ពឹងមិត្តភក្តិឱ្យបើកម៉ូតូឌុបជូនទៅផ្ទះ បែរជាឌុបទៅឲ្យគេកា.ប់
ខេត្តប៉ៃលិន ៖ មានករណីអំពើហិ.ង្សាដោយចេតនាមួយបានកើតឡើង
ខេត្តប៉ៃលិន ៖ មានករណីអំពើហិ.ង្សាដោយចេតនាមួយបានកើតឡើង
ខេត្តប៉ៃលិន ៖ មានករណីអំពើហិង្សាដោយចេតនាមួយបានកើតឡើង ខណៈយុវជនម្នាក់បានពឹងយុវជនម្នាក់ទៀតឲ្យឌុបខ្លួនទៅផ្ទះ តែបែរជាឌុបយកទៅឲ្យយុវជនផ្សេងទៀត យកកាំបិតកាប់ បណ្តាលឲ្យរងរបួសធ្ងន់ឈាមហូរជោកខ្លួន ហើយត្រូវបានសាច់ញាតិដឹកមកសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ។ ហេតុការណ៍យុវជនកាប់គ្នាខាងលើនេះ បានកើតឡើងនៅកាលពីវេលាម៉ោង១ និង២០នាទីរសៀល ថ្ងៃទី១៧ ខែសីហា ឆ្នាំ២០១៧ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ។ ប្រភពព័ត៌មានបានឱ្យដឹងថា ជនរងគ្រោះមានឈ្មោះ រឹម ប៊ុនធឿន ភេទប្រុស អាយុ២៦ឆ្នាំ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ រងរបួសដៃខាងឆ្វេង ត្រូវមួយកាំបិត (ធ្ងន់)។
ចំណែកជនដៃដល់ឈ្មោះ អ៊ឹម រដ្ឋធី ភេទប្រុស អាយុ២៦ឆ្នាំ រស់នៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ និងម្នាក់ទៀតជាជនរួមគំនិត ដែលជាអ្នកដឹកជនរងគ្រោះ យកទៅឲ្យគេកាប់ឈ្មោះ អ៊ឹម រដ្ឋា ភេទប្រុស អាយុ២៧ឆ្នាំ ត្រូវជាបងបង្កើតរបស់ជនដៃដល់ រស់នៅជាមួយគ្នា បានរត់គេចខ្លួនទាំងពីរបាត់ស្រមោល។ ប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនដំបូងជនរងគ្រោះ ឈ្មោះ រឹម ប៊ុនធឿន បានពឹងឲ្យឈ្មោះ អ៊ឹម រដ្ឋា ជិះម៉ូតូឌុបទៅផ្ទះដោយមិនដឹងថាមានឈ្មោះ អ៊ឹម រដ្ឋធី ជាជនដៃដល់កំពុងរង់ចាំនៅទីនោះទេ លុះដល់ចំណុចកើតហេតុ ក្បែរសាលារៀនផ្សារព្រំប្រហែល១០០ម៉ែត្រ ក៏ជួបជនដៃដល់ពេលនោះបានយកកាំបិតស្ទុះទៅកាប់ជនរងគ្រោះត្រូវចំដៃខាងធ្វេងពេញទំហឹង បណ្តាលឲ្យរងរបួសធ្ងន់តែម្តង ហើយក្រោយមកអ្នកទាំងពីរក៏នាំគ្នារត់គេចខ្លួនបាត់ស្រមោល។
ប្រភពព័ត៌មានបានបន្តថា មូលហេតុដែលនាំឱ្យមានករណីអំពើហិង្សាខាងលើគឺដោយសារតែជនដៃដល់ខឹងនឹងជនរងគ្រោះរាយការណ៍ពីបងរបស់គេឲ្យសមត្ថកិច្ចនគរបាលដឹង ពាក់ព័ន្ធករណីប្រើប្រាស់គ្រឿងញៀន ទើបបង្កើតទៅជារឿងគំនុំបែបនេះតែម្តង។ ទោះបីជាយ៉ាងណាក៏ដោយ បច្ចុប្បន្នជនរងគ្រោះ ត្រូវបានសាច់ញាតិបញ្ជូនមកសង្គ្រោះនៅមន្ទីរពេទ្យបង្អែកខេត្តប៉ៃលិនដើម្បីសង្គ្រោះ។ ចំណែកជនបង្ក និងអ្នករួមគំនិតត្រូវសមត្ថកិច្ចរៀបចំសំណុំរឿង ដើម្បីស្រាវជ្រាវរកចាប់ខ្លួនយកមកផ្តន្ទាទោតាមនីតិវិធីផងដែរ៕
ចែករំលែកព័តមាននេះ