ខេត្តកណ្តាល ៖ ប្រភពពីមន្ត្រីក្នុងសាលាស្រុកខ្សាច់កណ្ដាលសុំមិនបញ្ចេញឈ្មោះបានខ្សឹបខ្សៀវទាំងភ័យខ្លាចប្រាប់អង្គភាពសារព័ត៌មានកោះសន្តិភាពឲ្យដឹងថា មានអ្នកមានលុយមានអំណាចម្នាក់កំពុងតែធ្វើរបងថ្មដ៏រឹងមាំបិទផ្លូវសាធារណៈចុះទៅមាត់ទន្លេធ្វើជាកម្មសិទ្ធិរបស់ខ្លួនដោយមានការសម្របសម្រួលពីបងប្អូនប្រជាពលរដ្ឋខ្លះនៅក្នុងមូលដ្ឋាន ។
ក្រោយពេលទទួលព័ត៌មានភ្លាមៗ អង្គភាពយើងបានចុះទៅដល់ទីតាំងជាក់ស្ដែង មានការធ្វើរបងរឹងមាំបិទផ្លូវចូលទន្លេពិតប្រាកដមែន និងបានផ្តិតរូបភាពចុះផ្សាយជូនជាដំណឹងដល់មន្ត្រីពាក់ព័ន្ធក្នុងសាលាស្រុកខ្សាច់កណ្ដាល និងខេត្តកណ្ដាលដើម្បីជ្រាបជាព័ត៌មាន និងមានវិធានការទប់ស្កាត់ ដែលមានទីតាំងផ្លូវចូលតាមស្ពានព្រែកថោង ជាប់ភោជនីយដ្ឋានមង្គលមេគង្គ ស្ថិតក្នុងភូមិព្រែកតាកូវ ឃុំព្រែកតាកូវ ស្រុកខ្សាច់កណ្តាល ខេត្តកណ្ដាល នៅខាងមាត់ទន្លេ ។
ប្រភពបន្តថា អ្នកមានអំណាចម្នាក់អាចបិទផ្លូវធ្វើរបងថ្មដ៏រឹងមាំរបស់ផ្លូវសាធារណៈបានដោយមានការជ្រោមជ្រែងសម្របសម្រួលពីលោកហ៊ួត ហាក់ ប្រធានការិយាល័យសេដ្ឋកិច្ច ស្រុកខ្សាច់កណ្ដាល ។ បញ្ចុះបញ្ចូលបងប្អូនប្រជាពលរដ្ឋក្នុងមូលដ្ឋាន ភូមិព្រែកតាកូវ ជាថ្នូរនិងធ្វើផ្លូវបេតុងមួយខ្សែទទឹង២ម៉ែត្របណ្តោយប្រវែង៦៥ម៉ែត្រ ដើម្បីជាការលួងចិត្តដល់បងប្អូនប្រជាពលរដ្ឋកុំអោយរករឿងខ្លួន ប៉ុន្តែនៅតែផ្ទុះកក្រើកដដែល ។
ពលរដ្ឋក្នុងឃុំព្រែកតាកូវមិនពេញចិត្ត និងទង្វើបែបនេះក៏បានបន្តថា ក្នុងនាមជាប្រជាពលរដ្ឋមិនគួរណាហ៊ានអត្តនោម័តឃុបឃិតជាមួយអ្នកមានលុយ មានអំណាច ដើម្បីតែប្រយោជន៍បន្តិចបន្តួច ហ៊ានយកផ្លូវសាធារណៈធ្វើការដោះដូរជាថ្នូរផ្លូវបេតុងមួយខ្សែទល់តែសោះមិនខ្លាចញញើតនិងមន្ត្រីមានអំណាចក្នុងមូលដ្ឋានភូមិ-ឃុំ-ស្រុក-ក្នុងខេត្តកណ្តាលទាល់តែសោះ ពិតជាថ្លើមធំមែន ឬក៏មានការបើកដៃពីសំណាក់មន្ត្រីពាក់ព័ន្ធក្នុងស្រុក/ខេត្ត រួចទៅហើយទើបបុគ្គលរូបនេះ ហ៊ានរៀបឥដ្ឋបិទផ្លូវបានដោយរលូនរំខានដល់មន្ត្រីពាក់ព័ន្ធក្នុងមូលដ្ឋាន។
បើតាមការបញ្ជាក់ពីលោក អឿ សំអ៊ន មេឃុំព្រែកតាកូវបានប្រាប់អង្គភាពកោះសន្តិភាពថា លោកមិនបានដឹងរឿងហ្នឹងទេ លោកបានប្រាប់ថា ដោយមានម្ចាស់ដីអ្នកមានលុយមានអំណាចម្នាក់ ឈ្មោះ កែ ណៃហ៊ួត បានទៅសម្របសម្រួល ជាមួយប្រជាពលរដ្ឋនិងជាថ្នូរចាក់ផ្លូវបេតុងមួយខ្សែប្រវែង៦៥ម៉ែត្រ ជូនប្រជាពលរដ្ឋដើម្បីការដោះដូរនិងសុំធ្វើការបិទផ្លូវមួយខ្សែដែលជាដីផ្លូវរបស់រដ្ឋជាប់ដីនិងរបងរបស់ខ្លួន ដែរមានទទឹង២ម៉ែត្រកន្លះ បណ្ដោយទល់និងទន្លេតែម្តង ។
លោកមេឃុំបានបន្តប្រាប់ថា លោកបានដឹកនាំកម្លាំងចុះពិនិត្យធ្វើការហាមឃាត់វាយចោលពីរដងមកហើយ តែម្ចាស់ផ្ទះនៅតែឌឺរឹងរូសព្យាយាមសម្របសម្រួលជាមួយបងប្អូនប្រជាពលរដ្ឋមូលដ្ឋាន និងមន្ត្រីនៅក្នុងសាលាស្រុកឲ្យជួយដើម្បីដោះដូរធ្វើផ្លូវបេតុងមួយខ្សែដែលមានប្រវែង៦៥ម៉ែត្រទទឹង២ម៉ែត្រតែគ្នាគាត់ ហើយម្ចាស់ដីមួយនេះព្យាយាមមកសម្របសម្រួលឲ្យលោកចូលរួមផ្តិតមេដៃ តែលោកបដិសេធថា មិនចូលរួមទេគឺជារឿងខុសច្បាប់អស់លោកធ្វើអីបានជាមួយប្រជាពលរដ្ឋធ្វើទៅខ្ញុំមិនដឹងឮទេ ។
តាមប្រភពច្បាស់កាលពីមន្ត្រីក្នុងសាលាស្រុកម្នាក់បានប្រាប់អង្គភាពកោះសន្តិភពអោយដឹងថាក្នុងរឿងនិងមានមន្ត្រីម្នាក់ជាប្រធានការិយាល័យសេដ្ឋកិច្ចនៃសាលាស្រុកខ្សាច់កណ្ដាលជាអ្នកមានសមត្ថភាពចេញមុខទៅសម្របសម្រួលជាមួយប្រជាពលរដ្ឋទើបមានការយល់ព្រមទើបអាចបិទដីផ្លូវរបស់សាធារណរចូលទន្លេបាន។
ជុំវិញពាក់ព័ន្ធនឹងបញ្ហាខាងលើនេះ អង្គភាពសារព័ត៌មានយើង មិនអាចសុំការបំភ្លឺ ពីលោកចេង ឌីណា អភិបាលស្រុកខ្សាច់កណ្តាលបានទេ ដោយទូរសព្ទចូលជាច្រើនលើកតែគ្មានអ្នកទទួល ។
ព័ត៌មានលម្អិតនឹងមានផ្សាយជូនបន្តលើកាសែតកោះសន្តិភាព ។
ចែករំលែកព័តមាននេះ