ភេរវកម្មបំបុករថយន្ត2កន្លែង ស្លា.ប់ និងរបួសជាច្រើន
ការវាយប្រហារភេរវកម្ម ប្រកាសទទួលខុសត្រូវ ដោយក្រុមរដ្ឋអ៊ិស្លាមបណ្តាលឱ្យមនុស្សស្លា.ប់១៣នាក់ និងរបួសជាង១០០នាក់ មានសញ្ជាតិផ្សេងៗពេលរថយន្ត
ប្រទេសអេស្ប៉ាញ ៖ ការវាយប្រហារភេរវកម្ម ប្រកាសទទួលខុសត្រូវ ដោយក្រុមរដ្ឋអ៊ិស្លាមបណ្តាលឱ្យមនុស្សស្លាប់១៣នាក់ និងរបួសជាង១០០នាក់ មានសញ្ជាតិផ្សេងៗពេលរថយន្តកាំមីញ៉ុងធុនតូចមួយបើកបំបុកលើមនុស្សម្នាកាលពីថ្ងៃទី១៧ សីហា នៅភាគកណ្តាលទីក្រុងបាសឺឡោន របស់អេស្ប៉ាញត្រង់សង្កាត់ដែលសម្បូរអ្នកទេសចរ។
អ្នកបើករថយន្តនោះបានរត់គេចខ្លួន ដោយពុំមានបញ្ចេញពាក្យអ្វីមួយម៉ាត់ ក្រោយពីបើករថយន្តរបស់គេបំបុកពួកអ្នកថ្មើរជើងនៅមហាវិថី RAMBLA ជាមហាវិថីក្រុងបាសឺឡោនភាគឦសានអេស្ប៉ាញ មានមនុស្សច្រើនកុះករ ពិសេសពួកអ្នកទេសចរគ្រប់សញ្ជាតិ ។ សាក្សីទាំងឡាយនិយាយថា អ្នកវាយប្រហាររូបនេះពុំមានអាវុធឡើយ ក៏ប៉ុន្តែប៉ូលិសប្រកាសថា បានចាប់ខ្លួនជនសង្ស័យ២នាក់ ម្នាក់ជាជនជាតិអេស្ប៉ាញ ហើយម្នាក់ទៀតជាជនជាតិម៉ារ៉ុកនៅមូលដ្ឋាន២ ស្ថិតនៅដាច់ឆ្ងាយពីគ្នាគឺមូលដ្ឋានមួយស្ថិតនៅចម្ងាយ១០០គីឡូម៉ែត្រ និងមួយទៀតស្ថិតនៅចម្ងាយ២០០គីឡូម៉ែត្រ ពីក្រុងបាសឺឡោន ។
ប៉ូលិសបន្តថា ម្យ៉ាងទៀត ប្រតិបត្តិការមួយរបស់ប៉ូលិសបានបើកធ្វើនាយប់ថ្ងៃទី១៧ មក១៨ សីហា ដើម្បីកម្ទេចលទ្ធភាពនៃការវាយប្រហារភេរវកម្មមួយនៅទីក្រុង CAMBRILS ជាទីក្រុងជាប់មាត់សមុទ្រ ស្ថិតនៅចម្ងាយ១២០គីឡូម៉ែត្រ ភាគនិរតីក្រុងបាសឺឡោន ។ តាម TWITTER ប៉ូលិសតំបន់កាតាឡូញ មានទីក្រុងបាសឺឡោន ជាទីប្រជុំជនប្រកាសថា ប្រសិនបើលោកអ្នកនៅទីក្រុង CAMBRILS សូមកុំចេញក្រៅ ។
អ្នកទទួលខុសត្រូវម្នាក់ខាងមហាផ្ទៃនៃរដ្ឋាភិបាលតំបន់កាតាឡូញ លោក JOAQUIM FORN ថ្លែងទៅកាន់សារព័ត៌មាននាយប់ថ្ងៃទី១៧ សីហា ថា សម្រាប់ពេលនេះយើងអាចអះអាងថា មនុស្ស១៣នាក់ស្លាប់ ហើយជាង១០០នាក់រងរបួស ។
យោងតាមរដ្ឋមន្ត្រីការបរទេសបែលហ្ស៊ិក លោក DIDIER REYNDERS ថា នារីជនជាតិបែលហ្ស៊ិកម្នាក់ស្ថិតក្នុងចំណោមអ្នកស្លាប់ ។
ភ្នាក់ងារការពារស៊ីវិលអេស្ប៉ាញនិយាយថា ជនរងគ្រោះទាំងអ្នកស្លាប់ទាំងអ្នករបួសមានសញ្ជាតិយ៉ាងហោចណាស់១៨ផ្សេងគ្នា ។
ក្រុមរដ្ឋអ៊ិស្លាមក្រុងសេចក្តីប្រកាសមួយផ្សាយតាមទីភ្នាក់ងារព័ត៌មានឃោសនារបស់ខ្លួន AMAQ បានប្រកាសទទួលខុសត្រូវចំពោះការវាយប្រហារភេរវកម្មនេះ ។ សេចក្តីប្រកាសនោះគូសបញ្ជាក់ថា ប្រតិបត្តិការវាយប្រហារធ្វើឡើងជាការឆ្លើយតបចំពោះការអំពាវនាវឱ្យវាយប្រហារគោលដៅក្នុងបណ្តារដ្ឋស្ថិតក្នុងក្រុមចម្រុះអន្តរជាតិ ប្រឆាំងជីហាដដែលធ្វើប្រតិបត្តិការនៅស៊ីរី និងនៅអីុរ៉ាក់ ។
ដោយប្រើប្រាស់រថយន្តជាមធ្យោបាយដើម្បីសម្លាប់បណ្តាអ្នកថ្មើរជើង ការវាយប្រហារនៅទីក្រុងបាសឺឡោននាំឱ្យគេនឹកដល់ការវាយប្រហារប្រហាក់ប្រហែលគ្នា នេះជាស្នាដៃក្រុមរដ្ឋអ៊ិស្លាមនៅទីក្រុង NICE បារាំង ក្រុងប៊ែរឡាំង អាល្លឺម៉ង់ និងក្រុងឡុងដ៍អង់គ្លេស ។
អេស្ប៉ាញជាប្រទេសមានអ្នកទេសចរហូរចូលច្រើនជាងគេទី៣លើពិភពលោក រហូតមកដល់ពេលនេះគេចផុតពីការវាយប្រហារភេរវកម្មរបស់ពួកជីហាដក្រុមរដ្ឋអ៊ិស្លាម ដែលធ្វើការវាយប្រហារនៅរដ្ឋធានីអឺរ៉ុបឯទៀតៗ ដូចជាក្រុងប៉ារីស ឬក្រុងព្រុចសែលជាដើម ។ ក៏ប៉ុន្តែគឺនៅទីក្រុងម៉ាឌ្រីដ ដែលធ្លាប់មានការវាយប្រហារភេរវកម្មយ៉ាងបង្ហូរឈាមបំផុតនៅអឺរ៉ុបដោយនាថ្ងៃទី១១ មីនា ឆ្នាំ២០០៤ គ្រាប់បែកទាំងឡាយ បានផ្ទុះក្នុងរថភ្លើងនានា បណ្តាលឱ្យមនុស្សស្លាប់១៩១នាក់ ។ ការវាយប្រហារនេះប្រកាសទទួលខុសត្រូវ ដោយក្រុមអាល់កៃដា ។
អ្នកនាំពាក្យប៉ូលិសនិយាយថា បុរសជនជាតិម៉ារ៉ុកម្នាក់ឈ្មោះ DRISS OUKABIR ទាក់ទិននឹងរថយន្តប្រើវាយប្រហារត្រូវចាប់ខ្លួននៅក្រុង RIPOLL ចម្ងាយ១០០គីឡូម៉ែត្រ ខាងជើងក្រុងបាសឺឡោន ។ ជនសង្ស័យម្នាក់ទៀតកើតនៅក្រុង MELILA ជាដែនដីអេស្ប៉ាញលយចូលម៉ារ៉ុកត្រូវចាប់ខ្លួននៅកន្លែងមួយចម្ងាយ២០០គីឡូម៉ែត្រ ពីក្រុងបាសឺឡោន ដែលនៅទីនោះមានការផ្ទុះក្នុងផ្ទះមួយ បណ្តាលឱ្យមនុស្សស្លាប់ម្នាក់ និងរបួស៧នាក់ កាលពីយប់ថ្ងៃទី១៦ មក១៧ សីហា ។
នៅក្រុង CAMBRILS ខាងត្បូងក្រុងបាសឺឡោន ប៉ូលិសបាញ់សម្លាប់ភេរវករ៥នាក់ ប៉ូលិសរាយការណ៍ថា ភេរវករ៥នាក់បានត្រូវបាញ់សម្លាប់កាលពីយប់ថ្ងៃទី១៧ មក១៨ សីហា នៅទីក្រុង CAMBRILS ចម្ងាយ១២០គីឡូម៉ែត្រ ភាគនិរតីក្រុងបាសឺឡោន ប៉ុន្មានម៉ោងក្រោយការវាយប្រហារភេរវកម្មនៅរដ្ឋធានីរដ្ឋកាតាឡូញ បណ្តាលឱ្យមនុស្សស្លាប់១៣នាក់ ។
ប៉ូលិសប្រកាសថា ភេរវករ៥នាក់បានត្រូវបាញ់សម្លាប់នៅ CAMBRILS ក៏ប៉ុន្តែពុំបានបញ្ជាក់ថា តើពួកគេមានទំនាក់ទំនងដែរឬអត់ ជាមួយការវាយប្រហារបំបុករថយន្តនៅក្រុងបាសឺឡោនជាទីក្រុងធំទី២របស់អេស្ប៉ាញ ។ ចំណែកអ្នកនាំពាក្យម្នាក់នៃអាជ្ញាធរតំបន់កាតាឡូញបញ្ជាក់ថា មានការបាញ់តតាំងគ្នា នៅទីក្រុង CAMBRILS ហើយពុំមានភ្នាក់ងារប៉ូលិសណាម្នាក់រងរបួសឡើយ ។
វាយប្រហារបំបុករថយន្តទី២ នៅ អេស្ប៉ាញ
ការវាយប្រហារភេរវកម្មបំបុករថយន្តទី២ នៅអេស្ប៉ាញកើតមានប៉ុន្មានម៉ោងក្រោយការវាយប្រហារបំបុករថយន្តលើកទីមួយ ។
ក្រោយការបើករថយន្តបំបុកមនុស្សម្នាបណ្តាលឱ្យមនុស្សស្លាប់១៣នាក់ នៅក្រុងបាសឺឡោននាវេលាម៉ោង១៨យប់ថ្ងៃទី១៧ សីហា រថយន្តធុន AUDI A3 មួយគ្រឿង បានបំបុកមនុស្សច្រើននាក់នៅទល់មុខមាត់សមុទ្រនៃទីក្រុង CAMBRILS ។ ការវាយប្រហារបំបុករថយន្តលើកទី២ នេះ បណ្តាលឱ្យមនុស្ស៧នាក់រងរបួស ហើយប៉ូលិសអេស្ប៉ាញប្រកាសនាយប់នោះថា បានបាញ់សម្លាប់ភេរវករ៥នាក់ ។ យោងតាមអ្នកនាំពាក្យអាជ្ញាធរតំបន់ថា ជនសង្ស័យទាំងនេះជិះក្នុងរថយន្ត AUDI A3 មួយគ្រឿង ហើយហាក់ដូចជាបើកបុកមនុស្សច្រើននាក់ មុនពេលប៉ះជាមួយកងល្បាតរួចផ្ទុះការបាញ់តតាំងគ្នា ។ ពួកនេះមួយចំនួនមានគ្រឿងផ្ទុះនៅចង្កេះ ។ នេះជាការវាយប្រហារមានទំនាក់ទំនងជាមួយការវាយប្រហារនៅក្រុងបាសឺឡោន ។
ចំណែកក្នុងចំណោមអ្នករបួសជាង១០០នាក់ នៅក្រុងបាសឺឡោន មានជនជាតិបារាំង២៦នាក់ ក្នុងនោះយ៉ាងតិច១១នាក់របួសធ្ងន់ ។ រួចចំពោះអ្នករបួស៧នាក់នៅក្រុង CAMBRILS មានជនស៊ីវិល៦នាក់ និងប៉ូលិសម្នាក់ ៕
ចែករំលែកព័តមាននេះ