មន្ត្រីរដ្ឋបាលព្រៃឈើជំរិតទារប្រាក់10ដុល្លារនោះ…ត្រូវ
មន្ដ្រីផ្នែករដ្ឋបាលព្រៃឈើឆ្លូង លោក ឃួន ជីវិន
ខេត្តក្រចេះ ៖ មន្ដ្រីផ្នែករដ្ឋបាលព្រៃឈើឆ្លូង លោក ឃួន ជីវិន ដែលរងការចោទពីបទជំរិតទារប្រាក់ពីអ្នកបើករថយន្តដឹកជន្លង់ម្រេចនៅស្រុកស្នួលចំនួន១០ដុល្លារនោះ បានត្រូវសម្រេចឃុំខ្លួនជាបណ្តោះអាសន្ននៅពន្ធនាគារខេត្ត កាលពីល្ងាចថ្ងៃទី១៧ ខែសីហា ។
ព្រះរាជអាជ្ញាអមសាលាដំបូងខេត្ត លោកកែវ សុជាតិ បានឱ្យដឹងថា ក្រោយការនាំខ្លួនមកសាកសួរអស់រយៈពេលប្រមាណ៣ម៉ោងតំណាងអយ្យការបានសម្រេចធ្វើការចោទប្រកាន់ចំនួន២បទល្មើសគឺទី១-រំលោភអំណាចតាមមាត្រា៣៥នៃច្បាប់ស្តីពីការប្រឆាំងអំពើពុករលួយ និងទី២-អនុគ្រោះចំពោះបទល្មើសព្រៃឈើដោយមន្ដ្រីរដ្ឋបាលព្រៃឈើ តាមមាត្រា១០១ កថាខណ្ឌទី៣ នៃច្បាប់ស្តីពីព្រៃឈើ ។
បើយោងតាមដីកាបង្គាប់ឱ្យឃុំខ្លួនចេញដោយលោកចៅក្រមស៊ើបសួរនៃសាលាដំបូងខេត្ត គឺលោក ញ៉ិល ប៊ុនលី បានសម្រេចចេញដីកាបង្គាប់ឱ្យឃុំខ្លួនមន្ដ្រីផ្នែករដ្ឋបាលព្រៃឈើ ឆ្លូង លោក ឃួន ជីវិន អាយុ៤៣ឆ្នាំ មានទីលំនៅភូមិព្រៃល្ពៅ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ សព្វថ្ងៃមានមុខងារជាមន្ត្រីផ្នែករដ្ឋបាលព្រៃឈើឆ្លូង ។
ការចាប់ឃាត់ខ្លួននិងឈានដល់ការឃុំខ្លួននេះ គឺធ្វើឡើងបន្ទាប់ពីមន្ត្រីរដ្ឋបាលព្រៃឈើរូបនេះ ដែលបានទៅបម្រើការងារនៅផ្នែករដ្ឋបាលព្រៃឈើឆ្លូងកាលពីពេលថ្មីៗកន្លងមក បានបើករថយន្តហាយឡែនឌ័រមួយគ្រឿង ទៅស្ទាក់ចាប់រថយន្តទួរីសដឹកជន្លង់ម្រេចនៅផ្លូវជាតិលេខ៧ ចំណុចភូមិព្រិច ឃុំឃ្សឹម ស្រុកស្នួល ដើម្បីជំរិតយកប្រាក់ក្នុងមួយរថយន្ត១០ដុល្លារ ។
មន្ត្រីរដ្ឋបាលព្រៃឈើរូបនេះ បានលើកហេតុផលទៅអ្នករកស៊ីដឹកជន្លង់ម្រេចទាំងនោះថា ការដឹកជញ្ជូនមិនប្រាប់គាត់ឱ្យដឹងមុន បើទោះបីជាអ្នករកស៊ីបានឆ្លើយប្រាប់ថា មកពីមិនបានដឹងថាគាត់ទើបមកកាន់ការងារថ្មី និងសុំបង់ត្រឹម១មុឺនរៀលដូចគេដូចឯង ។ ប៉ុន្តែមន្ត្រីរដ្ឋបាលព្រៃឈើរូបនេះក៏នៅតែមិនព្រម និងបានបង្គាប់ឱ្យអ្នករកស៊ីត្រូវបង់មុនដំបូង១០ដុល្លារ ព្រោះគាត់ត្រូវការចំណាយច្រើនចាំលើកក្រោយចាំបង់ដូចគេដូចឯង ។
ជុំវិញករណីលោក ឃួន ជីវិន មន្ត្រីផ្នែករដ្ឋបាលព្រៃឈើឆ្លូងជំរិតទារលុយនេះ ក៏ត្រូវបានក្រុមអ្នករកស៊ីដឹកជន្លង់ម្រេចលួចថតបាន និងបង្ហោះឃ្លីបវីដេអូតាមហ្វេសប៊ុក ទើបបង្កឱ្យមានការភ្ញាក់ផ្អើលឡើង ។ក្រោយការបែកធ្លាយពីសកម្មភាពជំរិតទារលុយ តាមរយៈការបង្ហោះឃ្លីបវីដេអូនេះរួចមក មន្ទីរកសិកម្ម រុក្ខាប្រមាញ់ និងនេសាទខេត្ត កាលពីថ្ងៃទី១៥ ខែសីហា ឆ្នាំ២០១៧ បានចេញសេចក្ដី សម្រេចផ្លាស់មន្ត្រីរូបនេះឱ្យទៅបម្រើការងារនៅខណ្ឌរដ្ឋបាលព្រៃឈើក្រចេះវិញ។
ប៉ុន្តែ បើទោះជាមានការផ្លាស់ប្តូរកន្លែងធ្វើការងារយ៉ាងណាក្តី ក៏សំណុំរឿងនេះនៅតែជារឿងក្តៅគគុកមួយ រហូតឈានដល់ការចាប់ឃាត់ខ្លួនមន្ត្រីរដ្ឋបាលព្រៃឈើរូបនេះ នាំមកសាកសួរពីសកម្មភាពល្មើសនេះផងដែរ ។សេចក្តីរាយការណ៍ឱ្យដឹងថា អង្គភាពប្រឆាំងអំពើពុករលួយ បានចាប់ឃាត់ខ្លួនមន្ត្រីរដ្ឋបាលព្រៃឈើឈ្មោ ឃួន ជីវិន កាលពីល្ងាចថ្ងៃទី១៦ ខែសីហា ដើម្បីអនុវត្តនីតិវិធី ហើយរហូតដល់រសៀលថ្ងៃទី១៨ ខែសីហា បានចាត់បញ្ជូនទៅសាលាដំបូង និងឈានដល់ការឃុំខ្លួន ៕
ចែករំលែកព័តមាននេះ