រជាពលរដ្ឋជិតខាង ដែលអាចនឹងកើតជាទំនាស់ ព្រោះនៅពេលមានទំនាស់ វានឹងធ្វើឱ្យពួកគាត់ខាតពេលវេលា និងថវិកា ព្រោះសំណង់នោះនឹងត្រូវផ្អាកជាបណ្តោះអាសន្ន ។
ជាងនេះទៀត លោក ឃួង ស្រេង ក៏បានសង្កត់ធ្ងន់ដល់ក្រុមហ៊ុនដែលទទួលម៉ៅការសាងសង់ ត្រូវសិក្សាពីសណ្ឋានដីឱ្យបានច្បាស់លាស់ថា នៅក្នុងរាជធានី ដីមួយផ្នែកធំជាដីបូមខ្សាច់ចាក់បំពេញ វាមិនមែនជាដីឥដ្ឋ ឬដីគោកមានតាំងយូរយារមកនោះទេ ។
កាលពីចុងឆ្នាំមុន គម្រោងវិនិយោគដ៏ធំនៅកណ្តាលរាជធានីភ្នំពេញ គឺគម្រោង Olympia City បានបាក់ស្រុតដីនៅជាប់ការដ្ឋានសាងសង់របស់ខ្លួន ដែលបណ្តាលឲ្យរថយន្តចតនៅក្បែរការដ្ឋាននោះធ្លាក់ចុះនៅកន្លែងបាក់ស្រុត និងរថយន្តទាំងនោះខូចខាតមួយចំនួន ។ ប៉ុន្តែភ្លាមៗនោះ ខាងក្រុមហ៊ុនវិនិយោគអាណិកជនខ្មែរនៅក្រៅប្រទេស OCIC បានបុកបង្ហាប់ និងជួសជុលឡើងវិញ ។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានថ្លែងថា គុណភាពសំណង់ គឺជាបញ្ហាដែលក្រសួងយកចិត្តទុកដាក់ណាស់ ព្រោះមុននឹងសាងសង់ ក្រសួងបានតម្រូវឲ្យម្ចាស់ការដ្ឋាន ឬបុរីនានាដាក់ឯកសារស្នើសុំបើកការដ្ឋានសាងសង់ ដែលបញ្ជាក់ពីលក្ខណៈបច្ចេកទេសច្បាស់លាស់ ណាស់ ហើយនៅពេលបិទការដ្ឋានសាងសង់ ក្រុមហ៊ុន ឬនិតិបុគ្គលត្រូវដាក់លិខិត ឬឯកសារ ដើម្បីស្នើសុំបិទការដ្ឋានច្បាស់លាស់ ព្រោះយើងមានមន្ត្រីបច្ចេកទេសតែងតែចុះត្រួតពិនិត្យជាប្រចាំផងដែរ ។ លោកបន្តថា ៖« គុណភាពសំណង់ មិនមានអ្វីចោទជាបញ្ហាទេ ដោយសារយើងធ្វើការតាមនីតិវិធី និងលក្ខណៈបច្ចេកទេសត្រឹមត្រូវ » ។
ទោះជាយ៉ាងណា ប្រជាពលរដ្ឋជាច្រើន ដែលបានទិញលំនៅឋាននៅតាមបុរីនានា តែងរអ៊ូរទាំពីបញ្ហាគុណភាពសំណង់លំនៅឋានរបស់ពួកគេ ដូចជា ស្រុតការ៉ូ ជ្រាបទឹក និងការតបណ្តាញអគ្គិសនីគ្មានគុណភាព ដែលធ្វើឲ្យពួកគេប្រឈមមុខនឹងហានិភ័យជាច្រើនក្នុងលំនៅឋាន ។
លោក សៅ កុសល ប្រជាពលរដ្ឋរស់នៅបុរីចំការស្វាយ ស្ថិតក្នុងសង្កាត់និរោធ ខណ្ឌច្បារអំពៅ បានថ្លែងថា លោកបានចំណាយថវិកាជិត៣ពាន់ដុល្លារអាមេរិកដើម្បីជួសជុលរៀបចំការ៉ូក្នុងផ្ទះឡើងវិញ ដោយសារក្នុងផ្ទះរបស់លោកបានស្រុតការ៉ូ និងតែងតែជ្រាបទឹកជាប្រចាំពីបន្ទប់ទឹកនៅជាន់ឡៅតឿនៃផ្ទះរបស់ខ្លួន ។
លោកបន្តថា ទាក់ទងនឹងបណ្តាញអគ្គិសនីតចូលផ្ទះវិញ ក៏គ្មានគុណភាពដែរ ដែលធ្វើឲ្យលោកត្រូវហៅជាងមកធ្វើតេស្តជាច្រើនដង ដោយសារខ្លាចមានបញ្ហាចរន្តអគ្គិសនីក្នុងផ្ទះរបស់លោក ។
លោកបន្ថែមថា ៖« តាមលក្ខណៈបច្ចេកទេស និងឯកសារដាក់ជូនក្រសួងពីម្ចាស់បុរីនានាតែងតែសរសេរថាល្អ ប៉ុន្តែការអនុវត្តជាក់ស្តែងមិនបានតាមបទដ្ឋានត្រឹមត្រូវទេ»។ លោកបន្តថា ៖«ក្រសួងរៀបចំដែនដី គួរតែពិនិត្យមើលការងារមន្ត្រីរបស់ខ្លួន តើពួកគេចុះទៅដើម្បីត្រួតពិនិត្យពិតប្រាកដ ឬក៏ទទួលស្រោមសំបុត្រ » ៕
ចែករំលែកព័តមាននេះ